ພິທີປິດຝຶກອົບຮົມກົດໝາຍຂັ້ນພື້ນຖານລະບົບບໍາລຸງ 45 ວັນ ຊຸດທີ IX ປີ 2025 ໃຫ້ພະນັກງານຫຼັກແຫຼ່ງຂອງແຂວງ ໄດ້ຈັດຂຶ້ນໃນຕອນເຊົ້າຂອງວັນທີ 17 ກັນຍາ 2025 ນີ້ ຢູ່ທີ່ຫ້ອງປະຊຸມພະແນກກະສິກໍາ ແລະ ສິ່ງແວດລ້ອມແຂວງໄຊຍະບູລີ ເປັນກຽດເຂົ້າຮ່ວມຂອງທ່ານ ເພັດພິໄຊ ສູນວິໄລ ຮອງເຈົ້າແຂວງໄຊຍະບູລີ, ມີຫົວໜ້າ, ຮອງຫົວໜ້າພະແນກການ, ກົມກອງ, ພະນັກງານ-ລັດຖະກອນທີ່ກ່ຽວຂ້ອງ ພ້ອມດ້ວຍນັກຝຶກອົບຮົມກົດໝາຍຂັ້ນພື້ນຖານລະບົບບໍາລຸງ 45 ວັນ ຊຸດທີ IX ປີ 2025 ເຂົ້າຮ່ວມ.
ໃນພິທີທ່ານ ບຸນລ້ຽງ ດວງສົມພອນ ຫົວໜ້າພະແນກຍຸຕິທໍາແຂວງໄຊຍະບູລີ ຂຶ້ນຜ່ານບົດສະຫຼຸບຜົນສໍາເລັດການຮຽນການສອນກົດໝາຍ 45 ວັນ ຊຸດທີ IX ປະຈໍາປີ 2025 ວ່າ: ໂດຍປະຕິບັດ ຕາມແຜນຍຸດທະສາດຂອງແຂວງ ກ່ຽວກັບວຽກງານ ການສ້າງຊັບພະຍາກອນມະນຸດກໍຄື ການສ້າງ ບຸກຄະລາກອນກົດໝາຍໃຫ້ແກ່ທ້ອງຖິ່ນຮາກຖານ ໃນການຝຶກອົບຮົມກົດໝາຍ 45 ວັນ ແມ່ນປະຕິບັດຕາມຄໍາແນະນໍາ ຂອງລັດຖະມົນຕີກະຊວງຍຸຕິທໍາ ໂດຍສະເພາະແມ່ນການສ້າງພະນັກງານກົດໝາຍໃຫ້ບັນດາພະແນກການ, ອົງການ, ອ້ອມຂ້າງແຂວງ ເພື່ອເປັນການບຳລຸງ ຍົກລະດັບຄວາມຮູ້, ຄວາມສາມາດໃຫ້ພະນັກງານຫຼັກແຫຼ່ງໃຫ້ມີຄວາມຮູ້ຂັ້ນ ພື້ນຖານທາງດ້ານກົດໝາຍ ແລະ ນິຕິກຳຕ່າງໆ. ມີນັກຝຶກອົບຮົມກົດໝາຍຂັ້ນພື້ນຖານ 45 ວັນ ມີທັງໝົດ 36 ທ່ານ ຍິງ 10 ທ່ານ. ການຝຶກອົບຮົມກົດໝາຍ 45 ວັນ ຊຸດທີ IX ໄດ້ເລີ່ມເປີດການຮຽນ-ການສອນ ແຕ່ວັນທີ 17 ກໍລະກົດ 2025 ຫາວັນທີ 17 ກັນຍາ 2025 ແມ່ນສໍາເລັດການຮຽນ-ການສອນທັງໝົດ 32 ວິຊາ ຕາມຫຼັກສູດ (ແຍກ ຕາມກົດໝາຍ 41 ກົດໝາຍ), ລວມເປັນ 21.5 ໜ່ວຍກິດ, 301 ຊົ່ວໂມງ. ຈາກນັ້ນ ຜູ້ເຂົ້າຮ່ວມຮັບຟັງການຜ່ານຂໍ້ຕົກລົງຂອງຫົວໜ້າສະຖາບັນຍຸຕິທໍາພາກເໜືອແຂວງຫຼວງພະບາງ, ພ້ອມທັງມອບໃບຢັ້ງຢືນໃຫ້ນັກຝຶກອົບຮົບກົດໝາຍຂັ້ນພື້ນຖານລະບົບບໍາລຸງ 45 ວັນ, ມອບໃບຍ້ອງຍໍໃຫ້ຄະນະຮັບຜິດຊອບ, ຄູ-ອາຈານ, ນັກຝຶກອົບຮົມ ແລະ ມອບໃບສົມມະນາບຸນຄຸນ ເປັນກຽດມອບຂອງທ່ານ ເພັດພິໄຊ ສູນວິໄລ ຮອງເຈົ້າແຂວງໄຊຍະບູລີ, ທ່ານ ບຸນລ້ຽງ ດວງສົມພອນ ຫົວໜ້າພະແນກຍຸຕິທໍາແຂວງໄຊຍະບູລີ ຜັດປ່ຽນຂຶ້ນມອບ. ໃນຕອນທ້າຍໄດ້ຮັບຟັງການມີຄໍາເຫັນໂອ້ລົມຂອງທ່ານ ເພັດພິໄຊ ສູນວິໄລ ຮອງເຈົ້າແຂວງໄຊຍະບູລີ ຕື່ມອີກ.
ຂ່າວ+ພາບ: ຄໍາໝ້ນ