ພິທີປະກາດເມືອງ ຄອບ ແຂວງ ໄຊຍະບູລີ ເປັນເມືອງ ສາມັກຄີປອງດອງ.

ພິທີປະກາດເມືອງ ຄອບ ແຂວງ ໄຊຍະບູລີ ເປັນເມືອງ ສາມັກຄີປອງດອງ.
…………………..
ພິທີປະກາດເມືອງ ຄອບ ແຂວງ ໄຊຍະບູລີ ເປັນເມືອງຈັດຕັ້ງປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງ ໄດ້ຈັດຂຶ້ນໃນຕອນເຊົ້າຂອງວັນທີ 28 ພຶດສະພາ 2024 ນີ້, ທີ່ເດິ່ນກິລາຂອງເມືອງດັ່ງກ່າວ, ເປັນກຽດເຂົ້າຮ່ວມມີ ທ່ານ ພົງສະຫວັນ ສິດທະວົງ ເຈົ້າແຂວງ ໄຊຍະບູລີ, ທ່ານ ຄໍາສີ ແພງສະຫວັນ ປະທານແນວລາວສ້າງຊາດແຂວງ, ທ່ານ ພົນຈັດຕະວາ ຄໍາແພງ ເພັດ ຫົວໜ້າກອງບັນຊາການ ປກສ ແຂວງ, ທ່ານ ສົມນຶກ ສິງຄໍາ ວ່າການເຈົ້າເມືອງ-ເມືອງ ຄອບ ມີພະນັກງານຫຼັກແຫຼ່ງຂອງເມືອງ, ພະນັກງານບໍານານ-ອາວຸໂສ, ປະທານແນວແຕ່ລະບ້ານ ແລະ ແຂກຮັບເຊິນເຂົ້າຮ່ວມຢ່າງຫຼວງຫຼາຍ.
ໃນພິທີ ທ່ານ ອ່ອນຈັນ ອິນທະພົມ ປະທານແນວລາວສ້າງຊາດເມືອງ ຄອບ ໄດ້ລາຍງານກ່ຽວກັບການຈັດຕັ້ງປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງ, ເຊິ່ງທ່ານໄດ້ກ່າວວ່າ: ການສ້າງຄອບຄົວ ແລະ ບ້ານສາມັກຄີປອງດອງແມ່ນການປຸກລະດົມກໍາລັງແຮງທົ່ວປວງຊົນໃຫ້ເຂົ້າຮ່ວມປະຕິບັດສອງໜ້າທີ່ຍຸດທະສາດໃຫ້ເປັນຂະບວນກວ້າງຂວາງ ແລະ ຟົດຟື້ນ, ມີຄວາມສາມັກຄີຢ່າງໜັກແໜ້ນ, ມີຄວາມເປັນເອກະພາບຂອງປະຊົນຊົນບັນດາເຜົ່າ, ຊັ້ນຄົນ, ສາດສະໜາ, ເພດ-ໄວ ໂດຍເລີ່ມຈາກຄອບຄົວ ແລະ ຮາກຖານບ້ານເຊິ່ງເປັນພື້ນຖານໃຫ້ແກ່ການສ້າງບ້ານພັດທະນາ, ອັນໄດ້ເຮັດໃຫ້ເມືອງ ຄອບ ຮັບປະກັນໄດ້ສະຖຽນລະພາບທາງດ້ານການເມືອງຢ່າງໜັກແໜ້ນ, ສັງຄົມມີຄວາມສະຫງົບ ເຮັດໃຫ້ເສດຖະກິດສືບຕໍ່ຂະຫຍາຍຕົວຢ່າງຕໍ່ເນື່ອງ, ການຈັດຕັ້ງປະຕິບັດຂະບວນການສ້າງຄອບຄົວ ແລະ ບ້ານສາມັກຄີປອງດອງ ແມ່ນໄດ້ເລີ່ມຈັດຕັ້ງປະຕິບັດແຕ່ເດືອນເມສາ 2017 ເປັນຕົ້ນມາ ໂດຍໄດ້ປະຕິບັດຕາມ 5 ຂັ້ນຕອນ ແລະ ປະເມີນຜົນການສ້າງຄອບຄົວສາມັກຄີປອງດອງຕາມ 4 ມາດຕະຖານຂອງສູນກາງແນວລາວສ້າງຊາດວາງອອກຢ່າງສອດຄອ່ງຖືກຕ້ອງກັບສະພາຄວາມເປັນຈິງ ຂອງທ້ອງຖີ່ນ ເຊິ່ງມີຄອບຄົວທີ່ໄດ້ປະເມີນຜົນທັງໝົດມີ 4,314 ຄອບຄົວ, ປະຕິບັດໄດ້ຕາມມາດຕະຖານຄອບຄົວສາມັກຄີປອງດອງ 3,910 ຄອບຄົວ, ບໍ່ຜ່ານ 404 ຄອບຄົວ, ໄດ້ມອບໃບຢັ້ງຢືນແລ້ວ 3,754 ຄອບຄົວ ແລະ ບໍ່ທັນມອບໃບຢັ້ງຢືນ 156 ຄອບຄົວ, ສັງລວມແລ້ວຜ່ານການຈັດຕັ້ງປະຕິບັດມາເຖິງປັດຈຸບັນ ທົ່ວເມືອງໄດ້ປະກາດຮັບຮອງ ຄອບຄົວທັງໝົດ 3,910 ຄອບຄົວ ກວມ 90,63 % ຂອງຈໍານວນຄອບຄົວທັງໝົດ, ຄອບຄົວບໍ່ຜ່ານ 404 ຄອບຄົວເທົ່າກັບ 9,36%, ແລະ ປະກາດຮັບຮອງບ້ານໄດ້ທັງໝົດ 26 ບ້ານ ເທົ່າກັບ 92,85% ຂອງຈໍານວນບ້ານທັງໝົດ, ບໍ່ຜ່ານ 2 ບ້ານ, ເທົ່າກັບ 7,15%, ໃນພິທີໄດ້ມີການມອບໃບຢັ້ງຢືນເມືອງສາມັກຄີປອງດອງ, ໂດຍແມ່ນ ທ່ານ ພົງສະຫວັນ ສິດທະວົງ ເປັນຜູ້ມອບ ແລະ ຮັບໂດຍ ທ່ານ ສົມນືກ ສິງຄໍາ ວ່າການເຈົ້າເມືອງ-ເມືອງ ຄອບ, ຈາກນັ້ນບັນດາຜູ້ເຂົ້າຮ່ວມກໍ່ໄດ້ຮ່ວມລັ່ນຄ້ອງ 9 ບາດ, ເປີດປ້າຍນາມມະຍົດເມືອງສາມັກຄີປອງດອງ ແລະ ຕັດແຖບຜ້າປ່ອຍປຸມເປົ້າ.
………………………….
ຂ່າວ-ພາບ: ອຸ່ນເຮືອນ ໂພທິລັກ
#News.XBL