ຮອງເລຂາພັກແຂວງໄຊຍະບູລີໂອ້ລົມພະນັກງານ-ນັກຮົບ ກອງພັນນ້ອຍທີ 2.
…………………………….
ໃນວັນທີ 17 ພຶດສະພາ 2024 ຜ່ານມານີ້, ທ່ານ ດວງຕາ ໄຊວຸດ ຮອງເລຂາພັກແຂວງໄຊຍະບູລີ ໄດ້ລົງຢ້ຽມຢາມ ແລະ ພົບປະໂອ້ລົມຄະນະພັກ-ຄະນະບັນຊາ, ພະນັກງານ-ນັກຮົບ ກອງພັນນ້ອຍທີ 2 ຂື້ນກັບກອງພັນໃຫຍ່ 202 ກອງພົນທີ 2 ໂດຍມີຄະນະພັກ-ຄະນະບັນຊາ ປກຊ-ປກສ ແຂວງ, ຫ້ອງການ, ຄະນະພັກ-ຄະນະບັນຊາກອງພັນໃຫຍ່, ຄະນະພັກ-ຄະນະບັນຊາກອງພັນນ້ອຍຕະຫຼອດຮອດພະນັກງານ-ນັກຮົບທົ່ວກອງພັນນ້ອຍທີ 2 ເຂົ້າຮ່ວມ.
ສະຫາຍ ພັນໂທ ແກ້ວປະເສີດ ບົວລະພາ ຫົວໜ້າການເມືອງ ກອງພັນນ້ອຍທີ 2 ໄດ້ລາຍງານໂດຍຫຍໍ້ປະຫວັດຄວາມເປັນມາ, ທີ່ຕັ້ງ ພາລະບົດບາດສິດໜ້າທີ່ຄວາມຮັບຜິດຊອບ, ການເຄື່ອນໄຫວໜ້າທີ່ການເມືອງຂອງກົມກອງ, ໃນໄລຍະຜ່ານມາເຊິ່ງຄະນະພັກ-ຄະນະບັນຊາໄດ້ຖືເອົາວຽກງານສຶກສາອົບຮົມການເມືອງນຳພາແນວຄິດໃຫ້ພະນັກງານ-ນັກຮົບເປັນສຳຄັນ, ຈັດຕັ້ງກຳລັງອອກເຄື່ອນໄຫວກວດກາສາລາເວຕາມຂອບເຂດຮັບຜິດຊອບຂອງກົມກອງເປັນປົກກະຕິ, ເອົາໃຈໃສ່ຫັນທິດລົງກໍ່ສ້າງຮາກຖານກັບອຳນາດການປົກຄອງທ້ອງຖີ່ນ ໂດຍສະເພາະແມ່ນບ່ານຫາດຮ່ອມ ເພື່ອກຳແໜ້ນສະພາບການເຄື່ອນໄຫວຂອງກຸ່ມຄົນບໍ່ຫວັງດີຢູ່ພື້ນຖານບ້ານປະຊາຊົນ, ຜ່ານການຈັດຕັ້ງລົງເຄື່ອນໄຫວສາມາດເຮັດໃຫ້ສະພາບໃນຂອບເຂດກົມກອງຮັບຜິດຊອບມີຄວາມສະຫງົບໂດຍພື້ນຖານ.
ໂອກາດນີ້, ທ່ານ ດວງຕາ ໄຊວຸດ ກໍໄດ້ໂອ້ລົມກ່ອນອື່ນສະຫາຍໄດ້ສະແດງຄວາມຍ້ອງຍໍຊົມເຊີຍຜົນງານທີ່ກອງພັນນ້ອຍທີ 2 ຍາດມາໄດ້ໃນຜ່ານມາ ແລະ ເນັ້ນໜັກໃຫ້ຄະນະພັກ-ຄະນະບັນຊາເປັນເຈົ້າການໃນການສຶກສາອົບຮົມການເມືອງ-ແນວຄິດໃຫ້ພະນັກງານ-ນັກຮົບມີແນວຄິດໜັກແໜ້ນເຂັ້ມແຂງ, ມີຄວາມບໍລິສຸດຈົງຮັກພັກດີຕໍ່ພັກ, ຕໍ່ລັດ, ຕໍ່ປະເທດຊາດ, ມີຄວາມຮັບຮູ້ເຊື່ອມຊຶມເຂົ້າໃຈແຈ້ງຕໍ່ແນວທາງນະໂຍບາຍຂອງພັກ, ກົດໝາຍຂອງລັດ, ຂໍ້ກຳນົດກົດລະບຽບຂອງກອງທັບ ກໍຄືຂອງກົມກອງວາງອອກ, ເພີ່ມທະວີວຽກງານກຽມພ້ອມສູ້ຮົບໃຫ້ເປັນລະບົບຄົບຊຸດ, ປັບປຸງແບບແຜນວິທີນຳພາ-ບັນຊາຕາມຫຼັກການລວມສູນປະຊາທິປະໄຕເຮັດວຽກເປັນໝູ່ຄະ ນະແບ່ງຄວາມຮັບຜິດຊອບໃຫ້ບຸກຄົນ, ເອົາໃຈໃສ່ຮັດແໜ້ນຄວາມສາມັກຄີພາຍໃນ ພາຍນອກໃຫ້ແໜ້ນແຟ້ນ, ຄຽງຄູ່ກັນນັ້ນກໍຕ້ອງເອົາໃຈໃສ່ສ້າງພະລາທິການແກ້ໄກຊີວິດການເປັນຢູ່ຂອງກົມກອງໃຫ້ດີຂຶ້ນ, ພ້ອມກັນເຮັດສຳເລັດໜ້າທີ່ ທີ່ພັກ-ລັດຂັ້ນເທິງມອບໝາຍໃຫ້ດ້ວຍຜົນສຳເລັດອັນຈົບງາມ. ໃນໂອກາດ ການລົງມາຢ້ຽມຢາມ ກອງພັນທີ 2 ຄັ້ງນີ້, ມີຫຼາຍພາກສ່ວນໄດ້ນຳເອົາກະຕ່າຂອງຂວັນມາອອຍພອນແດ່ ຄະນະພັກ-ຄະນະບັນຊາພະນັກງານ-ນັກຮົບກອງພັນນ້ອຍທີ 2 ເນື່ອງໃນໂອກາດສະຫຼອງ ວັນຜ່າວົງປິດລ້ອມຂອງກອງພັນທີ 2 ວິລະຊົນທີ່ທົ່ງໄຫຫີນ-ຊຽງຂວາງ ຄົບຮອບ 65 ປີ.
…………………………
ພາບ-ຂ່າວ : ຄຳຊາຍ ກວ່າງຄຸນສີ.