ກອງປະຊຸມໄດ້ໄຂຂຶ້ນໃນຕອນເຊົ້າ ວັນທີ 1 ເມສາ 2025 ໂດຍການເປັນປະທານຂອງ ສະຫາຍ ທະວີສັກ ໄຊຍະວົງ, ເລຂາຄະນະບໍລິຫານງານພັກເມືອງ, ເຂົ້າຮ່ວມເປັນກຽດມີ ສະຫາຍ ພົງສະຫວັນ ສິດທະວົງ ກໍາມະການສູນກາງພັກ, ເລຂາຄະນະບໍລິຫານງານພັກແຂວງ, ມີຄະນະປະຈຳພັກແຂວງ, ກຳມະການພັກແຂວງ, ຄະນະປະຈຳພັກເມືອງ, ກຳມະການພັກເມືອງ, ມີພະນັກງານອາວຸໂສບຳນານ, ນັກທຸລະກິດ, ຜູ້ປະກອບການ, ຄອບຄົວຕົວແບບ, ແຂກຮັບເຊີນຈາກເມືອງ ປາກແບງ ແຂວງ ອຸດົມໄຊ ແລະ ເມືອງອ້ອມຂ້າງ, ມີຜູ້ແທນສົມບູນ 95 ຍິງ 10 ສະຫາຍ, ເຊິ່ງເປັນຕົວແທນໃຫ້ສະມາຊິກພັກໃນທົ່ວເມືອງ 1.080 ສະຫາຍເຂົ້າຮ່ວມ.
ສະຫາຍ ທະວີສັກ ໄຊຍະວົງ, ເລຂາພັກເມືອງ ໄດ້ກ່າວໄຂກອງປະຊຸມຢ່າງເປັນທາງການວ່າ: ກອງປະຊຸມໃຫຍ່ຜູ້ແທນອົງຄະນະພັກເມືອງ ຈະໄດ້ພ້ອມກັນສຸມໃສ່ພິຈາລະນາຮັບຮອງເອົາບົດລາຍງານການເມືອງທັງສອງພາກ, ແຜນພັດທະນາເສດຖະກິດ-ສັງຄົມ 5 ປີຜ່ານມາ ແລະ ວາງທິດທາງຄາດໝາຍສູ້ຊົນໃນຊຸມປີຕໍ່ໜ້າ (2024-2029), ຮັບຟັງການປະກອບຄຳຄິດຄຳເຫັນຈາກບັນດາພາກສ່ວນຕ່າງໆ, ຄອບຄົວຕົວແບບ ແລະ ບັນດາເມືອງອ້ອມຂ້າງ, ຮັບຟັງບົດສຳຫຼວດການນຳພາລວມຂອງອົງຄະນະພັກເມືອງ ສະໄໝທີ V, ກອງປະຊຸມຈະໄດ້ພ້ອມກັນດຳເນີນການປ່ອນບັດເລືອກຕັ້ງເອົາຄະນະບໍລິຫານງານພັກເມືອງຊຸດໃໝ່, ເລືອກເອົາຜູ້ແທນເພຶ່ອໄປຮ່ວມກອງປະຊຸມໃຫຍ່ອົງຄະນະພັກແຂວງຄັ້ງທີ VIII, ເລືອກເອົາຄະນະປະຈໍາພັກ, ເລຂາ, ຮອງເລຂາ, ປະທານ ແລະ ຮອງຄະນະປະທານກວດກາພັກ, ພິເສດກອງປະຊຸມໃຫຍ່ຄັ້ງນີ້ຍັງຈະໄດ້ຮັບຟັງການໂອ້ລົມຈາກ ສະຫາຍ ພົງສະຫວັນ ສິດທະວົງ ກຳມະການສູນກາງພັກ ເລຂາຄະນະບໍລິຫານງານພັກແຂວງ, ຈາກນັ້ນສະຫາຍ ທອງພັນ ສຸກສະຫວັດ ຄະນະປະຈໍາພັກເມືອງ ໄດ້ຂຶ້ນຜ່ານແຜນພັດທະນາເສດຖະກິດ-ສັງຄົມ, ໂດຍລວມແລ້ວເສດຖະກິດຂະຫຍາຍຕົວສະເລ່ຍ 5,47% ຕໍ່ປີ, ລວມຍອດມູນຄ່າການຜະລິດທັງໝົດຮອດປີ 2025 ບັນລຸ 576,46 ຕື້ກີບ, ສະເລ່ຍໃສ່ຫົວຄົນບັນລຸໄດ້ 28,85 ລ້ານກີບ, ສາມາດຈັດເກັບລາຍຮັບໄດ້ທັງໝົດ 31,30 ຕື້ກີບ ເທົ່າກັບ 146,58% ໃນນີ້: ສ່ວຍສາອາກອນ 30,19 ຕື້ກີບ ເທົ່າກັບ 147,14%, ຊັບສິນ 1,1 ຕື້ກີບ ເທົ່າກັບ 132,74%, ປະຕິບັດລາຍຈ່າຍໄດ້ 11,41 ຕື້ກີບ ເທົ່າກັບ 93,41%, ປູກພືດສະບຽງອາຫານໄດ້ 1.365,4 ຮຕ, ຜົນຜະລິດ 6,254 ໂຕນ, ພືດທີ່ພົ້ນເດັ່ນແມ່ນ: ພືດຜັກຕ່າງໆ, ສາລີຫວານ, ຜັກບົ່ວ-ຜັກທຽມ, ໝາກເຜັດ-ໝາກເຂືອ ແລະ ພືດອື່ນໆ, ຜະລິດພືດເປັນສິນຄ້າໄດ້ 8.422,85 ຮຕ, ຜົນຜະລິດ 140.980 ໂຕນ,ເປັນຕົ້ນແມ່ນ: ມັນຕົ້ນ , ສາລີແຂງ, ໝາກເດືອຍ ແລະ ຂີງພັນ, ການລ້ຽງສັດ: ແມ່ນໄດ້ຊຸກຍູ້ຊາວກະສິກອນຫັນປ່ຽນການລ້ຽງສັດແບບເກົ່າ ໄປສູ່ການລ້ຽງແບບໃໝ່ທີ່ຕິດພັນກັບເຕັກນິກວິຊາການເຮັດໃຫ້ຝຸງສັດມີການຂະຫຍາຍຕົວເພີ່ມຂຶ້ນ ໃນນັ້ນ: ມີງົວ 16.903 ໂຕ, ຄວາຍ 1,590 ໂຕ, ໝູ 23,260 ໂຕ, ແບ້ 1.575 ໂຕ ແລະ ສັດປີກ 444.343 ໂຕ, ປ່ອຍປາໄດ້ 570.000 ໂຕ/ປີ, ສາມາດຕອບສະໜອງຊີ້ນ, ປາ ແລະ ໄຂ່ ໄດ້ທັງໝົດ 1.090,10 ໂຕນ ສະເລ່ຍໃສ່ຫົວຄົນໜຶ່ງໄດ້ຮັບ 55 ກິໂລ/ຄົນ/ປີ.
ຂ່າວ-ພາບ: ອຸ່ນເຮືອນ ໂພທິລັກ.