ໃນຕອນເຊົ້າວັນທີ 21 ມີນາ 2025 ນີ້ ໄດ້ຈັດພິທີວາງກະຕ່າດອກໄມ້ ຢູ່ທີ່ໜ້າອານຸສອນສະຖານປະທານ ໄກສອນ ພົມວິຫານ ໜ້າຫ້ອງວ່າການແຂວງ ເຊິ່ງນໍາໂດຍທ່ານ ພົງສະຫວັນ ສິດທະວົງ ກໍາມະການສູນກາງພັກ ເລຂາພັກແຂວງ ເຈົ້າແຂວງໄຊຍະບູລີ, ມີບັນດາກໍາມະການປະຈໍາພັກແຂວງ, ກໍາມະການພັກແຂວງ, ຫົວໜ້າພະແນກການ,ອົງການ, ກົມກອງ ເຂົ້າຮ່ວມ.
ໃນໂອກາດອັນມີຄວາມໝາຍຄວາມສໍາຄັນ ທ່ານ ພົງສະຫວັນ ສິດທະວົງ ກໍາມະການສູນກາງພັກ ເລຂາພັກແຂວງ ເຈົ້າແຂວງໄຊຍະບູລີ ຂຶ້ນກ່າວບົດສະດຸດີ ເນື່ອງໃນສະເຫຼີມສະຫຼອງວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 70 ປີ ເຊິ່ງທ່ານກ່າວວ່າ: ເນື່ອງໃນໂອກາດທີ່ມີຄວາມໝາຍຄວາມສໍາຄັນທາງປະຫວັດສາດຂອງຊາດ, ຂອງພັກ ແລະ ຂອງ ປະຊາຊົນລາວບັນດາເຜົ່າ ຄືວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 70 ປີ. ດ້ວຍຄວາມຮູ້ບຸນຄຸນ ຕໍ່ ກັບຜົນງານ, ຄຸນງາມຄວາມດີຂອງ ປະທານ ໄກສອນ ພົມວິຫານ ໃນຖານະນໍາພາຜູ້ກໍ່ຕັ້ງພັກປະຊາຊົນ ປະຕິວັດລາວ, ແມ່ນຜູ້ນຳທີ່ມີຄວາມປີຊາສາມາດສະຫຼາດສ່ອງໃສ, ເປັນບິດາແຫ່ງການປະຕິວັດຂອງລາວ ເຮົາ ປະທານ ໄກສອນ ພົມວິຫານ ໄດ້ເຂົ້າເປັນສະມາຊິກພັກຄອມມູນິດອິນດູຈີນ ໃນວັນທີ 6 ມັງກອນ 1949 ມາຮອດວັນທີ 20 ມັງກອນ ຂອງປີດຽວກັນເພິ່ນໄດ້ນໍາພາສ້າງຕັ້ງກອງລາດຊະວົງຂື້ນ ຊຶ່ງເປັນ ກອງທັບປະຊາຊົນລາວໃນປະຈຸບັນ ແລະ ໄດ້ພ້ອມກັບບັນດາສະຫາຍທີ່ເປັນສະມາຊິກພັກຄອມມູນິດ ອິນດູຈີນ ສ້າງຕັ້ງພັກປະຊາຊົນລາວ ຂຶ້ນໃນວັນທີ 22 ມີນາ 1955 ເພິ່ນໄດ້ຖືກເລືອກຕັ້ງເປັນເລຂາທິການ ໃຫຍ່ ຂອງພັກ, ເປັນເລຂາຄະນະພັກການທະຫານ ແລະ ເປັນຜູ້ບັນຊາການສູງສຸດຂອງບັນດາກຳລັງປະກອບ ອາວຸດປະຕິວັດ. ປີ 1975 ປະທານ ໄກສອນ ພົມວິຫານ ໄດ້ຊີ້ນໍາ-ນໍາພາການລູກຮື້ຂຶ້ນຍຶດອໍານາດໃນທົ່ວ ປະເທດດ້ວຍ 3 ບາດຄ້ອນຍຸດທະສາດ ສະຖາປານາ ສາທາລະນະລັດ ປະຊາທິປະໄຕ ປະຊາຊົນລາວ ຂື້ນຢ່າງ ສະຫງ່າຜ່າເຜີຍ ໃນວັນທີ 2 ທັນວາ ປີ 1975 ດ້ວຍຄວາມປີຊາສາມາດ ແລະ ຜົນງານອັນໃຫຍ່ຫຼວງນັ້ນ. ນັບຕັ້ງແຕ່ມື້ສ້າງຕັ້ງພັກປະຊາຊົນ ປະຕິວັດລາວ ແຕ່ກອງປະຊຸມໃຫຍ່ຄັ້ງທີ I-V ປະທານ ໄກສອນ ພົມວິຫານ ໄດ້ຮັບເລືອກຕັ້ງເປັນເລຂາທິການໃຫຍ່ຂອງພັກ ເພິ່ນເປັນຜູ້ລິເລີ່ມພາລະກິດປ່ຽນແປງໃໝ່ຢ່າງ ມີຫຼັກການ ແລະ ໄດ້ຮັບຜົນສໍາເລັດຢ່າງໃຫຍ່ຫຼວງ ແລະ ໜ້າພາກພູມໃຈ.