ເມືອງແກ່ນທ້າວ ແຂວງໄຊຍະບູລີ ປິດຊຸດຝຶກອົບຮົມກົດໝາຍຂັ້ນພື້ນຖານລະບົບບໍາລຸງ 45 ວັນ ໃຫ້ການຈັດຕັ້ງບ້ານ.
………………………………
ພິທີ ປິດຊຸດຝຶກອົບຮົມກົດໝາຍຂັ້ນພື້ນຖານລະບົບບໍາລຸງ 45 ວັນ ຊຸດທີ III ໃຫ້ການຈັດຕັ້ງບ້ານ ເມືອງແກ່ນທ້າວ ແຂວງໄຊຍະບູລີ ໄດ້ຈັດຂຶ້ນໃນຕອນເຊົ້າວັນທີ 29 ພຶດສະພາ 2024 ນີ້, ຢູ່ທີ່ສະໂມສອນຫ້ອງວ່າການເມືອງ. ໂດຍການເປັນກຽດເຂົ້າຮ່ວມຂອງທ່ານ ອໍາຄາ ລັດສະໝີ ກໍາມະການພັກແຂວງ, ເລຂາພັກເມືອງ, ເຈົ້າເມືອງແກ່ນທ້າວ, ມີກໍາມະການປະຈໍາພັກເມືອງ, ກໍາມະການພັກເມືອງ, ຫົວໜ້າ, ຮອງຫ້ອງການ, ກົມກອງ, ອົງການຈັດຕັ້ງ, ລັດວິສາຫະກິດ, ດ່ານສາກົນ, ຄະນະຮັບຜິດຊອບການຝຶກອົບຮົມ, ຄູ-ອາຈານ, ນາຍບ້ານເທດສະບານເມືອງ ແລະ ນັກສໍາມະນາກອນເຂົ້າຮ່ວມຢ່າງພ້ອມພຽງ.
ທ່ານ ປະເສີດ ອິນວົງຄໍາ ຮອງເລຂາພັກເມືອງ, ຫົວໜ້າຄະນະຮັບຜິດຊອບການຝຶກອົບຮົມກົດໝາຍ 45 ວັນ ຊຸດທີ III ໃຫ້ອົງການປົກຄອງບ້ານ ໄດ້ຜ່ານບົດສະຫຼຸບການຝຶກອົບຮົມກົດໝາຍ 45 ວັນ ຕໍ່ພິທີວ່າ: ໂດຍປະຕິບັດຕາມຂໍ້ຕົກລົງທ່ານເຈົ້າເມືອງ ສະບັບເລກທີ 291 ລົງວັນທີ 19 ມີນາ 2024 ວ່າດ້ວຍການອະນຸມັດເປີດການຝຶກອົບຮົມກົດໝາຍ 45 ວັນ, ຊຸດທີ III ໃຫ້ອົງການປົກຄອງບ້ານນ ວັນທີ 20 ມີນາ 2024 ໄດ້ຈັດພິທີ ເປີດຊຸດຝຶກອົບຮົມກົດໝາຍ 45 ວັນ ຂື້ນຢ່າງເປັນທາງການ ແລະ ເລີ່ມຕົ້ນຂື້ນຫ້ອງສິດສອນ ມາແຕ່ວັນທີ 25 ມີນາ 2024 ມີຄູ-ອາຈານມາຂື້ນສອນທັງໝົດ 33 ທ່ານ, ຍິງ 6 ທ່ານ. ໃນນີ້, ການນຳຂັ້ນເມືອງ 4 ທ່ານ, ຍິງ 1 ທ່ານ, ໄອຍະການ ແລະ ສານປະຊາຊົນເຂດ II ແຂວງໄຊຍະບູລີ 2 ທ່ານ, ຫ້ອງການຍຸຕິທຳເມືອງ 7 ທ່ານ, ຍິງ 2 ທ່ານ ແລະ ຫ້ອງການທີ່ກ່ຽວຂ້ອງ 22 ທ່ານ, ຍິງ 2 ທ່ານ, ມີວິຊາຮຽນທັງໝົດ 34 ວິຊາ, ມີ 34 ໝ່ວຍກິດ, ມີ 352 ຊົ່ວໂມງ, ມີຜູ້ເຂົ້າຮຽນທັງໝົດ 33 ທ່ານ, ຍິງ 7 ທ່ານ. ຜ່ານການຮຽນ ແລະ ສອບເສັງ ໄດ້ຄະແນນສະເລ່ຍ 8,5 ຈຳນວນ 1 ທ່ານ, ຄະແນນສະເລ່ຍ 8,4 ຈໍານວນ 7 ທ່ານ, ຄະແນນສະເລ່ຍ 8,3 ຈໍານວນ 4 ທ່ານ, ຄະແນນສະເລ່ຍ 8,2 ຈໍານວນ 5 ທ່ານ, ຄະແນນສະເລ່ຍ 8,1 ຈໍານວນ 2 ທ່ານ, ຄະແນນສະເລ່ຍ 8,0 ຈໍານວນ 5 ທ່ານ, ຄະແນນສະເລ່ຍ 7,9 ຈຳນວນ 2 ທ່ານ, ຄະແນນສະເລ່ຍ 7,7 ຈຳນວນ 4 ທ່ານ ແລະ ຄະແນນສະເລ່ຍ 7.6 ຈໍານວນ 3 ທ່ານ. ຈາກນັ້ນ, ທ່ານ ສຸພິດ ໂຮມຊັບ ກໍາມະການພັກເມືອງ ຫົວໜ້າຫ້ອງການຍຸຕິທໍາເມືອງ ໄດ້ຜ່ານຂໍ້ຕົກລົງຂອງຫົວໜ້າສະຖາບັນຍຸຕິທໍາພາກເໝືອ ສາຂາ ຫຼວງພະບາງ ວ່າດ້ວຍການມອບໃບຢັ້ງຢືນໃຫ້ແກ່ຜູ່ສໍາເລັດການຝຶກອົບຮົມກົດໝາຍຂັ້ນພື້ນຖານ ລະບົບ 45 ວັນ ຊຸດທີ III ໃຫ້ການຈັດຕັ້ງບ້ານ ຂອງເມືອງແກ່ນທ້າວ ແລະ ທ່ານ ອໍາຄາ ລັດສະໝີ ເຈົ້າເມືອງແກ່ນທ້າວ ໄດ້ກຽດມອບໃບຢັ້ງຢືນ ໃຫ້ນັກສໍາມມະນາກອນ ຢ່າງສົມກຽດ.
