ພິທີ ປະກາດສ້າງຕັ້ງຕາແສງ ທົ່ງກາບ ເມືອງຊຽງຮ່ອນ ແຂວງໄຊຍະບູລີ ໄດ້ຈັດຂຶ້ນໃນຕອນເຊົ້າວັນທີ 25 ເມສາ 2026 ນີ້, ຢູ່ທີ່ສະໂມສອນກຸ່ມທົ່ງກາບ. ໂດຍການເປັນກຽດເຂົ້າຮ່ວມຂອງທ່ານ ດວງຕາ ໄຊວຸດ ຮອງເລຂາຄະນະບໍລິຫານງານພັກແຂວງ ປະທານຄະນະກຳມະການປົກຄອງແຂວງໄຊຍະບູລີ, ທ່ານ ນາງ ຄຳຜິວ ພັນທະວົງ ກຳມະການປະຈຳພັກແຂວງ, ປະທານແນວລາວສ້າງຊາດ ແຂວງໄຊຍະບູລີ, ທ່ານ ແສງອາທິດ ລາວເບຼຍຢາທໍ່ ກໍາມະການພັກແຂວງ, ເລຂາຄະນະບໍລິຫານງານພັກເມືອງຊຽງຮ່ອນ, ມີການນໍາຂັ້ນແຂວງ, ການນໍາຂັ້ນເມືອງ, ພະນັກງານອາວຸໂສບໍານານ, ຄະນະກະກຽມສ້າງຕັ້ງຕາແສງທົ່ງກາບ, ພະນັກງານ, ທະຫານ, ຕໍາຫຼວດ, ອົງການປົກຄອງບ້ານ ກ້ອນກໍາລັງຊາວໜຸ່ມ, ເຍົາວະຊົນ ແລະ ປະຊາຊົນເຂດດັ່ງກ່າວເຂົ້າຮ່ວມຢ່າງພ້ອມພຽງ.
ທ່ານ ບຸນຈັນ ແກ້ວວິຊາ ປະທານຄະນະກໍາມະການປົກຄອງເມືອງຊຽງຮ່ອນ ໄດ້ລາຍງານການກະກຽມສ້າງຕັ້ງຕາແສງທົ່ງກາບ ຕໍ່ພິທີວ່າ: ຕາແສງທົ່ງກາບຕັ້ງຢູ່ທາງທິດຕາເວັນຕົກຂອງເມືອງຊຽງຮ່ອນຫ່າງອອກຈາກເທດສະບານເມືອຊຽງຮ່ອນ ປະມານ 10,5 ກິໂລແມັດ ທາງທິດເໜືອຕິດກັບບ້ານລັບ ແລະ ບ້ານ ດອນຕັນ, ທາງທິດໃຕ້ຕິດກັບ ອໍາເພີສອງແຄວ ຈັ່ງຫວັດນ່ານ ທາງທິດຕາເວັນອອກຕິດກັບອຳເພີທົ່ງຊ້າງ ຈັ່ງຫວັດນ່ານ ຣາຊາອານາຈັກໄທ, ທາງທິດຕາເວັນຕົກຕິດກັບເມືອງຄອບ. ຕາແສງທົ່ງກາບເປັນເຂດພູພຽງກວມເອົາ 60% ແລະ ເຂດພູດອຍ ກວມເອົາ 40%;ເຊິ່ງເປັນເຂດທີ່ມີດິນປູກຝັງທີ່ອຸດົມສົມບູນທາງດ້ານທໍາມະຊາດ,ມີນໍ້າຫຼາຍສາຍໄຫຼຜ່ານເໝາະສົມແກ່ການປູກຝັງ ແລະ ລ້ຽງສັດ ເປັນສິນຄ້າ ປະຊາຊົນມີມູນເຊື້ອດຸໝັ່ນ ມີຮີດຄອງປະເພນີຫຼາຍສີສັນ ເຊິ່ງເປັນພື້ນຖານໃຫ້ແກ່ການພັດທະນາເສດຖະກິດ-ສັງຄົມ ຕິດພັນກັບການທ່ອງທ່ຽວທໍາມະຊາດ, ເປັນເຂດທີ່ມີຄວາມເໝາະສົມແກ່ການຄ້າຂາຍທີ່ສະດວກມີເສັ້ນທາງຫຼວງແຫ່ງຊາດ 2A ຜ່ານ ເຊິ່ງເປັນເສັ້ນທາງເຊື່ອມຕໍ່ລະຫວ່າງເມືອງຊຽງຮ່ອນ ແລະ ເມືອງຄອບ. ຕາແສງ ທົ່ງກາບ ມີເນື້ອທີ່ທັງໝົດ 1.895,996 ກິໂລຕາແມັດ, ປະກອບມີ 9 ບ້ານຄື: ບ້ານທົ່ງກາບ, ບ້ານປົ່ງແປ້ນ, ບ້ານແກສີພົມ, ບ້ານນໍ້າລ້ອມ, ບ້ານສີນົກໄຊ້, ບ້ານຫ້ວຍຕອງ, ບ້ານພູລ້ານ, ບ້ານຫ້ວຍຮາກ ແລະ ບ້ານນໍ້າຄ່ອມ. ມີພົນລະເມືອງທັງໝົດ 8.542 ຄົນ, ຍິງ 4.310 ຄົນ, ມີ 1.666 ຄອບຄົວ, ມີ 123 ໜ່ວຍ ພົນລະເມືອງແບ່ງຕາມເຜົ່າ: