ກອງປະຊຸມເຜີຍແຜ່ເຊື່ອມຊຶມມະຕິ 03/ຄບສພ ວ່າດ້ວຍການປັບປຸງກົງຈັກການຈັດຕັ້ງ ແລະ ມະຕິຕົກລົງຂອງຄະນະປະຈຳພັກແຂວງ ວ່າດ້ວຍການແຕ່ງຕັ້ງຄະນະຮັບຜິດຊອບປັບປຸງກົງຈັກການຈັດຕັ້ງຂັ້ນແຂວງ ໄດ້ຈັດຂຶ້ນໃນວັນທີ 01 ເມສາ 2025 ນີ້ ທີ່ຫໍປະຊຸມໃຫຍ່ຂອງແຂວງ, ເປັນກຽດເຂົ້າຮ່ວມເຜີຍແຜ່ຂອງ ສະຫາຍ ດວງຕາ ໄຊວຸດ ຮອງເລຂາຄະນະບໍລິຫານງານພັກແຂວງ, ມີກໍາມະການພັກແຂວງ, ເລຂາ, ຮອງເລຂາຄະນະພັກຮາກຖານ, ເລຂາ, ຮອງເລຂາໜ່ວຍພັກຮາກຖານ, ຫົວໜ້າຂະແໜງ, ຮອງຂະແໜງ, ສະມາຊິກພັກ, ພະນັກງານ-ລັດຖະກອນ ພະແນກການ, ອົງການ, ກົມກອງ ອ້ອມຂ້າງແຂວງ ເຂົ້າຮ່ວມ.
ໃນກອງປະຊຸມ ສະຫາຍ ຄໍາຫຼ້າ ຜິວວັນນາ ຫົວໜ້າຫ້ອງວ່າການແຂວງ ໄດ້ຜ່ານມະຕິຕົກລົງ ຂອງຄະນະປະຈຳພັກແຂວງ ສະບັບເລກທີ 138/ຄພຂ, ລົງວັນທີ 20 ມີນາ 2025 ວ່າດ້ວຍການແຕ່ງຕັ້ງຄະນະຮັບຜິດຊອບປັບປຸງກົງຈັກການຈັດຕັ້ງຂັ້ນແຂວງ; ຈາກນັ້ນ ສະຫາຍ ດວງຕາ ໄຊວຸດ ຮອງເລຂາຄະນະບໍລິຫານງານພັກແຂວງ ໄດ້ໃຫ້ກຽດເຜີຍແຜ່ ມະຕິຂອງຄະນະບໍລິຫານງານສູນກາງພັກ ສະບັບເລກທີ 03/ຄບສພ, ລົງວັນທີ 12 ມີນາ 2025 ວ່າດ້ວຍການປັບປຸງກົງຈັກການຈັດຕັ້ງ. ຈຸດປະສົງ ຂອງກອງປະຊຸມ ກໍເພື່ອຈັດຕັ້ງຜັນຂະຫຍາຍ ມະຕິຕົກລົງຂອງກົມການເມືອງສູນກາງພັກ ວ່າດ້ວຍການແຕ່ງຕັ້ງຄະນະຮັບຜິດຊອບປັບປຸງກົງຈັກການຈັດຕັ້ງ ແລະ ມະຕິຂອງຄະນະບໍລິຫານງານສູນກາງພັກ ວ່າດ້ວຍການປັບປຸງກົງຈັກການຈັດຕັ້ງ ໃຫ້ເຂົ້າສູ່ລວງເລິກໃນວຽກງານຕົວຈິງຢູ່ທ້ອງຖີ່ນຮາກຖານຢ່າງເລິກເຊີ່ງ, ເພື່ອເຮັດໃຫ້ການກະກຽມ ແລະ ນໍາພາ ການປັບປຸງກົງຈັກການຈັດຕັ້ງໃຫ້ສໍາເລັດຕາມກຳນົດເວລາ, ສອດຄ່ອງ ກັບກົດໝາຍ ແລະ ນິຕິກຳທີ່ກ່ຽວຂ້ອງ, ຮັບປະກັນໃຫ້ກົງຈັກການຈັດຕັ້ງທີ່ໄດ້ຮັບການປັບປຸງ ມີຄວາມໜັກແໜ້ນ, ເຂັ້ມແຂງ. ເປັນກໍາລັງແຮງໃນການປະຕິບັດໜ້າທີ່ການເມືອງ ທີ່ໄດ້ຮັບການມອບໝາຍ, ປະກອບສ່ວນເຂົ້າໃນການພັດທະນາເສດ ຖະກິດ-ສັງຄົມ ຂອງແຂວງ.
………………..
ຂ່າວ : ບຸນລັ່ນ.