ກອງປະຊຸມໃຫຍ່ຄັ້ງທີ VI ຂອງອົງຄະນະພັກ ເມືອງ ຄອບ, ແຂວງ ໄຊຍະບູລີ ໄດ້ໄຂຂຶ້ນຢ່າງເປັນທາງການໃນຕອນເຊົ້າວັນທີ 17 ກຸມພາ 2025, ທີ່ຫ້ອງປະຊຸມໃຫຍ່ຂອງເມືອງ, ໂດຍການເປັນປະທານຂອງ ສະຫາຍ ສົມນຶກ ສິງຄໍາ ວ່າການເລຂາພັກເມືອງ, ວ່າການເຈົ້າເມືອງ-ເມືອງ ຄອບ, ເຂົ້າຮ່ວມເປັນກຽດມີ ສະຫາຍ ພົງສະຫວັນ ສິດທະວົງ ກໍາມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງ ໄຊຍະບູລີ, ມີຄະນະປະຈຳພັກແຂວງ, ກຳມະການພັກແຂວງ, ມີໜ່ວຍປະຕິບັດງານຂອງແຂວງ, ມີຄະນະປະຈຳພັກເມືອງ, ກຳມະການພັກເມືອງ, ມີພະນັກງານອາວຸໂສບຳນານ, ນັກທຸລະກິດ, ຜູ້ປະກອບການ, ແຂກຮັບເຊີນຈາກເມືອງອ້ອມຂ້າງ, ມີຜູ້ແທນສົມບູນເຂົ້າຮ່ວມ 101 ສະຫາຍ, ຍິງ 15 ສະຫາຍ ທີ່ເປັນຕົວແທນໃຫ້ແກ່ສະມາຊິກພັກໃນທົ່ວເມືອງ 851 ສະຫາຍ.
ສະຫາຍ ສົມນຶກ ສິງຄໍາ ວ່າການເລຂາພັກເມືອງ ໄດ້ກ່າວໄຂກອງປະຊຸມຢ່າງເປັນທາງການໂດຍກ່າວວ່າ: ກອງປະຊຸມຄັ້ງນີ້ຈະໄດ້ພ້ອມກັນທົບທວນຕີລາຄືນຜົນງານ ແລະ ໄຊຊະນະທີ່ຍາດມາໄດ້, ຈຸດອ່ອນຂໍ້ຄົງຄ້າງ ແລະ ສະຫຼຸບຖອດຖອນບົດຮຽນໃນການຈັດຕັ້ງປະຕິບັດແນວທາງນະໂຍບາຍຂອງພັກ ແລະ ມະຕິຜູ້ແທນອົງຄະນະພັກຄັ້ງທີ V ໃນໄລຍະ 5 ປີຜ່ານມາ, ພ້ອມທັງກໍານົດທິດທາງຄາດໝາຍຍຸດທະສາດແຕ່ລະດ້ານໃນການປົກປັກຮັກສາ ແລະ ພັດທະນາເມືອງ ຄອບ ແຕ່ນີ້ຮອດປີ 2029, ຈາກນັ້ນ ສະຫາຍ ໄລ ອິນທີບ ຮອງເລຂາພັກເມືອງ ໄດ້ຜ່ານຮ່າງແຜນພັດທະນະເສດຖະກິດ-ສັງຄົມ 5 ປີຜ່ານມາ ແລະ ທິດທາງແຜນການ 5 ປີຕໍ່ໜ້າ, ເຊິ່ງເສດຖະກິດໂດຍລວມຂອງເມືອງ ມີການຂະຫຍາຍຕົວຢ່າງຕໍ່ເນື່ອງຢູ່ໃນລະດັບສະເລ່ຍ 6,2% ຕໍ່ປີ ໃນນີ້: ກະສິກຳຂະຫຍາຍຕົວ 5,3%, ອຸດສາຫະກໍາຂະຫຍາຍຕົວ 7,6%, ບໍລິການຂະຫຍາຍຕົວ 12,2%, ລວມຍອດມູນຄ່າຜົນຜະລິດພາຍໃນບັນລຸ 498,6 ຕື້ກີບ ສະເລ່ຍຕໍ່ຫົວຄົນໄດ້ 22,6 ລ້ານກີບ ເທົ່າກັບ 1.113 ໂດລາສະຫະລັດ ທຽບໃສ່ຄາດໝາຍປະຕິບັດໄດ້ 82,6%; ກອງປະຊຸມໄດ້ຮັບຟັງການ ປະກອບຄຳຄິດຄຳເຫັນຈາກພາກສ່ວນຕ່າງໆ ເພື່ອສະແດງໃຫ້ເຫັນເຖິງຄວາມເປັນເອກະພາບຕໍ່ບົດລາຍງານການເມືອງ, ແຜນພັດທະນາເສດຖະກິດ-ສັງຄົມ ແລະ ຜົນສຳເລັດແຫ່ງການຜັນຂະຫຍາຍ ແລະ ຈັດຕັ້ງປະຕິບັດມະຕິກອງປະຊຸມໃຫຍ່ ຂອງຕົນໃຫ້ມີເນື້ອໃນສົມບູນຂຶ້ນ. ຜູ້ແທນກອງປະຊຸມ ຍັງໄດ້ພ້ອມກັນໃຊ້ສິດປະຊາທິປະໄຕຂອງຕົນ ປ່ອນບັດເລືອກຕັ້ງເອົາຄະນະບໍລິຫານງານພັກເມືອງ ຊຸດໃໝ່, ຮັບຟັງການໂອ້ລົມ ຂອງສະຫາຍ ພົງສະຫວັນ ສິດທະວົງ ກຳມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງໄຊຍະບູລີຕື່ມອີກ
ຂ່າວ-ພາບໂດຍ: ຄະນະໂຄສະນາອົບຮົມແຂວງໄຊຍະບູລີ