ເຜົ່າລາວ, ກວມເອົາ 1,2 %, ເຜົ່າຍວນ ກວມເອົາ 14,2 %,ເຜົ່າລື້ ກວມເອົາ 17,88 %, ເຜົ່າມົ້ງ ກວມເອົາ 29,1%,ເຜົ່າກືມມຸ ກວມເອົາ 31,24%, ເຜົ່າໄປຣ່ ກວມເອົາ 6,35 %, ເຜົ່າໄທດໍາ ກວມເອົາ 0.01 %. ອັດຕາຄວາມໜາແໜ້ນຂອງປະຊາກອນ 22 ຄົນ/ກິໂລຕາແມັດ. ວຽກພັກ ໃນ 9 ບ້ານມີທັງໝົດ 13 ໜ່ວຍ, ໃນນີ້: ໜ່ວຍພັກ ຕາແສງ 1 ໜ່ວຍ, ໜ່ວຍພັກບ້ານ 9 ໜ່ວຍ, ໜ່ວຍພັກໂຮງຮຽນ 2 ໜ່ວຍ, ແລະ ໜ່ວຍພັກສຸກສາລາ 1 ໜ່ວຍ ມີຄະນະພັກ 38 ສະຫາຍ,ຍິງ6ສະຫາຍ, ມີສະມາຊິກພັກທັງໝົດ165 ສະຫາຍ,ຍິງ51 ສະຫາຍ, ໃນນີ້: ສະມາຊິກພັກສົມບູນ 154ສະຫາຍ,ຍິງ 44 ສະຫາຍ, ສໍາຮອງ 11 ສະຫາຍ,ຍິງ07 ສະຫາຍ. ຄະນະກຳມະການປົກຄອງຕາແສງທົ່ງກາບມີພະນັກງານທັງໝົດ 13 ທ່ານ: ປະທານຄະນະກໍາມະການປົກຄອງຕາແສງ 1 ທ່ານ; ຮອງປະທານຄະນະກຳມະການປົກຄອງຕາແສງ 02 ທ່ານ; ຄະນະກຳມະການປົກຄອງຕາແສງ 05 ທ່ານຄວບຕໍ່າແໜ່ງຫົວໜ້າໜ່ວຍງານ; ມີພະນັກງານຜູ້ຊ່ວຍວຽກ 05 ທ່ານ ຈາກນັ້ນ, ທ່ານ ຫຸມ ມະໄລຄຳ ຮອງຫົວໜ້າຄະນະຈັດຕັ້ງແຂວງໄດ້ ຜ່ານຂໍ້ຕົກລົງຂອງປະທານຄະນະກຳມະການປົກຄອງແຂວງວ່າດ້ວຍການສ້າງຕັ້ງຕາແສງ ທົ່ງກາບ ແລະ ທ່ານ ສົມບູນ ຂຽວພະນາ ຮອງເລຂາຄະນະບໍລິຫານງານພັກເມືອງ ໄດ້ຜ່ານມະຕິຕົກລົງ ຂອງຄະນະປະຈໍາພັກເມືອງ ວ່າດ້ວຍການສ້າງຕັ້ງອົງຄະນະພັກຮາກຖານຕາແສງທົ່ງກາບ, ມະຕິຕົກລົງ ຂອງຄະນະປະຈໍາພັກເມືອງ ວ່າດ້ວຍການສ້າງຕັ້ງໜ່ວຍພັກຫ້ອງການຕາແສງທົ່ງກາບ, ຂໍ້ຕົກລົງຂອງປະທານຄະນະກໍາມະການປົກຄອງເມືອງ ວ່າດ້ວຍການແຕ່ງຕັ້ງ ປະທານ ແລະຮອງປະທານຄະນະກຳມະການປົກຄອງຕາແສງທົ່ງກາບຄື: ຕົກລົງແຕ່ງຕັ້ງທ່ານ ສະຫງັດ ລືຊາ ເປັນປະທານຄະນະກຳມະການປົກຄອງຕາແສງທົ່ງກາບ, ແຕ່ງຕັ້ງທ່ານ ສີເມືອງ ລັກຄະນະຄຸນ ແລະ ທ່ານ ພັຕ ຄຳປ່ຽນ ວົງປະສິດ ເປັນຮອງປະທານຄະນະກຳມະການປົກຄອງຕາແສງທົ່ງກາບ ພ້ອມດ້ວຍຄະນະ ແລະ ຜູ້ຊ່ວຍວຽກອິກຈຳນວນ 5 ປະກອບຢູ່ໃນໂຄງປະກອບຂອງຕາແສງທົ່ງກາບ.
ໃນພິທີ ຍັງໄດ້ຮັບຟັງການມີຄໍາເຫັນໂອ້ລົມຂອງທ່ານ ດວງຕາໄຊວຸດ ຮອງເລຂາຄະນະບໍລິຫານງານພັກແຂວງ ປະທານຄະນະກຳມະການປົກຄອງແຂວງໄຊຍະບູລີ ແລະ ຕອນທ້າຍ, ຄະນະປະທານໄດ້ຮ່ວມກັນຕັດແຖບຜ້າ, ລັ່ນຄ້ອງ 9 ບາດ ແລະ ເປີດປ້າຍຫ້ອງການຕາແສງທົ່ງກາບ ຢ່າງເປັນທາງການ ເພື່ອເປັນຂີດໝາຍແຫ່ງການເລີ່ມຕົ້ນປະຕິບັດງານຂອງຕາແສງແຫ່ງທຳອິດຂອງເມືອງຊຽງຮ່ອນ.