ວັນທີ 18 ມີນາ 2024 ນີ້ ກອງບັນຊາການ ປກສ ເມືອງໄຊສະຖານ ແຂວງໄຊຍະບູລີ ໄດ້ຈັດກອງປະຊຸມສະຫຼຸບປະເມີນຜົນວຽກງານກໍ່ສ້າງຮາກຖານການເມືອງພັດທະນາຊົນນະບົດຮອບດ້ານ ຂື້ນຢ່າງເປັນທາງການ ຢູ່ທີ່ຫ້ອງປະຊຸມກອງບັນຂາການດັ່ງກ່າວ ໂດຍການເຂົ້າຮ່ວມເປັນກຽດຂອງ ສະຫາຍ ພັເອກ ຄໍາສິນ ຜິວວັນນາ ເລຂາຄະນະພັກ ຫົວໜ້າກອງບັນຊາການ ປກສ ແຂວງໄຊຍະບູລີ ມີສະຫາຍ ພອນສະຫວັນ ວໍລະສັກ ວ່າການ ເລຂາພັກເມືອ ວ່າການເຈົ້າເມືອງ ມີຄະນະປະຈໍາພັກເມືອງ, ຄະນະພັກ, ຄະນະບັນຊາ, ແຂກຖືກເຊີນ ພ້ອມດ້ວຍນາຍ ແລະ ພົນຕໍາຫຼວດເຂົ້າຮ່ວມ.
ກອງປະຊຸມໃນຄັ້ງນີ້ ພາຍຫຼັງທີ່ຄະນະຈັດຕັ້ງພິທີໄດ້ສະເໜີຈຸດປະສົງພ້ອມທັງຜ່ານຂໍ້ຕົກລົງວ່າດ້ວຍການອະນຸມັດເປີດກອງປະຊຸມແລ້ວ ສະຫາຍ ພັເອກ ຄໍາສິນ ຜິວວັນນາ ຫົວໜ້າກອງບັນຊາການ ປກສ ແຂວງໄຊຍະບູລີ ກໍ່ໄດ້ມີການກ່າວເປີດກອງປະຊຸມຢ່າງເປັນທາງການ ຈາກນັ້ນຜູ້ເຂົ້າຮ່ວມກໍ່ໄດ້ຮັບຟັງບົດສະຫຼຸບຕີລາຄາການລົງກໍ່ສ້າງຮາກຖານການເມືອງ ພັດທະນາຊົນນະບົດຮອບດ້ານຂອງກໍາລັງປ້ອງກັນຄວາມສະຫງົບ ຢູ່ຈຸດສຸມພັດທະນາກິ່ວກອກ-ສະເຂດ ເມືອງໄຊສະຖານ ແຕ່ປີ 2015-2025 ໂດຍໄດ້ຍົກໃຫ້ເຫັນກ່ຽວກັບສະພາບລວມ ທີ່ຕັ້ງ ແລະ ຈຸດພິເສດ, ສະພາບພົນລະເມືອງ, ຕີລາຄາຜົນໄດ້ຮັບໃນການລົງກໍ່ສ້າງຮາກຖານໃນໄລຍະຜ່ານມາໂດຍສະເພາະແມ່ນ ວຽກງານການເມືອງ-ແນວຄິດ, ວຽກງານປ້ອງກັນຊາດ-ປ້ອງກັນຄວາມສະຫງົບ, ດ້ານເສດຖະກິດແກ້ໄຂຊີວິດການເປັນຢູ່ຂອງປະຊາຊົນ, ວັດທະນະທໍາ-ສັງຄົມ ຍົກໃຫ້ເຫັນເຖິງບັນຫາດ້ານອ່ອນ, ຂໍ້ຄົງຄ້າງ ແລະ ວິທີການແກ້ໄຂໃນຕໍ່ໜ້າ. ຈາກນັ້ນປະທານກອງປະຊຸມຍັງໄດ້ມີຄໍາເຫັນເຈາະຈີ້ມຕໍ່ກັບການລົງກໍ່ສ້າງຮາກຖານໃນໄລຍະຜ່ານມາ ເພື່ອໃຫ້ບັນດາຜູ້ເຂົ້າຮ່ວມໄດ້ມີການປະກອບຄໍາຄິດຄໍາເຫັນ ພ້ອມນີ້ຜູ້ເຂົ້າຮ່ວມຍັງໄດ້ມີການປະກອບຄໍາຄິດຄໍາເຫັນຢ່າງກົງໄປກົງມາຕໍ່ກັບການຈັດຕັ້ງປະຕິບັດວຽກງານດັ່ງກ່າວໃນໄລຍະຜ່ານມາ ເພື່ອຊອກໃຫ້ເຫັນບັນຫາດ້ານດີ, ດ້ານອ່ອນ, ຂໍ້ຄົງຄ້າງທີ່ຈະໄດ້ພ້ອມກັນສືບຕໍ່ແກ້ໄຂໃນຕໍ່ໜ້າ, ຮັບຟັງຂໍ້ຕົກລົງຂອງທ່ານເຈົ້າແຂວງ ເລກທີ 2179/ຈຂ.ຊຍ ວ່າດ້ວຍການຖອນກໍາລົງ ປກສ ແຂວງ, ຜ່ານບົດບັນທຶກມອບຮັບຈຸດສຸມລະຫວ່າງຫ້ອງຄຸ້ມຄອງສໍາມະໂນຄົວ ແລະ ກໍ່ສ້າງຮາກຖານ ກັບກອງບັນຊາການ ປກສ ເມືອງໄຊສະຖານ. ກອງປະຊຸມໃນຄັ້ງນີ້ຍັງໄດ້ຮັບຟັງການມີຄໍາເຫັນຊີ້ນໍາຂອງ ສະຫາຍ ພອນສະຫວັນ ວໍລະສັກ ວ່າການ ເລຂາພັກເມືອງ.
ຕອນທ້າຍຂອງກອງປະຊຸມຜູ້ເຂົ້າຮ່ວມຍັງໄດ້ຮັບຟັງການມີຄໍາເຫັນໂອ້ລົມຂອງພັເອກ ຄໍາສິນ ຜິວວັນນາ ເລຂາຄະນະພັກ ຫົວໜ້າກອງບັນຊາການ ປກສ ແຂວງໄຊຍະບູລີ ພ້ອມທັງໄດ້ກ່າວປິດກອງປະຊຸມຢ່າເປັນທາງການຕື່ມອີກ.
ພາບ ແລະ ຂ່າວ ສະຫວ່າງ ແສງທອງຄໍາ