ນັບແຕ່ມື້ໄດ້ເຄື່ອນໄຫວປະຕິວັດຈົນຮອດມື້ສຸດທ້າຍຂອງຊີວິດ, ເພິ່ນໄດ້ຝຶກຝົນຫຼໍ່ຫຼອມຕົນເອງໃນ ຂະບວນການຕໍ່ສູ້ກູ້ຊາດ ແລະ ການສ້າງສາພັດທະນາປະເທດຊາດ ກວ່າເຄິ່ງສະຕະວັດ ເພິ່ນລ້ວນແຕ່ໄດ້ຮັບ ຄວາມເຄົາລົບຮັກຈາກທົ່ວພັກ, ທົ່ວກຳລັງປະກອບອາວຸດ ແລະ ທົ່ວປວງຊົນລາວທັງຊາດ ໃນສະໄໝຕໍ່ສູ້ກູ້ ຊາດໄດ້ຮ່ວມທຸກ, ຮ່ວມສຸກ, ຮ່ວມເປັນ, ຮ່ວມຕາຍກັບພະນັກງານ, ນັກຮົບ ແລະ ປະຊາຊົນຊັ້ນຄົນຕ່າງໆ, ເພິ່ນໄດ້ເຄື່ອນໄຫວຢ່າງບໍ່ຮູ້ອິດຮູ້ເມື່ອຍ ແລະ ດ້ວຍນໍ້າໃຈເສຍສະຫຼະອັນສູງສົ່ງເພື່ອໄຊຊະນະຂອງພາລະກິດ ປະຕິວັດ, ມາໃນໄລຍະປົກປັກຮັກສາ ແລະ ສ້າງສາພັດທະນາປະເທດຊາດ, ເພິ່ນກໍໄດ້ສືບຕໍ່ອຸທິດຕົນສຸມ ກຳລັງ, ເຫື່ອແຮງ, ສະຕິປັນຍາເຂົ້າໃນການກໍ່ສ້າງບູລະນະລະບອບໃໝ່, ເຮັດໃຫ້ການປະຕິບັດ 2 ໜ້າທີ່ຍຸດ ທະສາດ ດໍາເນີນໄປຢ່າງໜັກແໜ້ນ ປະເທດຊາດໄດ້ຮັບການພັດທະນາ ແລະ ຂະຫຍາຍຕົວຢ່າງຕໍ່ເນື່ອງສໍາລັບແຂວງໄຊຍະບູລີ ຂອງພວກເຮົາຊຶ່ງເປັນແຂວງທີ່ຕັ້ງຢູ່ຝັ່ງຂວາຂອງແມ່ນໍ້າຂອງມີຊາຍແດນ ຍາວ 647 ກິໂລແມັດ ທີ່ຕິດກັບປະເທດທີ່ມີລະບອບການເມືອງແຕກຕ່າງກັນ ດັ່ງນັ້ນ, ຍ້ອນຄວາມເປັນ ຫ່ວງເປັນໄຍ ປະທານ ໄກສອນ ພົມວິຫານ ໄດ້ລົງຊີ້ນໍາຂະບວນການກໍ່ສ້າງຮາກຖານການເມືອງ ຢູ່ແຂວງໄຊຍະບູລີຂອງພວກເຮົາ ເພື່ອແກ້ໄຂ 2 ຂອດອ່ອນຄື: ຂະບວນການອ່ອນ ແລະ ພະນັກງານອ່ອນ, ນັບແຕ່ ມີຂະບວນການຫັນລົງກໍ່ສ້າງຮາກຖານ ຈຶ່ງເຮັດໃຫ້ແຂວງໄຊຍະບູລີຂອງພວກເຮົາ ໄດ້ຮັບການພັດທະນາ ຮອບດ້ານຢ່າງເຂັ້ມແຂງ ແລະ ມີສະຖຽນລະພາບທາງດ້ານການເມືອງຢ່າງໜັກແໜ້ນຕະຫຼອດມາ. ພ້ອມດຽວກັນນີ້ ເພື່ອລະນຶກເຖິງຄຸນງາມຄວາມດີ ແລະ ຈາລຶກບຸນຄຸນນົກຮົບປະຕິວັດທີ່ເສຍສະຫຼະຊີວິດເພື່ອຊາດ, ເພື່ອປະຊາຊົນ ຍັງໄດ້ມີການວາງພວງມາລາຢູ່ອານຸສາວະລີ ນັກຮົບນິລະນາມຂອງແຂວງ ຊຶ່ງມີທັງໝົດ 9 ກ້ອນ.
………………..
ຂ່າວ+ພາບ: ຄະນະໂຄສະນາອົບຮົມແຂວງ