ກອງປະຊຸມປຶກສາຫາລືກຽມຄວາມພ້ອມໃນການປະກາດແຂວງໄຊຍະບູລີເປັນແຂວງຢຸດຕິການຖ່າຍຊະຊາຍ.
………………………………..
ກອງປະຊຸມປຶກສາຫາລືກຽມຄວາມພ້ອມໃນການປະກາດແຂວງໄຊຍະບູລີເປັນແຂວງຢຸດຕິການຖ່າຍຊະຊາຍ ແບບເຊິ່ງໜ້າ ແລະ ທາງໄກ ໄດ້ຈັດຂຶ້ນໃນວັນທີ 15 ພຶດສະພາ 2024 ນີ້ ທີ່ຫ້ອງປະຊຸມຫ້ອງວ່າການແຂວງ ໂດຍການເປັນປະທານຂອງທ່ານ ເພັດພິໄຊ ສູນວິໄລ ຮອງເຈົ້າແຂວງໄຊຍະບູລີ, ມີຫົວໜ້າ, ຮອງຫົວໜ້າພະແນກການ, ກົມກອງ, ເຈົ້າເມືອງ, ຮອງເຈົ້າເມືອງ, ຫົວໜ້າ, ຮອງຫົວໜ້າຫ້ອງການພາຍໃນເມືອງ, ຫົວໜ້າ, ຮອງຫົວໜ້າຫ້ອງການສາທາລະນະສຸກ 11 ເມືອງ ເຂົ້າຮ່ວມ.
ໃນພິທີຜູ້ເຂົ້າຮ່ວມໄດ້ຮັບຟັງຂໍ້ຕົກລົງຂອງທ່ານເຈົ້າແຂວງໄຊຍະບູລີ ວ່າດ້ວຍການແຕ່ງຕັ້ງຄະນະຮັບຜິດຊອບກະກຽມພິທີປະກາດແຂວງໄຊຍະບູລີເປັນແຂວງຢຸດຕິການຖ່າຍຊະຊາຍເຊິ່ງປະກອບມີການແຕ່ງຕັ້ງຄະນະຮັບຜິດຊອບກະກຽມປະກາດແຂວງໄຊຍະບູລີເປັນແຂວງຢຸດຕິການຖ່າຍຊະຊາຍມີ 11 ທ່ານ, ຄະນະຮັບຜິດຊອບເນື້ອໃນ ແລະ ກອງເລຂາມີ 17 ທ່ານ, ຄະນະຮັບຜິດຊອບຮັບແຂກ ແລະ ພິທີການມີ 15 ທ່ານ, ຄະນະຮັບຜິດຊອບເສດຖະກິດ ແລະ ລະດົມທຶນມີ 8 ທ່ານ, ຄະນະຮັບຜິດຊອບຍ້ອງຍໍມີ 5 ທ່ານ ພ້ອມດ້ວຍຫົວໜ້າພາຍໃນ 11 ເມືອງ ແລະ ຮອງຫົວໜ້າສາທາເມືອງ 11 ເມືອງ, ຄະນະຮັບຜິດຊອບປ້ອງກັນຄວາມສະຫງົບມີ 6 ທ່ານ, ຄະນະຮັບຜິດຊອບປ້ອງກັນພະຍາດ ແລະ ຮັກສາສຸຂະພາບມີ 8 ທ່ານ, ຄະນະຮັບຜິດຊອບຂະບວນການ ແລະ ສິລະປະວັນນະຄະດີມີ 8 ທ່ານ, ຄະນະຮັບຜິດຊອບສະຖານທີ່ແສງສີສຽງ ແລະ ຂ່າວສານມີ 12 ທ່ານ, ຄະນະຮັບຜິດຊອບວາງສະແດງຜະລິດຕະພັນການແພດ, ຢາພື້ນເມືອງ ແລະ ຜະລິຕະພັນພາຍໃນ. ຈາກນັ້ນ ທ່ານເພັດພິໄຊ ສູນວິໄລ ຮອງເຈົ້າແຂວງໄຊຍະບູລີ ໄດ້ມີຄໍາເຫັນໃຫ້ທິດທາງເພື່ອໃຫ້ບັນດາຄະນະຮັບຜິດຊອບແຕ່ລະອານຸກໍາມະການໄດ້ຈັດຕັ້ງປະຕິບັດໃຫ້ມີຜົນສໍາເລັດຕາມລະດັບຄາດໝາຍ. ທ່ານຍັງໄດ້ຍົກໃຫ້ເຫັນວ່າ: ການປະກາດບ້ານ, ເມືອງ ແລະ ແຂວງ ເປັນແຂວງຢຸດຕິການຖ່າຍຊະຊາຍນັ້ນ ແມ່ນວຽກບູລິມາສິດຂອງລັດຖະບານ, ມັນແມ່ນການປະຕິບັດພັນທະສາກົນ ທີ່ປະມຸກລັດຂອງພວກເຮົາໄດ້ລົງນາມບົດບັນທືກໃນກອງປະຊຸມສະມັດຊາໃຫຍ່ຂອງອົງການສະຫະປະຊາຊາດໃນປີ 2005 ແລະ ມີແຜນປະກາດລົບລ້າງການຖ່າຍຊະຊາຍໃນປີ 2025 ໃນຂອບເຂດທົ່ວປະເທດ. ຜ່ານການປະຕິບັດຕົວຈິງໃນໄລຍະຜ່ານມາເຫັນວ່າ ໄດ້ປະກາດໄປແລ້ວທັງໝົດ 7 ແຂວງ, ແຂວງທຳອິດແມ່ນແຂວງ ບໍລິຄຳໄຊ, ຖັດມາແມ່ນ ນະຄອນຫຼວງວຽງຈັນ, ແຂວງວຽງຈັນ, ແຂວງ ສາລະວັນ, ອັດຕະປື, ຈຳປາສັກ ແລະ ແຂວງບໍ່ແກ້ວ, ສ່ວນໄຊຍະບູລີຂອງພວກເຮົາແມ່ນໄດ້ປະກາດເມືອງ ເປັນເມືອງຢຸດຕິການຖ່າຍຊະຊາຍໄປແລ້ວ 10 ເມືອງ, ຍັງເມືອງໄຊສະຖານເຊິ່ງຄາດວ່າຈະປະກາດໃນເດືອນ ມິຖຸນາ ແລະ ປະກາດແຂວງໄຊຍະບູລີ ເປັນແຂວງອັນດັບທີ 8 ຂອງທົ່ວເທດ ໃນເດືອນ ສິງຫາ 2024.
………………………….
ຂ່າວ+ພາບ: ບຸນທີ
#News.XBL