ກອງປະຊຸມໄດ້ໄຂໃນຂຶ້ນຕອນເຊົ້າ ວັນທີ 17 ມີນາ 2025 ໂດຍການເປັນປະທານຂອງ ສະຫາຍ ຄໍາຝັ້ນ ວົງສະຫວັນ ຮັກສາການແທນເລຂາພັກເມືອງ, ເຂົ້າຮ່ວມເປັນກຽດມີ ສະຫາຍ ພົງສະຫວັນ ສິດທະວົງ ກໍາມະການສູນກາງພັກ, ເລຂາຄະນະບໍລິຫານງານພັກແຂວງ, ມີຄະນະປະຈຳພັກແຂວງ, ກຳມະການພັກແຂວງ, ຄະນະປະຈຳພັກເມືອງ, ກຳມະການພັກເມືອງ, ມີພະນັກງານອາວຸໂສບຳນານ, ນັກທຸລະກິດ, ຜູ້ປະກອບການ, ຄອບຄົວຕົວແບບ, ແຂກຮັບເຊີນຈາກເມືອງ ແມດ, ເມືອງ ຊະນະຄາມ ແຂວງ ວຽງຈັນ ແລະ ເມືອງອ້ອມຂ້າງ, ມີຜູ້ແທນສົມບູນ 181 ຍິງ 24 ສະຫາຍ, ເຊິ່ງຕາງໜ້າໃຫ້ສະມາຊິກພັກໃນທົ່ວເມືອງ ປາກລາຍ ເຂົ້າຮ່ວມ.
ສະຫາຍ ຄໍາຝັ້ນ ວົງສະຫວັນ ຮັກສາການແທນເລຂາພັກເມືອງ ໄດ້ກ່າວໄຂກອງປະຊຸມຢ່າງເປັນທາງການວ່າ: ກອງປະຊຸມໃຫຍ່ຜູ້ແທນອົງຄະນະພັກເມືອງ ຈະໄດ້ພ້ອມກັນສຸມໃສ່ພິຈາລະນາຮັບຮອງເອົາບົດລາຍງານການເມືອງທັງສອງພາກ, ແຜນພັດທະນາເສດຖະກິດ-ສັງຄົມ 5 ປີຜ່ານມາ ແລະ ວາງທິດທາງຄາດໝາຍສູ້ຊົນໃນຊຸມປີຕໍ່ໜ້າ (2024-2029), ຮັບຟັງການປະກອບຄຳຄິດຄຳເຫັນຈາກບັນດາພາກສ່ວນຕ່າງໆ, ຄອບຄົວຕົວແບບ ແລະ ບັນດາເມືອງອ້ອມຂ້າງ, ຮັບຟັງບົດສຳຫຼວດການນຳພາລວມຂອງອົງຄະນະພັກເມືອງ ປາກລາຍສະໄໝທີ VIII, ກອງປະຊຸມຈະໄດ້ພ້ອມກັນດຳເນີນການປ່ອນບັດເລືອກຕັ້ງເອົາຄະນະບໍລິຫານງານພັກເມືອງຊຸດໃໝ່, ເລືອກເອົາຜູ້ແທນເພຶ່ອເປັນຕົວແທນຂອງອົງຄະນະພັກເມືອງ ໄປຮ່ວມກອງປະຊຸມໃຫຍ່ຜູ້ອົງຄະນະພັກແຂວງຄັ້ງທີ VIII, ເລືອກເອົາຄະນະປະຈໍາພັກ, ເລຂາ, ຮອງເລຂາ, ປະທານ ແລະ ຮອງຄະນະປະທານກວດກາພັກ, ພິເສດກອງປະຊຸມໃຫຍ່ຄັ້ງນີ້ຍັງຈະໄດ້ຮັບຟັງການໂອ້ລົມຈາກ ສະຫາຍ ພົງສະຫວັນ ສິດທະວົງ ກຳມະການສູນກາງພັກ ເລຂາຄະນະບໍລິຫານງານພັກແຂວງ, ເຊິ່ງຈະເປັນທິດຊີ້ນໍາ ທາງດ້ານແນວຄິດ-ທິດສະດີ, ພຶດຕິກຳຕົວຈິງໃຫ້ແກ່ຄະນະບໍລິຫານງານພັກເມືອງຊຸດໃໝ່ ແລະ ຜູ້ແທນກອງປະຊຸມໃນການປະຕິບັດໜ້າທີ່ວຽກງານກໍ່ຄືການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງນີ້ໃຫ້ປະກົດຜົນເປັນຈິງ, ຈາກນັ້ນສະຫາຍ ບຸນສົງ ລາດສະວົງ ຮອງເລຂາພັກເມືອງ ໄດ້ຂຶ້ນຜ່ານແຜນພັດທະນາເສດຖະກິດ-ສັງຄົມ, ໂດຍລວມແລ້ວເສດຖະກິດຂະຫຍາຍຕົວສະເລ່ຍ 6,6%ໃນນີ້: ກະສິກຳ ຂະຫຍາຍຕົວ 5,27%, ອຸດສາຫະກໍາຂະຫຍາຍຕົວ 7,63%, ການບໍລິການຂະຫຍາຍຕົວ 7,83%, ລວມຍອດຜົນຜະລິດທັງໝົດບັນລຸ 2.416 ຕື້ກວ່າກີບ, ສະເລ່ຍຕໍ່ຫົວຄົນໄດ້ 30 ລ້ານກວ່າກີບ,ກອງປະຊຸມຈະໄດ້ດໍາເນີນເປັນເວລາ 2 ວັນຈຶງສໍາເລັດ.
ຂ່າວ-ພາບ: ອຸ່ນເຮືອນ ໂພທິລັກ