ການນໍາແຂວງ ໄຊຍະບູລີ ເຂົ້າຮ່ວມພິທີປະກາດເມືອງ ມົກເຈົ່າ ແຂວງ ເຊິນລາ ເປັນແຫຼ່ງທ່ອງທ່ຽວແຫ່ງຊາດ.
…………………….
ໃນລະຫວ່າງວັນທີ 17-19 ພຶດສະພາ 2024 ນີ້, ການນໍາແຂວງ ໄຊຍະບູລີ ນໍາໂດຍ ທ່ານ ເພັດພິໄຊ ສູນວິໄລ ຮອງເຈົ້າແຂວງ ໄຊຍະບູລີ ຜູ້ຊີ້ນຳວຽກງານຂົງເຂດວັດທະນະທຳ-ສັງຄົມ, ມີທ່ານ ບຸນທະວີ ບຸນຊູຮັກ ຮອງຫົວໜ້າພະແນກ ຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ, ທ່ານ ນາງ ສຸດາພອນ ດວງຫຼ້າ ຮອງຫົວໜ້າພະແນກ ການຕ່າງປະເທດ ແຂວງ ໄຊຍະບູລີ ພ້ອມຄະນະ ໄດ້ເດີນທາງເຂົ້າຮ່ວມ ພິທີປະກາດ ເມືອງ ມົກເຈົ່າ, ແຂວງ ເຊິນລາ ສສ ຫວຽດນາມ ເປັນແຫຼ່ງທ່ອງທ່ຽວແຫ່ງຊາດ.
ໃຫ້ການຕ້ອນຮັບຄະນະນໍາຂອງແຂວງ ໄຊຍະບູລີ ໂດຍແມ່ນ ທ່ານ ນາງ ຈາງທິຊັວນ ຮອງປະທານຄະນະກໍາມະການປະຊາຊົນແຂວງ ຜູ້ປະຈໍາການ ພ້ອມດ້ວຍການນໍາຂອງແຂວງ ເຊິນລາ ແລະ ການນໍາຂອງເມືອງ ມົກເຈົ່າໃຫ້ການຕ້ອນຮັບຢ່າງອົບອຸ່ນ ທີ່ໂຮງແຮມ ເມືອງແທ່ງ ມົກເຈົ່າ, ພິທີປະກາດ ເມືອງ ມົກເຈົ່າ, ແຂວງ ເຊິນລາ ສສ ຫວຽດນາມ ເປັນແຫຼ່ງທ່ອງທ່ຽວແຫ່ງຊາດ ຄັ້ງນີ້ເຊິ່ງເລີ່ມແຕ່ວັນທີ 17-19 ພຶດສະພາ 2024 ໂດຍມີບັນດາກິດຈະກໍາປິ່ນອ້ອມຄື: ການສະແດງວັດທະນະທໍາ, ແນະນໍາຜະລິດຕະພັນທ່ອງທ່ຽວ, ສິນຄ້າໂອດ໋ອບ ແລະ ອາຫານຊົນເຜົ່າ, ໃຫ້ການປຶກສາກ່ຽວກັບການທ່ອງທ່ຽວ, ກິດຈະກໍາເກັບໝາກໄມ້ຢູ່ສວນໝາກໝັ້ນ ນາກາ ເຂດປ່າແຄນ 1 ເມືອງ ກະເສດ ມົກເຈົ່າ, ກິດຈະກໍາສົ່ງເສີມການທ່ອງທ່ຽວ ພາຍໃຕ້ຫົວຂໍ້ ທິດທາງການພັດທະນາເຂດທ່ອງທ່ຽວແຫ່ງຊາດ ເມືອງ ມົກເຈົ່າ ໃຫ້ເປັນສີຂຽວ ແລະ ໝັ້ນຄົງ, ຕອນເຊົ້າຂອງວັນທີ 18 ພຶດສະພາ ຄະນະນໍາຂອງແຂວງ ນໍາໂດຍທ່ານ ເພັດພິໄຊ ສູນວິໄລ ຮອງເຈົ້າແຂວງ ໄຊຍະບູລີ ແມ່ນໄດ້ເຂົ້າຮ່ວມພິທີການແຂ່ງຂັນເກັບໝາກໝັ້ນຢູ່ສວນໝາກໝັ້ນ ນາກາ ເຂດປ່າແຄນ 1 ເມືອງ ກະເສດ ມົກເຈົ່າ ເຊິ່ງໃນງານໄດ້ມີການສະແດງສິລະປະວັນນະຄະດີຂອງເຜົ່າມົ້ງຫວຽດນາມ ເຊິ່ງແຕ່ລະລາຍການແມ່ນສະແດງເຖິງການວິຖີຊີວິດຂອງເຜົ່າຕິດພັນກັບການກະເສດ, ເມືອງດັ່ງກ່າວເປັນເມືອງທີ່ປູກພືດເປັນສິນຄ້າເຊັ່ນ: ປູກໝາກໝັ້ນ, ສາລີ, ໝາກນອດ, ໝາກຊູ ແລະ ພືດຜັກຕ່າງໆຕາມລະດູການ, ນອກນີ້ຍັງໄດ້ປູກຫຍ້າລ້ຽງງົວນົມເພື່ອຂາຍນົມງົວໃຫ້ກັບໂຮງງານຜະລິດນົມສໍາເລັດຮູບ, ຈາກນັ້ນທີມງານຂອງແຂວງກໍ່ໄດ້ທ່ຽວຊົມເບິ່ງຜົນຜະລິດກະສິກໍາຂອງປະຊາຊົນທີ່ວາງສະແດງໃນງານແຂ່ງຂັນເກັບໝາກໝັ້ນ, ເຂົ້າຢ້ຽມຊົມໂຮງງານຜະລິດນົມງົວສໍາເລັດຮູບ, ທ່ຽວຊົມແຫຼ່ງທ່ອງທ່ຽວ ຂັ້ນໄດແກ້ວ ເຊິ່ງເປັນແຫຼ່ງທ່ອງທ່ຽວທີ່ມີສື່ສຽງຂອງເມືອງ ມົກເຈົ່າ ແລະ ໃນຕອນຄໍ່າຂອງວັນດຽວກັນແມ່ນໄດ້ເຂົ້າຮ່ວມພິທີປະກາດ ເມືອງ ມົກເຈົ່າ, ແຂວງ ເຊິນລາ ສສ ຫວຽດນາມ ເປັນແຫຼ່ງທ່ອງທ່ຽວແຫ່ງຊາດ ຢ່າງເປັນທາງການ ທີ່ສະໜາມຫຼວງໃຈກາງເມືອງ ມົກເຈົ່າ, ໃນພິທີໄດ້ມີການສະແດງສິລິປະ 1 ລາຍການ, ຮັບຊົມສາລະຄະດີສັ້ນ, ຈາກນັ້ນກໍ່ໄດ້ມີກ່າວຈຸດປະສົງລາຍງານການກະກຽມເປີດເມືອງ ມົກເຈົ່າ ເປັນເມືອງທ່ອງທ່ຽວແຫ່ງຊາດ, ພ້ອມທັງໄດ້ມອບໃບຢ້້ງຢືນຮັບຮອງເອົາເມືອງ ມົກເຈົ່າ ເປັນເມືອງທ່ອງທ່ຽວແຫ່ງຊາດຢ່າງເປັນທາງການ, ຕອນທ້າຍຂອງພິທີຍັງໄດ້ຮັບຊົມການສະແດງສິລະປະຂອງບັນດາເຜົ່າອີກ 10 ລາຍການ ແລະ ໃນວັນທີ 19 ພຶດສະພາ 2024 ແມ່ນໄດ້ຈັດກິດຈະກໍາປະສົບການທ່ຽວຊົມສະຖານທີ່ທ່ອງທ່ຽວເມືອງ ມົກເຈົ່າ, ແຫຼ່ງທ່ອງທ່ຽວແຫ່ງຊາດ, ກິດຈະກໍາແຂ່ງຂັນລົດຖີບຢູ່ເມືອງ ເວິນໂຮ້ ແລະ ກິດຈະກໍາ ຂີ່ບອນລູນລອຍຟ້າຢູ່ແຫຼ່ງທ່ອງທ່ຽວແຫ່ງຊາດມົກເຈົ່າ.
…………………………..
ຂ່າວ-ພາບ: ອຸ່ນເຮືອນ ໂພທິລັກ
#News.XBL