ກອງປະຊຸມອົງການປົກຄອງແຂວງ ປະຈຳເດືອນ ຕຸລາ ແລະ ທິດທາງແຜນວຽກ ປະຈໍາເດືອນ ພະຈິກ ປີ 2024.
……………….
ກອງປະຊຸມອົງການປົກຄອງແຂວງ ປະຈຳເດືອນ ຕຸລາ ແລະ ທິດທາງແຜນວຽກ ປະຈໍາເດືອນ ພະຈິກ ປີ 2024 ໄດ້ຈັດຂຶ້ນໃນວັນທີ 1 ພະຈິກ 2024 ນີ້ ທີ່ຫ້ອງປະຊຸມຫ້ອງວ່າການແຂວງໄຊຍະບູລີ ພາຍໃຕ້ການເປັນປະທານຂອງທ່ານ ເພັດພິໄຊ ສູນວິໄລ ຮອງເຈົ້າແຂວງໄຊຍະບູລີ, ມີບັນດາກໍາມະການປະຈໍາພັກແຂວງ, ກໍາມະການພັກແຂວງ, ຫົວໜ້າ, ຮອງຫົວໜ້າພະແນກການ, ອົງການ, ກົມກອງ, ເລຂາທິການສະພາປະຊາຊົນແຂວງ, ລັດວິສາຫະກິດ, ທະນາຄານ ອ້ອມຂ້າງແຂວງ, ເຈົ້າເມືອງ 11 ເມືອງ, ພະນັກງານທີ່ກ່ຽວຂ້ອງເຂົ້າຮ່ວມແບບເຊິ່ງໜ້າ ແລະ ທາງໄກ.
ທ່ານ ເພັດພິໄຊ ສູນວິໄລ ຮອງເຈົ້າແຂວງໄຊຍະບູລີ ໄດ້ກ່າວເປີດກອງປະຊຸມຢ່າງເປັນທາງການຊຶ່ງທ່ານໄດ້ກ່າວວ່າ: ກອງປະຊຸມຄັ້ງນີ້ ເນື້ອໃນຕົ້ນຕໍໄດ້ພ້ອມກັນຄົ້ນຄວ້າປຶກສາຫາລື ບັນດາວຽກງານ ທີ່ສຳຄັນຂອງແຂວງຄື: ຮັບຟັງລາຍງານ ສະພາບພົ້ນເດັ່ນຂອງອົງການປົກຄອງແຂວງ ໃນການຈັດຕັ້ງປະຕິບັດວຽກງານ ປະຈຳເດືອນ ຕຸລາ ແລະ ທິດທາງແຜນວຽກຈຸດສຸມ ເດືອນ ພະຈິກ ປີ 2024. ຮັບຟັງລາຍງານ ກ່ຽວກັບວຽກງານການປ້ອງກັນ ແລະ ຮັກສາຄວາມສະຫງົບລຽບຕາມຊາຍແດນ. ຮັບຟັງລາຍງານ ກ່ຽວກັບການແກ້ໄຂປະກົດການຫຍໍ້ທໍ້ໃນສັງຄົມ ໂດຍຕິດພັນກັບວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ. ຮັບຟັງລາຍງານ ກ່ຽວກັບການຈັດຕັ້ງປະຕິບັດລາຍຮັບ-ລາຍຈ່າຍງົບປະມານ ປະຈຳເດືອນ ຕຸລາ. ຮັບຟັງລາຍງານ ກ່ຽວກັບການຕິດຕາມຊຸກຍູ້ການເກັບກູ້ຜົນຜະລິດລະດູປີ ແລະ ການກະກຽມປູກພຶດລະດູແລ້ງ. ຮັບຟັງການລາຍງາກ່ຽວກັບການຄຸ້ມຄອງຫົວໜ່ວຍສິນຄ້າກະສິກໍາ ພາຍໃນແຂວງ. ຮັບຟັງລາຍງານ ກ່ຽວກັບການແກ້ໄຂບັນຫາສະພາບເສັ້ນທາງທີ່ເປ່ເພ ຫຼັງລະດູຝົນ. ຮັບຟັງລາຍງານ ກ່ຽວກັບການກະກຽມຄວາມພ້ອມເຂົ້າຮ່ວມແຂ່ງຂັນກິລາເຍົາວະຊົນທົ່ວປະເທດ ທີ່ແຂວງສາລະວັນ. ຮັບຟັງລາຍງານ ກ່ຽວກັບການຄຸ້ມຄອງແຮງງານ ແລະ ການຈັດຫາງານ ເພື່ອຕອບສະໜອງຄວາມຕ້ອງການແຮງງານ ໃຫ້ແກ່ຫົວໜ່ວຍແຮງງານຢູ່ພາຍໃນ. ຮັບຟັງລາຍງານ ກ່ຽວກັບການຈັດຕັ້ງປະຕິບັດຄະດີທີ່ມີຄວາມຫຍຸ້ງຍາກ ພາຍໃນແຂວງ.ຮັບຟັງລາຍງານ ກ່ຽວກັບວຽກງານປັບປຸງກົງຈັກການຈັດຕັ້ງ ທີ່ຍັງບໍ່ທັນສຳເລັດ, ຈາກນັ້ນ ທ່ານ ປອ ພຸດທະຈອນ ປິ່ນທິບ ຮອງຫົວໜ້າຫ້ອງວ່າການແຂວງໄຊຍະບູລີ ໄດ້ລາຍການຈັດຕັ້ງປະຕິບັດວຽກງານທີ່ພົ້ນເດັ່ນຂອງອົງການປົກຄອງແຂວງ ປະຈຳເດືອນຕຸລາ ແລະ ທິດທາງແຜນວຽກຈຸດສຸມ ເດືອນພະຈິກ 2024. ໃນໄລຍະຜ່ານມາ ເຖີງວ່າແຂວງໄຊຍະບູລີໄດ້ພົບຄວາມຫຍຸ້ງຍາກ ແລະ ສິ່ງທ້າທາຍຫຼາຍດ້ານທັງທາງກົງ ແລະ ທາງອ້ອມ ໂດຍສະເພາະຄວາມຫຍຸ້ງຍາກທາງດ້ານເສດຖະກິດ-ການເງິນ, ການປ່ຽນແປງຂອງດິນຟ້າອາກາດ, ໄພທຳມະຊາດ, ລາຄາສິນຄ້າ, ລາຄານໍ້າມັນເຊື້ອໄຟ, ອັດຕາແລກປ່ຽນ ແລະ ອັດຕາເງີນເຟີ້ຍັງມີທ່າອຽງສູງ; ເສັ້ນທາງເປ່ເພ ເຮັດໃຫ້ການສັນຈອນໄປ-ມາ ພົບຄວາມຫຍຸ້ງຍາກ, ບັນຫາການຂາດເເຄນແຮງງານ ເຊິ່ງໄດ້ສົ່ງຜົນກະທົບຕໍ່ກັບການພັດທະນາເສດຖະກິດ-ສັງຄົມຂອງແຂວງ. ແຕ່ພາຍໃຕ້ການນຳພາ-ຊີ້ນຳຂອງອົງການປົກຄອງແຂວງ ເຮັດໃຫ້ແຂວງສາມາດຮັກສາສະຖຽນລະພາບທາງດ້ານການເມືອງ, ສັງຄົມມີຄວາມສະ