ຕອນທ້າຍ ທ່ານ ອໍາຄາ ລັດສະໝີ ເຈົ້າເມືອງແກ່ນທ້າວ ຍັງໄດ້ມີຄໍາເຫັນໂອ້ລົມ ເຊິ່ງທ່ານໄດ້ສະແດງຄວາມຍ້ອງຍໍຊົມເຊີຍ ແລະ ມີຄໍາເຫັນໃຫ້ນັກສໍາມະນາກອນ ນຳເອົາ ບົດຮຽນ ແລະ ປະສົບການຄັ້ງນີ້ ໄປຈັດຕັ້ງຜັນຂະຫຍາຍຢູ່ໃນທ້ອງຖິ່ນຮາກຖານບ້ານ ຂອງຕົນໃຫ້ໄດ້ຮັບຜົນດີ ໂດຍສະເພາະແມ່ນປະກອບສ່ວນເຂົ້າໃນການແກ້ໄຂ, ໄກ່ເກ່ຍຂໍ້ຂັດແຍ່ງຕ່າງໆ ດ້ວຍຄວາມປານີປານອມ ບົນພື້ນຖານຕາມລະບຽບກົດໝາຍ ແລະ ມີຄວາມຍຸຕິທຳ, ສືບຕໍ່ເຄື່ອນໄຫວວຽກງານ ຊ່ວຍວຽກອົງການປົກຄອງບ້ານດ້ວຍຄວາມຂະຫຍັນຂັນແຂງ, ມີຄວາມຮັບຜິດຊອບສູງ, ເຮັດວຽກຕາມພາລະບົດບາດຂອງຕົນ ທີ່ໄດ້ຮັບການມອບໝາຍຈາກການຈັດຕັ້ງບ້ານໃຫ້ມີຜົນສຳເລັດ, ເປັນເສນາທິການໃຫ້ວຽກງານຈັດຕັ້ງປະຕິບັດກົດໝາຍຢູ່ຂັ້ນບ້ານຂອງຕົນ ເປັນຕົ້ນແມ່ນ: ການເຂົ້າຮ່ວມໄກ່ເກ່ຍແກ້ໄຂບັນຫາຕ່າງຕ່າງຢູ່ພາຍໃນບ້ານ ຕາມການມອບໝາຍຂອງການຈັດຕັ້ງບ້ານ ເມື່ອຮຽນຮູ້ກົດໝາຍແລ້ວ ຕ້ອງເປັນແບບຢ່າງໃຫ້ແກ່ພໍ່ແມ່ປະຊາຊົນ ໃນການປະຕິບັດກົດໝາຍຂອງລັດ, ລະບຽບຂອງບ້ານ ໃຫ້ເຂັ້ມງວດ ແລະ ມີຜົນສັກສິດ ແລະ ໃຫ້ຫ້ອງການຍຸຕິທຳເມືອງ ສືບຕໍ່ເອົາໃຈໃສວຽກງານຍຸຕິທຳຮາກຖານ, ປັບປຸງຄະນະແກ້ໄຂຂໍ້ຂັດແຍ່ງຂໍ້ຂັດແຍ່ງຂັ້ນບ້ານ, ສຶບຕໍ່ເຄື່ອນໄຫວລົງໂຄສະນາເຜີຍແຜ່ກົດໝາຍຕ່າງໆ ໃຫ້ປະຊາຊົນແຕ່ລະເຂດພັດທະນາ, ກຸ່ມບ້ານ, ແຕ່ລະບ້ານເປັນລະບົບຕໍ່ເນື່ອງ ແລະ ທົ່ວເຖິງ ເພື່ອຍົກສູງສະຕິໃນການເຄົາລົບລະບຽບກົດໝາຍຂອງລັດ ເພື່ອສະກັດກັ້ນປະກົດການຫຍໍ້ທໍ້ທີ່ເຄີຍເກີດຂື້ນທີ່ຜ່ານມາໃຫ້ລົດນ້ອຍຖອຍລົງ, ເຮັດໃຫ້ສັງຄົມມີຄວາມສະຫງົບປອດໄພ.
……………………….
ຂ່າວ: ແກ່ນທ້າວ.
#News.XBL