ຄະນະໂຄສະນາອົບຮົມແຂວງ ໄຊຍະບູລີ

ລາຍລະອຽດ

ສ້າງຂື້ນເມື່ອ ວັນພະຫັດ, 17 ພະຈິກ 2022 02:38

ເມືອງຄອບສຳເລັດຊຸດຝຶກອົບຮົມ

--------------------

ວຽກງານໂຄສະນາ-ປາຖະກະຖາ ໃຫ້ພະນັກງານຫຼັກແຫຼ່ງອ້ອມຂ້າງເມືອງ

ຄັ້ງວັນທີ 8-10 ພະຈິກ 2022

          ຕອນເຊົ້າຂອງວັນທີ 8 ພະຈິກ 2022 ທີ່ຫໍປະຊຸມໃຫຍ່ຂອງເມືອງຄອບ ແຂວງໄຊຍະບູລີ ໄດ້ຈັດຕັ້ງພິທີເປີດຊຸດຝຶກອົບຮົມວຽກງານໂຄສະນາ-ປາຖະກະຖາ ໃຫ້ແກ່ພະນັກງານຫຼັກແຫຼ່ງອ້ອມຂ້າງເມືອງຂື້ນ ໂດຍພາຍໃຕ້ການເປັນປະທານຂອງ ທ່ານ ແພງຊ້ອຍ ແພງເມືອງ ກໍາມະການພັກແຂວງ, ເລຂາພັກເມືອງ, ເຈົ້າເມືອງໆຄອບ ແລະ ໃຫ້ກຽດເຂົ້າຮ່ວມຂອງ ທ່ານ ນາງ ບົວລີ ບັນຊາລິດ ຫົວໜ້າກົມໂຄສະນາ ຄະນະໂຄສະນາອົບຮົມສູນກາງພັກ, ມີຄະນະປະຈຳພັກເມືອງ, ກຳມະການພັກເມືອງ, ຫົວໜ້າ, ຮອງຫົວໜ້າຫ້ອງການ, ພະນັກງານຫຼັກແຫຼ່ງຂອງເມືອງ ເຂົ້າຮ່ວມທັງໝົດ 48 ທ່ານ, ຍິງ 11 ທ່ານ. ຊຸດອົບຮົມຄັ້ງນີ້ປະກອບມີນັກສໍາມະນາກອນມາຈາກບັນດາຫ້ອງການ, ກຳລັງປະກອບອາວຸດ, ວິສະຫະກິດຕ່າງໆ ອ້ອມຂ້າງເມືອງ ທັງໝົດ 50 ທ່ານ, ຍິງ 12 ທ່ານ ໃນນີ້ມີຄະນະບໍລິຫານງານພັກເມືອງ 15 ທ່ານ, ຍິງ 4 ທ່ານ ແລະ ມີນັກວິທະຍາກອນ 3 ທ່ານ ທີ່ມາຈາກຄະນະໂຄສະນາອົບຮົມສູນກາງ.

ການຝຶກອົບຮົມຄັ້ງນີ້ ບັນດານັກສຳມະນາກອນໄດ້ຮັບຟັງການຂື້ນບັນຍາຍເອກະສານດ້ານທິດສະດີ, ສົນທະນາແລກປ່ຽນບົດຮຽນພຶດຕິກຳຕົວຈິງນຳນັກວິທະຍາກອນ ພ້ອມທັງຈັດແບ່ງກຸ່ມຄົ້ນຄ້ວາຂຽນບົດ ແລະ ຂື້ນປາຖະກະຖາຕົວຈິງ ເຊິ່ງບັນດາເອກະສານທີ່ນຳມາຝຶກອົບຮົມຄັ້ງນີ້  ປະກອບມີຈຳນວນ 3 ບົດ ຄື: ບົດທີ່ 1 ບັນຫາພື້ນຖານຂອງວຽກງານໂຄສະນາ, ບົດທີ່ 2 ຝຶກຝົນຄວາມສາມາດໃນການຂຽນເອກະສານ, ບົດທີ່ 3 ຄຸນລັກສະນະ ແລະ ສີລະປະໃນການປາກເວົ້າ. ທັງໝົດນີ້ ກໍ່ເພື່ອເປັນການຍົກລະດັບຄວາມຮູ້, ຄວາມສາມາດ ໃຫ້ແກ່ຖັນແຖວພະນັກງານທີ່ເຮັດວຽກງານໂຄສະນາ ຂອງເມືອງ ເປັນຕົ້ນແມ່ນນັກປາຖະກະຖາ, ນັກໂຄສະນາເຄື່ອນທີ່ ແລະ ນັກໂຄສະນາຜ່ານສື່ ສາມາດຕອບສະໜອງໄດ້ຄວາມຮຽກຮ້ອງຕ້ອງການ ຂອງໜ້າທີ່ການເມືອງຂອງພັກ ໃນໄລຍະໃໝ່. ຊຸດຝຶກອົບຮົມໄດ້ດຳເນີນເປັນເວລາ 3 ວັນ ແລະ ປິດລົງໃນຕອນແລງຂອງວັນທີ 10 ພະຈິກ 2022.

ຂຽນໂດຍ: ຄອຂ.ຊຍ

• < ຕໍ່ໄປ
• ຕໍ່ໄປ >