ທ່ານເຈົ້າແຂວງ ໄຊຍະບູລີ ຕ້ອນຮັບຄະນະອາດີດທະຫານອາສາສະມັກ ແລະ ຊ່ຽວຊານການທະຫານ ສສ ຫວຽດນາມ.

ລາຍລະອຽດ

ສ້າງຂື້ນເມື່ອ ວັນພຸດ, 08 ພະຈິກ 2023 02:20

ຂຽນໂດຍ ສີນົນ ອ່ອນສາ

ທ່ານເຈົ້າແຂວງ ໄຊຍະບູລີ ຕ້ອນຮັບຄະນະອາດີດທະຫານອາສາສະມັກ ແລະ ຊ່ຽວຊານການທະຫານ ສສ ຫວຽດນາມ.

 ໃນຕອນເຊົ້າຂອງວັນທີ 7 ພະຈິກ 2023 ທີ່ຫ້ອງຮັບແຂກຊັ້ນ 4 ຫ້ອງວ່າການແຂວງ ໄຊຍະບູລີ, ທ່ານ ພົງສະຫວັນ ສິດທະວົງ ກໍາມະການສູນກາງພັກ, ເລຂາພັກແຂວງ, ເຈົ້າແຂວງ ໄຊຍະບູລີ ໄດ້ຕ້ອນຮັບ ຄະນະອາດີດທະຫານອາສາສະມັກ ແລະ ຊ່ຽວຊານການທະຫານແຂວງ ຟູເຖາະ, ແຂວງ ອຽນບາຍ ແລະ ແຂວງ ລາວການ ສສ ຫວຽດນາມ ນໍາໂດຍ ທ່ານ ພັນເອກ ຫງຽນຈ໋ອງຕັງ ອາດີດຫົວໜ້າກົມການເງິນ ກະຊວງຕໍາຫຼວດ ຫວຽດນາມ ພ້ອມຄະນະ.

 ກ່ອນອື່ນ ທ່ານ ພັນເອກ ຫງຽນຈ໋ອງຕັງ ແມ່ນໄດ້ແຈ້ງຈຸດປະສົງທີ່ມາຢ້ຽມຢາມ ແລະ ທັດສະນະສືກສາຢູ່ແຂວງ ໄຊຍະບູລີ ໂດຍສະເພາະແມ່ນເພື່ອຢ້ຽມຢາມເບິ່ງການພັດທະນາຂອງແຂວງພາຍຫຼັງປະເທດຊາດໄດ້ຮັບການປົດປ່ອຍ, ເຊິ່ງທີມງານດັ່ງກ່າວສ່ວນຫຼາຍແມ່ນໄດ້ມາຊ່ວຍ ສປປ ລາວ, ໂດຍສະເພາະແມ່ນມາຊ່ວຍແຂວງ ໄຊຍະບູລີ ໃນການຕໍ່ສູ້ຕ້ານສັດຕູຜູ້ຮຸກຮານໃນອາດີດ ຈົນສາມາດໄດ້ຮັບໄຊຊະນະ ແລະ ສາມາດປົດປ່ອຍແຂວງກໍ່ຄືປະເທດຊາດໃນປີ 1975, ພ້ອມດຽວກັນຍັງໄດ້ພົບປະແລກປ່ຽນບົດຮຽນນໍາສະຫະພັນນັກຮົບເກົ່າ, ແນວລາວສ້າງຊາດແຂວງ ໄຊຍະບູລີ ຕື່ມອີກ,ໂອກາດດັ່ງກ່າວ ທ່ານ ພົງສະຫວັນ ສິດທະວົງ ເຈົ້າແຂວງ ໄຊຍະບູລີ ກໍ່ໄດ້ສະແດງຄວາມຍິນດີຕ້ອນຮັບຄະນະຜູ້ແທນ ພ້ອມທັງສະແດງຄວາມກະຕັນຍູຮູ້ບຸນຄຸນຕໍ່ອາດີດທະຫານອາສາສະມັກ ແລະ ຊ່ຽວຊານການທະຫານ ທີ່ໄດ້ສະລະເຮື່ອແຮງເພື່ອເຮັດການປະຕິວັດກໍ່ຄືປົກປັກຮັກສາເຂດນໍ້າແດນດິນອັນຄົບຖ້ວນຂອງແຂວງ ໄຊຍະບູລີ ໄວ້ໄດ້ຢ່າງໝັ້ນຄົງ ແລະ ເຊື່ອວ່າການຊ່ວຍເຫຼືອ ແລະ ຄວາມສາມັກຄີແບບພິເສດ ຂອງສອງຊາດລາວ-ຫວຽດນາມ, ເວົ້າລວມ, ເວົ້າສະເພາະແມ່ນແຂວງ ໄຊຍະບູລີ ກັບບັນດາແຂວງແຮກສ່ຽວ ຂອງ ສສ ຫວຽດນາມນັ້ນຈະສືບຕໍ່ຮັດແໜ້ນ ແລະ ໝັ້ນຄົງທະນົງແກ່ນຊົ່ວກາລະນານ, ພ້ອມດຽວກັນຍັງໄດ້ລາຍງານສະພາບການພັດທະນາເສດຖະກີດຂອງແຂວງ ໂດຍສັງເຂບ ເຊິ່ງເສດຖະກິດຂອງແຂວງແມ່ນໄດ້ອາໄສ 3 ທ່າແຮງຕົ້ນຕໍຄື: ອຸດສາຫະກໍາ, ກະສິກໍາ ຕິດພັນກັບການປຸງແຕ່ງເພື່ອສົ່ງອອກ. ການຄ້າຊາຍແດນ, ການຂົນສົ່ງ, ການທ່ອງທ່ຽວ. ພະລັງງານໄຟຟ້າ. ສ່ວນການປູກພືດເປັນສິນຄ້ານັ້ນປະກອບມີ: ມັນຕົ້ນ, ສາລີຫົວອາຫານສັດ, ໝາກເດືອຍ ແລະ ພືດອື່ນໆອີກຈໍານວນໜຶ່ງ.

ຂ່າວ-ພາບ: ອຸ່ນເຮືອນ ໂພທິລັກ

• < ຕໍ່ໄປ
• ຕໍ່ໄປ >