ວັນທີ 19 ມີນາ 2025 ນີ້ຄະນະບໍລິຫານງານພັກເມືອງໄຊສະຖານ ແຂວງໄຊຍະບູລີ ໄດ້ດໍາເນີນຊີວິດການເມືອງຂອງຄະນະບໍລິຫານງານພັກເມືອງ ສະໄໝທີ II ຂື້ນຢ່າງເປັນທາງການ ຢູ່ທີ່ຫ້ອງປະຊຸມຫ້ອງວ່າການເມືອງ ໂດຍການເຂົ້າຮ່ວມເປັນກຽດຂອງສະຫາຍ ສໍາລານ ສຸວັນນະໂຊດ ກໍາມະການປະຈໍາພັກແຂວງ ຫົວໜ້າຄະນະຈັດຕັ້ງແຂວງ ພາຍໃຕ້ການເປັນປະທານຂອງ ສະຫາຍ ພອນສະຫວັນ ວໍລະສັກ ວ່າການເລຂາພັກເມືອງ ວ່າການເຈົ້າເມືອງ, ມີກໍາມະການປະຈໍາພັກເມືອງ, ກໍາມະການພັກເມືອງ, ຄະນະຮັບຜິດຊອບຂັ້ນແຂວງ ເຂົ້າຮ່ວມ.
ກອງປະຊຸມໃນຄັ້ງນີ້ສະຫາຍ ພອນສະຫວັນ ວໍລະສັກ ວ່າການເລຂາພັກເມືອງ ວ່າການເຈົ້າເມືອງ ໄດ້ກ່າວເປີດກອງປະຊຸມດໍາເນີນຊີວິດການເມືອງທ້າຍສະໄໝ ຂອງຄະນະບໍລິຫານງານພັກເມືອງ ສະໄໝທີ II ຢ່າງເປັນທາການແລ້ວ ຜູ້ເຂົ້າຮ່ວມແມ່ນໄດ້ຮັບຟັງການເຜິຍແຜ່ເຊື່ອມຊືມຄໍາແນະນໍາຂອງຄະນະກວດກາສູນກາງພັກ ສະບັບເລກທີ 285/ຄກສພ, ລົງວັນທີ 15 ກັນຍາ 2023 ກ່ຽວກັບການກະກຽມ ແລະ ດໍາເນີນກອງປະຊຸມທ້າຍສະໄໝ ກອງປະຊຸມໃຫຍ່ 3 ຂັ້ນຂອງພັກ, ຜ່ານຮ່າງບົດສໍາຫຼວດການນໍາພາລວມຂອງຄະນະບໍລິຫານງານພັກເມືອງ ສະໄໝທີ II ພ້ອມທັງຜ່ານຄໍາຕໍານິສົ່ງຂ່າວຕໍ່ການນໍາພາລວມ ຈາກນັ້ນ ສະຫາຍ ສໍາລານ ສຸວັນນະໂຊດ ກໍາມະການປະຈໍາພັກແຂວງ ຫົວໜ້າຄະນະຈັດຕັ້ງແຂວງ ກໍ່ໄດ້ມີຄໍາເຫັນຊີ້ນໍາ ແລະ ຄໍາເຫັນເຈາະຈີ້ມຕໍ່ກັບຮ່າງບົດສໍາຫຼວດການນໍາພາລວມຂອງຄະນະບໍລິຫານງານພັກເມືອງ ສະໄໝທີ II ພ້ອມນີ້ຜູ້ແທນກອງປະຊຸມກໍ່ໄດ້ຂື້ນປະກອບຄໍາຄິດຄໍາເຫັນໃສ້ຮ່າງບົດສໍາຫຼວດດັ່ງກ່າວ ເພື່ອຊອກໃຫ້ເຫັນບັນຫາດ້ານດີ, ດ້ານອ່ອນຂໍ້ຄົງຄ້າງທີ່ຈະໄດ້ພ້ອມກັນສືບຕໍ່ແກ້ໄຂໃນຕໍ່ໜ້າ. ກອງປະຂຸມໃນຄັ້ງນີ້ສະຫາຍ ສໍາລານ ສຸວັນນະໂຊດ ກໍາມະການປະຈໍາພັກແຂວງ ຍັງໄດ້ມີຄໍາເຫັນຊີ້ນໍາກ່ອນການດໍາເນີນຊີວິດການເມືອງ ຈາກນັ້ນກໍ່ໄດ້ມີການດໍາເນີນການສໍາຫຼວດບຸກຄົນ ຄະນະປະຈໍາພັກເມືອງ, ກໍາມະການພັກເມືອງ ພ້ອມທັງໄດ້ມີການສະຫຼຸບຕີລາຄາບັັ້ນດໍາເນີນຊີວິດການເມືອງ ແລະ ກ່າວປິດກອງປະຊຸມຕື່ມອີກ.
ກອງປະຊຸມດໍາເນີນຊີວິດການເມືອງຂອງຄະນະບໍລິຫານງານພັກເມືອງໄຊສະຖານ ສະໄໝທີ II ແມ່ນຈະໄດ້ດໍາເນີນເປັນເວລາ 2 ວັນຈຶ່ງຈະໄດ້ອັດລົງ.
ພາບ-ຂ່າວ ສະຫວ່າງ ແສງທອງຄໍາ