ວັນທີ 23 ທັນວາ 2025 ນີ້. ທ່ານ ກູຢາງ ຈືປໍ ຮອງຫົວໜ້າກົມພັດທະນາການບໍລິຫານລັດ ພ້ອມດ້ວຍ ທີມງານຈາກຄະນະຈັດຕັ້ງສູນກາງພັກ ໄດ້ລົງມາເຄື່ອນໄຫວຊຸກຍູ້ວຽກງານຢູ່ເມືອງເງິນ ແຂວງ ໄຊຍະບູລີ. ເຊີ່ງມີບັນດາ ທ່ານຫົວໜ້າ,ຮອງຫົວໜ້າຫ້ອງການ, ກົມກອງທີ່ກ່ຽວຂ້ອງ ເຂົ້າຮ່ວມ
ທ່ານ ລັດທິ ພົມມະຈິດ ຫົວໜ້າຄະນະຈັດຕັ້ງເມືອງ ໄດ້ລາຍງານ ສະພາບການປັບປຸງ ຊັບຊ້ອນ ກົງຈັກການຈັດຕັ້ງພາຍໃນເມືອງເງິນ. ໂດຍປະຕິບັດຕາມມະຕິ ວ່າດ້ວຍການປັບປຸງກົງຈັກການຈັດຕັ້ງ ສະບັບເລກທີ 03/ ຄບສພ,ລົງວັນທີ 12 ມີນາ 2025 , ຄໍາແນະນໍາຂອງຄະນະເລຂາທິການສູນກາງພັກ ສະບັບເລກທີ 483/ຄລສພ,ລົງວັນທີ 04 ເມສາ 2025 ເມືອງເງິນໄດ້ສຸ່ມໃສ່ຈັດຕັ້ງເຜີຍແຜ່ເຊື່ອມຊືມບັນດາເນື້ອໃນນິຕິກໍາດັງກ່າວໃຫ້ແກ່ພະນັກງານ-ລັດຖະກອນ, ເລຂາໜ່ວຍພັກບ້ານ-ນາຍບ້ານພາຍໃນເມືອງໄດ້ຮັບຮູ້ ແລະ ເຂົ້າໃຈ ຕິດພັນກັບການແຕ່ງຕັ້ງຄະນະຮັບຜິດຊອບການປັບປຸງກົງຈັກການຈັດຕັ້ງຂັ້ນເມືອງ. ຜ່ານການຈັດຕັ້ງປະຕິບັດສະແດງອອກດັ່ງນີ້: ເມືອງເງິນແມ່ນສໍາເລັດການປັບປຸງກົງຈັກການຈັດຕັ້ງຈາກ 22 ພາກສ່ວນມາເປັນ 18 ພາກສ່ວນ ( ຫຼຸດລົງ 04 ພາກສ່ວນ ) ,ບຸກຄະລາກອນຈາກ 457 ຄົນ,ຍິງ 207 ຄົນມາເປັນ 450 ຄົນ,ຍິງ 206 ຄົນ( ຫຼຸດລົງ 07 ຄົນ,ຍິງ 01 ຄົນ ) ໃນນີ້ຮັບອຸດໜູນບໍານານ 05 ຄົນ,ຍິງ 0 ຄົນ; ຮັບອຸດໜູນເທື່ອດຽວ 02 ຄົນ/ຍິງ 01 ຄົນ.ສໍາເລັດການໂຮມບັນດາຫ້ອງການ ຫຼື ໂອນບາງວຽກງານທີ່ກ່ຽວຂ້ອງໄປຂຶ້ນກັບພາກສ່ວນອື່ນຄື: ໂຮມຫ້ອງການແຜນການ ແລະການລົງທຶນໄປຂຶ້ນກັບຫ້ອງການ-ການເງິນເອີ້ນຊື່ວ່າຫ້ອງການ-ການເງິນເມືອງ; ໂຮມຫ້ອງການຊັບພະຍາກອນທໍາມະຊາດ ແລະ ສິ່ງແວດລ້ອມໄປຂຶ້ນກັບຫ້ອງການກະສິກໍາ ແລະ ປ່າໄມ້ເອີ້ນຊື່ວ່າຫ້ອງການກະສິກໍາ ແລະ ສິ່ງແວດລ້ອມເມືອງ; ໂຮມຫ້ອງການພະລັງງານ ແລະບໍ່ແຮ່ໄປຂຶ້ນກັບຫ້ອງການອຸດສາຫະກໍາ ແລະການຄ້າ ເອີ້ນຊື່ວ່າຫ້ອງການອຸດສາຫະກໍາ ແລະການຄ້າ; ໂອນວຽກງານຈໍານວນໜຶ່ງຂອງຫ້ອງການພາຍໃນເມືອງໄປຂຶ້ນກັບຄະນະຈັດຕັ້ງເມືອງ,ຫ້ອງວ່າການເມືອງ, ຫ້ອງການ-ການເງິນເມືອງ ແລະກອງບັນຊາການ ປກສ ເມືອງ; ໂອນວຽກງານຖະແຫຼ່ງຂ່າວຫ້ອງການຖະແຫ່ງຂ່າວວັດທະນະທໍາ ແລະທ່ອງທ່ຽວເມືອງໄປຂຶ້ນກັບຫ້ອງການຄະນະໂຄສະນາອົບຮົມເມືອງ.ສໍາເລັດການປະກາດການໂຍກຍ້າຍ, ແຕ່ງຕັ້ງບຸກຄະນະລາກອນພ້ອມທັງເຮັດບົດບັນທຶກການມອບວຽກເຊິ່ງກັນແລະກັນ;ສໍາເລັດການກຳນົດເຂດຕາແສງ, ຊື່ຕາແສງ ແລະບຸກຄະລາກອນທີ່ຈະໄປປະຈໍາຢູ່ຕາແສງ.ກອງປະຊຸມ ໄດ້ພ້ອມກັນຄົ້ນຄ້ວາ, ແລກປ່ຽນຄຳຄິດຄໍາເຫັນເຊິ່ງກັນ ແລະກັນ ລະຫວ່າງຫ້ອງການ,ກົມກອງ ແລະ ກົມພັດທະນາການບໍລິຫານລັດ, ຄົ້ນຄ້ວານິຕິກຳທີ່ຈຳເປັນຈຳນວນໜື່ງ ເພື່ອເປັນບ່ອນອີງໃນການຈັດຕັ້ງປະຕິບັດວຽກງານຄຸ້ມຄອງພົນລະເມືອງຢູ່ເມືອງເງິນໃນຕໍ່ໜ້າ ໃຫ້ມີຜົນສໍາເລັດຕາມລະດັບຄາດໝາຍ.
ໂດຍ:ອິນແປງ ແຫວນຄຳ (ເມືອງເງິນ)