ໃນຕອນເຊົ້າວັນທີ 10 ມິຖຸນາ 2025 ນີ້ ຢູ່ທີ່ຫ້ອງປະຊຸມຫ້ອງວ່າການແຂວງໄຊຍະບູລີ ໄດ້ໄຂກອງປະຊຸມຄົບຄະນະບໍລິຫານງານພັກແຂວງ ຄັ້ງທີ 14 ສະໄໝທີ VII ພາຍໃຕ້ການເປັນປະທານຂອງ ສະຫາຍ ພົງສະຫວັນ ສິດທະວົງ ກໍາມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງໄຊຍະບູລີ, ມີບັນດາທ່ານກໍາມະການປະຈໍາພັກແຂວງ, ຄະນະປະຈໍາສະພາປະຊາຊົນແຂວງ,ກໍາມະການພັກແຂວງ, ເຈົ້າເມືອງ, ຮອງເຈົ້າເມືອງ 11 ເມືອງ,ຫົວໜ້າ, ຮອງຫົວໜ້າພະແນກການ, ກົມກອງ, ອົງການ, ລັດວິສາຫະກິດອ້ອມຂ້າງແຂວງ ພ້ອມດ້ວຍພະນັກງານ-ລັດຖະກອນ ທີ່ກ່ຽວຂ້ອງເຂົ້າຮ່ວມ.
ໃນກອງປະຊຸມ ສະຫາຍ ພົງສະຫວັນ ສິດທະວົງ ກໍາມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງໄຊຍະບູລີ ໄດ້ກ່າວເປີດກອງປະຊຸມ ຊຶ່ງສະຫາຍໄດ້ກ່າວວ່າ: ຕະຫຼອດໄລຍະຜ່ານມາ ເຖິງວ່າສະພາບການຂອງໂລກ ແລະ ພາກພື້ນໄດ້ຜັນແປໄປຢ່າງສັບສົນ ຍາກທີ່ຈະຄາດຄະເນ ບັນຫາການປະທະກັນທາງການທະຫານ, ບັນຫາສົງຄາມການຄ້າໂລກຂອງບັນດາປະເທດມະຫາອໍານາດ, ບັນຫາຂໍ້ພິພາດທາງເຂດແດນຂອງປະເທດອ້ອມຂ້າງ, ບັນດາອິດທິກໍາລັງປໍລະປັກ ແລະ ກຸ່ມຄົນບໍ່ດີຍັງສືບຕໍ່ປະຕິບັດກົນອຸບາຍຫັນປ່ຽນໂດຍສັນຕິ ແນໃສ່ມ້າງເພທໍາລາຍແຂວງພວກເຮົາໃນທຸກດ້ານ, ສະພາບຄວາມຫຍຸ້ງຍາກດ້ານເສດຖະກິດ, ບັນຫາໄພພິບັດທໍາມະຊາດ ບວກກັບການລະບາດຂອງພະຍາດຕ່າງໆ ເຊິ່ງໄດ້ສົ່ງຜົນກະທົບຕໍ່ພາລະກິດປົກປັກຮັກສາ ແລະ ພັດທະນາປະເທດຊາດກໍຄືແຂວງໄຊຍະບູລີ. ແຕ່ເຖິງຢ່າງໃດກໍ່ຕາມ ພາຍໃຕ້ການນໍາພາ-ຊີ້ນໍາຂອງຄະນະບໍລິຫານງານພັກແຂວງ, ຄະນະພັກແຕ່ລະຂັ້ນ ບວກກັບຄວາມເອົາໃຈໃສ່ປະກອບສ່ວນຂອງນັກທຸລະກິດຜູ້ປະກອບການ ແລະ ພໍ່ແມ່ປະຊາຊົນບັນດາເຜົ່າໃນທົ່ວແຂວງ ທີ່ໄດ້ພ້ອມກັນເຊີດຊູຄວາມຮັບຜິດຊອບຂອງຕົນຢ່າງຕັ້ງໜ້າ ເຂົ້າໃນການຈັດຕັ້ງປະຕິບັດບັນດາຄາດໝາຍສູ້ຊົນທີ່ໄດ້ກຳນົດໄວ້ ສາມາດບັນລຸຕາມລະດັບຄາດໝາຍວາງໄວ້. ເຮັດໃຫ້ສະພາບເສດຖະກິດຂອງແຂວງໄດ້ມີທ່າອ່ຽງຂະຫຍາຍຕົວດີຂື້ນ, ໂຄງປະກອບເສດຖະກິດໄດ້ຫັນໄປຕາມທິດທີ່ໄດ້ກຳນົດໄວ້, ສະພາບທາງດ້ານການເງິນ-ເງິນຕາ ໄດ້ມີຄວາມຄ່ອງໂຕ ເຖິງວ່າການເບີກຈ່າຍງົບປະມານການລົງທຶນຂອງລັດ ແລະ ເງິນບໍລິຫານອື່ນ ຊັກຊ້າບາງຄັ້ງຄາວ. ແຕ່ມາຮອດປັດຈຸບັນກໍ່ສາມາດແກ້ໄຂໄດ້ໂດຍພື້ນຖານ; ອັດຕາເງິນເຟີ້ ສະເລ່ຍ 5 ເດືອນ ຂອງແຂວງໄຊຍະບູລີ ປີ 2025 ຢູ່ໃນ ລະດັບ 16,38% ເຮັດໃຫ້ສັງຄົມມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍໂດຍພື້ນຖານ. ກອງປະຊຸມຄັ້ງນີ້ ພວກເຮົາຈະໄດ້ພ້ອມກັນຄົ້ນຄວ້າປຶກສາຫາລື ແລະ ຕີລາຄາຄວາມຮັບຜິດຊອບການເມືອງ ຂອງຄະນະພັກຂັ້ນຕ່າງໆ ໃນການນໍາພາ-ຊີ້ນໍາ ຈັດຕັ້ງປະຕິບັດບັນດາມະຕິ, ຄໍາສັ່ງ, ລະບຽບກົດໝາຍຂັ້ນເທິງວາງອອກ ກໍ່ຄືການຈັດຕັ້ງປະຕິບັດມະຕິກອງປະຊຸມຄົບຄະນະ ຄັ້ງທີ 13 ສະໄໝທີ VII ຂອງຄະນະບໍລິຫານງານພັກແຂວງ, ແຜນພັັດທະນາເສດຖະກິດ-ສັງຄົມວາງອອກ ໃນ 6 ເດືອນຜ່ານມາ ຕິດພັນກັບການປະຕິບັດ 2 ວາລະແຫ່ງຊາດ ເພື່ອໃຫ້ເຫັນໄດ້ດ້ານດີ, ຜົນໄດ້ຮັບ, ດ້ານອ່ອນ, ຂໍ້ຄົງຄ້າງ ແລະ ຂໍ້ຂາດຕົກບົກຜ່ອງໃນການນໍາພາ-ຊີ້ນໍາ ຂອງຄະນະພັກແຕ່ລະຂັ້ນ ແລະ ຈະໄດ້ພ້ອມກັນຄົ້ນຄວ້າ ເອກະພາບກ່ຽວກັບທິດທາງມາດຕະການສູ້ຊົນຈັດຕັ້ງປະຕິບັດ ເພື່ອໃຫ້ບັນລຸຄາດໝາຍວາງໄວ້ ໃນທ້າຍປີ 2025. ກອງປະຊຸມໄດ້ຮັບຟັງການລາຍງານການສະຫຼຸບຕີລາຄາ ການຈັດຕັ້ງປະຕິບັດ ມະຕິກອງປະຊຸມຄົບຄະນະ ຄັ້ງທີ 13 ສະໄໝທີ VII ຂອງຄະນະບໍລິຫານງານພັກແຂວງ. ຮັບຟັງລາຍງານ ກ່ຽວກັບການຕີລາຄາການນໍາພາ-ຊີ້ນໍາຈັດຕັ້ງປະຕິບັດແຜນພັດທະນາ ເສດຖະ ກິດ-ສັງຄົມ ປະຈໍາ 6 ເດືອນຕົ້ນປີ ແລະ ທິດທາງແຜນການ 6 ເດືອນ ທ້າຍປີ 2025 ຕິດພັນກັບການປະຕິບັດ 2 ວາລະແຫ່ງຊາດ ແລະ ຮັບຟັງການປະກອບຄໍາເຫັນ ຈາກບັນດາຂະແໜງການ, ອົງການ, ກົມກອງ ອ້ອມຂ້າງ ແລະ ເມືອງ.ກອງປະຊຸມຈະໄດ້ດໍາເນີນເປັນເວລາ 3 ວັນ ຈຶ່ງສໍາເລັດ.
ຂ່າວ+ພາບ: ຄໍາໝັ້ນ.