ເພື່ອເຮັດໃຫ້ວຽກງານການສຶກສາ ແລະ ກິລາ ຢູ່ພາຍໃນເມືອງແກ່ນທ້າວ ແຂວງໄຊຍະບູລີ ໄດ້ຮັບການພັດທະນາຮອບດ້ານ ທາງດ້ານປະລິມານ ແລະ ຄຸນນະພາບ, ປັບປຸງ, ປົວແປງ ແລະ ແກ້ໄຂບັນດາຈຸດອ່ອນ-ຂໍ້ຄົງຄ້າງ, ບັນດາຄາດໝາຍຕ່າງໆທີ່ຍັງບໍ່ທັນບັນລຸ ສະພາບບັນຫາ ແລະ ປະກົດການຫຍໍ້ທໍ້ຕ່າງໆທີ່ເກີດຂຶ້ນໃນຖັນແຖວພະນັກງານ, ຄູສອນ ແລະ ນ້ອງນັກຮຽນນັ້ນ. ເນື່ອງໃນໂອກາດທີ່ທ່ານ ສີຄານ ແກ່ນມະນີ ປະທານຄະນະກໍາມະການປົກຄອງເມືອງແກ່ນທ້າວ ໄດ້ເຂົ້າຮ່ວມກອງປະຊຸມ ຜູ້ບໍລິຫານການສຶກສາ ແລະ ກິລາ ທົ່ວເມືອງ ປະຈໍາສົກຮຽນ 2024-2025 ທີ່ໄດ້ຈັດຂຶ້ນໃນວັນທີ 12 ທັນວາ 2025 ນີ້, ທ່ານປະທານຄະນະກໍາມະການປົກຄອງເມືອງເມືອງ ໄດ້ເນັ້ນໜັກໃຫ້ຜູ້ບໍລິຫານການສຶກສາ ແລະ ກິລາ ເອົາໃຈໃສ່ເພີ່ມທະວີການສຶກສາອົບຮົມການເມືອງ-ແນວຄິດໃຫ້ພະນັກງານ, ຄູສອນ ແລະ ນ້ອງນັກຮຽນ ໃຫ້ເລິກເຊິ່ງ, ທົ່ວເຖິງ ແລະ ຕໍ່ເນື່ອງ ເປັນປົກກະຕິ ເປັນຕົ້ນແມ່ນຈັດຕັ້ງການຮໍ່າຮຽນແນວທາງນະໂຍບາຍຂອງພັກ, ກົດໝາຍຂອງລັດ ເຊັ່ນ: ກົດໝາຍ ວ່າດ້ວຍພະນັກງານ-ລັດຖະກອນ, ກົດໝາຍ ວ່າດ້ວຍການສຶກສາ, ມະຕິ, ຄໍາສັ່ງ, ຄໍາແນະນໍາ ແລະ ເອກະສານນິຕິກໍາອື່ນໆ ຂອງຂະແໜງການສຶກສາ ແລະ ກິລາ, ສູ້ຊົນຈັດຕັ້ງປະຕິບັດ 16 ຄາດໝາຍ 20 ຕົວຊີ້ບອກ ທີ່ສະພາແຫ່ງຊາດ ແລະ ສະພາປະຊາຊົນແຂວງ ຮັບຮອງ ໃຫ້ບັນລຸຕາມຄາດໝາຍທີ່ວາງໄວ້, ສູ້ຊົນແກ້ໄຂບັນຫາການປະລະການຮຽນໃນຊັ້ນມັດທະຍົມ ທີ່ນັບມື້ເພີ່ມຂຶ້ນໃນປະຈຸບັນໃຫ້ຫຼຸດລົງ, ເອົາໃຈໃສ່ປະຕິບັດນະໂຍບາຍ ແລະ ມາດຕະການແກ້ໄຂບັນຫາການຂາດແຄນຄູສອນຢູ່ແຕ່ລະຊັ້ນຮຽນ ຕາມມະຕິຂອງລັດຖະບານ ເລກທີ 09/ລບ ໃຫ້ປະກົດຜົນເປັນຈິງ, ສະຖານການສຶກສາທຸກແຫ່ງ ຕ້ອງສູ້ຊົນຈັດຕັ້ງປະຕິບັດ 3 ຂໍ້ແຂ່ງຂັນຂອງຂະແໜງການສຶກສາ ແລະ ກິລາ ຄື: ສອນດີ-ຮຽນເກັ່ງ, ຕ້ານປະກົດການຫຍໍ້ທໍ້, ສ້າງສະພາບແວດລ້ອມທີ່ດີໃນໂຮງຮຽນ ພ້ອມທັງຈັດຕັ້ງ ການປະຕິບັດນະໂຍບາຍຍ້ອງຍໍຊົມເຊີຍບຸກຄົນ, ກົມກອງທີ່ດີເດັ່ນເຂົ້າໃນວຽກງານການສຶກສາ ແລະ ກິລາ ໃຫ້ໄດ້ຮັບການພັດທະນາຢ່າງຕໍ່ເນື່ອງ, ເພີ່ມຄວາມເອົາໃຈໃສ່ເປັນພິເສດໃນການຈັດຕັ້ງປະຕິບັດການແຂ່ງຂັນສອນດີ-ຮຽນເກັ່ງ ໃນຖັນແຖວຄູສອນ ໃຫ້ເປັນຂະບວນຟົດຟື້ນ, ມີແບບແຜນວິທີເຮັດວຽກທີ່ດີ ໃນການຈັດຕັ້ງສອນດີ-ສອນເກັ່ງຂອງຄູ ເພື່ອເປັນເງື່ອນໄຂການສ້າງຕໍາແໜ່ງວິຊາການຄູ ແລະ ກໍ່ສ້າງນັກຮຽນເກັ່ງ ໃຫ້ໄດ້ໄປເຂົ້າຮ່ວມການແຂ່ງຂັນສອບເສັງນັກຮຽນເກັ່ງ ໃນລະດັບຊາດ, ເອົາໃຈໃສ ປັບປຸງປະສິດທິພາບການຮຽນ-ການສອນໃຫ້ມີຄຸນນະພາບສູງ ເທົ່າທຽມກັບຕົວເມືອງ ໂດຍເລີ່ມຈາກຊັ້ນການສຶກສາກ່ອນໄວຮຽນ, ປະຖົມສຶກສາ ແລະ ຈົບສາຍສາມັນສຶກສາ ຮັບປະກັນໃຫ້ແຕ່ລະຊັ້ນຮຽນ ມີປະສິດທິຜົນສູງ, ເອົາໃຈໃສ່ການຮັກສາມູນເຊື້ອໂຮງຮຽນຕົວແບບປອດສິ່ງເສບຕິດຊັ້ນມັດທະຍົມສຶກສາໄວ້ໃຫ້ດີ ແລະ ສືບຕໍ່ສ້າງໂຮງຮຽນທີ່ຍັງເຫຼືອໃຫ້ເປັນໂຮງຮຽນຕົວແບບປອດສິ່ງເສບຕິດ. ພ້ອມທັງ, ສືບຕໍ່ສ້າງໂຮງຮຽນຕົວແບບປອດສິ່ງເສບຕິດໂຮງຮຽນປະຖົມສຶກສາ ທີ່ໄດ້ຂຶ້ນແຜນແລ້ວ ໃຫ້ໄດ້ຮັບການປະເມີນຕົວຈິງ, ເອົາໃຈໃສ່ໃນການສົ່ງເສີມການຮັກສາສຸຂະພາບທີ່ດີໃນສະຖານການສຶກສາ ແລະ ໃຫ້ແຕ່ງຕັ້ງຜູ້ຮັບຜິດຊອບ, ຈັດຕັ້ງການອອກແຮງງານ, ອະນາໄມ, ຕັດຫຍ້າເດີ່ນ ແລະ ຮັກສາສິ່ງແວດລ້ອມ ທີ່ດີ, ຫ້ອງການສຶກສາທິການ ແລະ ກິລາເມືອງ ນໍາພາໂຮງຮຽນພາກເອກະຊົນ ປະກອບເອກະ ສານນິຕິກໍາຕ່າງໆໃຫ້ຖືກຕ້ອງຄົບຖ້ວນຕາມນິຕິກໍາຂອງຂະແໜງການສຶກສາ ແລະ ກິລາ ກໍານົດ ເພື່ອຊຸກຍູ້ສົ່ງ ເສີມການສຶກສາພາກເອະຊົນໃຫ້ກວ້າງຂວາງກວ່າເກົ່າ ແລະ ຜູ້ບໍລິຫານສະຖານການສຶກສາ ແລະ ຄູສອນພາຍໃນເມືອງ ນໍາເອົາບັນດານິຕິກໍາຂອງພັກ ແລະ ລັດ ທີ່ໄດ້ເຊື່ອມຊຶມໃນກອງປະຊຸມໃນຄັ້ງນີ້ ໄປຈັດຕັ້ງປະຕິບັດຕົວຈິງໃນຮາກຖານຂອງຕົນ ໃຫ້ມີຄວາມສໍາເລັດເປັນຢ່າງດີ.
ຂ່າວ: ແກ່ນທ້າວ.