ຫງົບ ແລະ ເປັນລະບຽບຮຽບຮ້ອຍໂດຍພື້ນຖານ ຊີວິດການເປັນຢູ່ຂອງປະຊາຊົນຄ່ອຍໆດີຂຶ້ນ, ບັນດາຄາດໝາຍສູ້ຊົນຂອງຂະແໜງການຂັ້ນຕ່າງໆ ໄດ້ບັນລຸຕາມແຜນທີ່ວາງໄວ້. ສຸມໃສ່ແກ້ໄຂບັນຫາເຄັ່ງຮ້ອນທາງດ້ານເສດຖະກິດ-ການເງິນ ມາຮອດປະຈຸບັນຈັດເກັບລາຍຮັບໄດ້ 2.063,77 ຕື້ກີບ, ເທົ່າກັບ 98,64 % ຂອງແຜນການປີ, ຄຸ້ມຄອງລາຍຈ່າຍ ປະຕິບັດໄດ້ 586,11 ຕື້ກີບ, ເທົ່າກັບ 125,36 %, ໃນ 1 ເດືອນຜ່ານມາສາມາດສົ່ງອອກສິນຄ້າໄດ້ທັງໝົດ ມູນຄ່າ3,060,100.00ໂດລາ ແລະ ນຳເຂົ້າສິນຄ້າທັງໝົດ ມູນຄ່າ 4,030,156.93 ໂດລາ, ສໍາເລັດຂື້ນທະບຽນວິສາຫະກິດໄດ້ທັງໝົດ 38 ຫົວໜ່ວຍ ລວມມີທຶນທັງໝົດ 56.799 ຕື້ກີບ. ມາຮອດປະຈຸບັນເກັບກູ້ເຂົ້ານາປີໄດ້ 16.998 ເຮັກຕາ, ເທົ່າກັບ 47 %, ເຂົ້າໄຮ່ເກັບກູ້ໄດ້ 8.229 ເຮັກຕາ ເທົ່າກັບ 79%; ພືດລະດູຝົນເກັບກູ້ໄດ້ 29.889 ເຮັກຕາ ເທົ່າກັບ 21%; ໃນໄລຍະທ້າຍເດືອນກັນຍາ ຫາຕົ້ນເດືອນຕຸລາ 2024 ທີ່ຜ່ານມາ ໄດ້ມີການລະບາດຂອງພະຍາດແມງໄມ້ສັດຕູພືດໃນນາເຂົ້າ ທີ່ເມືອງປາກລາຍ, ແຂວງໄຊຍະບູລີ ເຊີ່ງໄດ້ຮັບຜົນກະທົບທັງໝົດ 7 ບ້ານ, 215 ຄອບຄົວ, ເນື້ອທີ່ໄດ້ຮັບຜົນກະທົບ 81,38 ເຮັກຕາ ແລະ ເສຍຫາຍຫຼາຍ 53,51 ເຮັກຕາ .ໄດ້ສຸມໃສ່ປັບປຸງໂຄງລ່າງໂດຍໄດ້ແກ້ໄຂສຸກເສີນເສັ້ນທາງຫຼວງແຫ່ງຊາດ, ທາງຫຼວງທ້ອງຖິ່ນ ທີ່ໄດ້ຮັບຜົນກະທົບຈາກໄພພິບັດທາງທຳມະຊາດ ສຳເລັດ ຈໍານວນ 30 ເສັ້ນທາງ, ມູນຄ່າ 22,85 ຕື້ກວ່າກີບ ແລະ ລໍຖ້າການຟື້ນຟູຫຼັງຝົນ ຈໍານວນ 14 ເສັ້ນທາງ, ມູນຄ່າ 20,47 ຕື້ກວ່າກີບ. ພ້ອມດຽວກັນນີ້ ບັນດາຫົວໜ້າພະແນກການ, ອົງການ, ກົມກອງ, 11 ເມືອງທົ່ວແຂວງ ໄດ້ປະກອບຄໍາຄິດຄໍາເຫັນໃຊ້ບົດສະຫຼຸບ ແລະ ທິດທາງແຜນການ, ຈຸດສຸມ ເດືອນພະຈິກ 2024 ຕື່ມອີກ.
……………….
ຂ່າວ+ພາບ:ຄອຂ
#News.XBL
