ເມືອງໄຊຍະບູລີປາຖະກະຖາ 4 ວັນປະຫວັດສາດ.
………………………………
ໃນຕອນເຊົ້າວັນທີ 20 ພຶດສະພາ 2024 ນີ້ ຢູ່ທີ່ຫ້ອງປະຊຸມ ຫ້ອງວ່າການເມືອງໄຊຍະບູລີ ໄດ້ຈັດພິທີປາຖະກະຖາ 4 ວັນປະຫວັດສາດ ຂອງພັກ-ຂອງຊາດ ແລະ ຂອງສາກົນ ຄື: ວັນຜ່າວົງປິດລ້ອມຂອງກອງພັນທີ 2 ວິລະຊົນ ທີ່ທົ່ງໄຫຫີນຊຽງຂວາງ ຄົບຮອບ 65 ປີ (18 ພຶດສະພາ 1959-18 ພຶດສະພາ 2024), ວິລະກໍາໂຕນຄຸກຢ່າງມະຫັດສະຈັນຂອງຜູ້ນໍາພັກ ແລະ ແນວລາວສ້າງຊາດ ຄົບຮອບ 64 ປີ (24 ພຶດສະພາ 1960-24 ພຶດສະພາ 2024), ວັນໄຊຊະນະບັ້ນຮົບດຽນບຽນຟູ ຄົບຮອບ 70 ປີ (7 ພຶດສະພາ 1954-7 ພຶດສະພາ 2024),ວັນເກີດປະທານໂຮ່ຈີ່ມິນ ຄົບຮອບ 134 ປີ (19 ພຶດສະພາ 1890-19 ພຶດສະພາ 2024) ໂດຍການເປັນກຽດເຂົ້າຮ່ວມ ແລະ ໃຫ້ກຽດປາຖະກະຖາຂອງທ່ານ ເສນ ພັນລັກ ເລຂາຄະນະບໍລິຫານງານພັກເມືອງ ວ່າການເຈົ້າເມືອງ ໄຊຍະບູລີ, ມີບັນດາຄະນະປະຈໍາພັກເມືອງ, ກໍາມະການພັກເມືອງ, ຫົວໜ້າ, ຮອງຫົວໜ້າຫ້ອງການ, ພະນັກງານວິຊາການ ພ້ອມດ້ວຍ ເລຂາໜ່ວຍພັກບ້ານເຂົ້າຮ່ວມ.
ໃນພິທີທ່ານ ເສນ ພັນລັກ ເລຂາຄະນະບໍລິຫານງານພັກເມືອງ ວ່າການເຈົ້າເມືອງ ໄຊຍະບູລີໄດ້ໃຫ້ກຽດຂຶ້ນປາຖະກະຖາເລົ່າຄືນມູນເຊື້ອ 4 ວັນ ປະຫວັດສາດຂອງພັກ, ຂອງຊາດ ເຊິ່ງທ່ານໄດ້ຍົກໃຫ້ເຫັນເຖິງສະພາບການຖືກປິດລ້ອມຂອງກອງພັນທີ 2 ເຊິ່ງໄດ້ສ່ອງແສງໃຫ້ເຫັນວ່າການນໍາພາຂອງພັກຖືກຕ້ອງສະຫຼາດສ່ອງໃສ ການຜ່າວົງປິດລ້ອມຂອງກອງພັນທີ 2 ແມ່ນໄຊຊະນະອັນໃຫຍ່ຫຼວງຂອງກໍາລັງປະກອບອາວຸດທີ່ຢູ່ໃຕ້ການນໍາພາຂອງພັກ ເປັນເຫດການປະຫວັດສາດອັນສໍາຄັນຂອງຊາດ, ຂອງພັກ, ຂອງກອງທັບເຮົາ ແລະ ເປັນບົດຮຽນອັນລໍ້າຄ່າທີ່ສຸດໃຫ້ແກ່ຂະບວນການຕໍ່ສູ້ຂອງກອງທັບ ແລະ ປະຊາຊົນເຮົາຍາດເອົາໄຊຊະນະໃນໄລຍະຕໍ່ມາ, ສະແດງໃຫ້ເຫັນເຖິງຄວາມບໍລິສຸດຜຸດຜ່ອງ ຄວາມຈົ່ງຮັກພັກດີ, ຄວາມສາມັກຄີເປັນຈິດໜຶ່ງໃຈດຽວ ເພື່ອຕີເອົາຊະນະກັບຈັກກະພັດອາເມລິກາ ແລະ ລູກແຫຼ້ງຕີນມື ພ້ອມດຽວກັນນັ້ນກໍ່ເຮັດໃຫ້ກໍາລັງປະຕິວັດ ໂດຍສະເພາະແມ່ນກໍາລັງປະກອບອາວຸດຂອງປະຊາຊົນນັບມື້ເຕີບໃຫຍ່ຂະຫຍາຍຕົວ ແລະ ເຂັ້ມແຂງ ເຮັດໃຫ້ຊື່ສຽງອິດທິພົນຂອງກໍາລັງຝ່າຍປະຕິວັດ ນັບມື້ນັບພົ້ນເດັ່ນຂຶ້ນ. ຮັບຟັງ ວິລະກໍາໂຕນຄຸກຢ່າງມະຫັດສະຈັນຂອງບັນດາຜູ້ນໍາຂອງພັກ ແລະ ແນວລາວຮັກຊາດ 24/5/1960, ວັນໄຊຊະນະບັນຮົບດຽນບຽນຟູ 7/5/1954 ແລະ ວັນເກີດປະທານໂຮ່ຈີ່ມິນ 19/5/1890 ເຊິ່ງຍົກໃຫ້ເຫັນເຖິງສະພາບການ ແລະ ການເຄື່ອນໄຫວປະຕິວັດຂອງບັນດາຜູ້ນໍາພັກ ແລະ ແນວລາວສ້າງຊາດ ໃນໄລຍະຜ່ານມາການເຄື່ອນໄຫວຂອງບັນດາຜູ້ນໍາປະຕິວັດໃນເວລາຖືກກັກຂັງຢູ່ໃນຄຸກ, ການກະກຽມໂຕນອອກຈາກຄຸກໂພນເຄັງຂອງບັນດາຜູ້ນໍາ, ສາເຫດການໂຕນຄຸກຢ່າງມະຫັດສະຈັນຂອງບັນດາຜູ້ນໍາໄປສູ່ເຂດທີ່ໝັ້ນປະຕິວັດຢ່າງປອດໄພ. ແຜນຍຸດທະສາດປົດປ່ອຍດ່ຽນບ່ຽນຟູຂອງພັກກ່ອມມູນິດຫວຽດນາມໂດຍສະເພາະແມ່ນທີ່ຕັ້ງຍຸດທະສາດດຽນບຽນຟູ ໃນການປົດປ່ອຍດ່ຽນບຽນຟູ, ຄວາມໝາຍຄວາມສໍາຄັນຂອງດຽນບຽນຟູ, ຍົກໃຫ້ເຫັນກ່ຽວກັບຊີວິດ ແລະ ການເຄື່ອນໄຫວປະຕິວັດຂອງປະທານໂຮ່ຈີ່ມິນ. ທັງນີ້ກໍ່ເພື່ອເຮັດໃຫ້ພະນັກງານ-ລັດຖະກອນ ໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງ ກ່ຽວກັບມູນເຊື້ອ ຂອງ 4 ວັນປະຫວັດສາດດັ່ງກ່າວ ກ່ຽວກັບປະຫວັດສາດມູນເຊື້ອແຫ່ງການນໍາພາຕໍ່ສູ້ກູ້ຊາດຕ້ານສັດຕູຢ່າງພິລະອາດຫານຂອງບັນພະບູລຸດເພື່ອນໍາໄປພັດທະນາຕົນເອງກໍ່ຄືການພັດທະນາປະເທດຊາດໃຫ້ດີຂຶ້ນກວ່າເກົ່າ.
…………………………..
ຂ່າວ-ພາບ: ສົມພົງ ສີສະຫັວດ.
#News.XBL