ກອງປະຊຸມຕີລາຄາການຈັດຕັ້ງປະຕິບັດວຽກງານພັດທະນາກະສິກໍາ-ປ່າໄມ້ ແລະ ພັດທະນາຊົນນະບົດປະຈໍາປີ 2023 ແລະ ແຜນການປີ 2024 ໄດ້ຈັດຂຶ້ນໃນຕອນເຊົ້າຂອງວັນທີ 19 ກຸມພາ 2024 ນີ້ ທີ່ຫ້ອງປະຊຸມພະແນກກະສິກໍາ ແລະ ປ່າໄມ້ ແຂວງໄຊຍະບູລີ ໂດຍການເປັນປະທານຂອງທ່ານ ບຸດສະກອນ ອິນທະລັງສີ ກໍາມະການພັກແຂວງ ຫົວໜ້າພະແນກກະສິກໍາ ແລະ ປ່າໄມ້ແຂວງ, ໃຫ້ກຽດເຂົ້າຮ່ວມຂອງທ່ານ ພົງສະຫວັນ ສິດທະວົງ ກໍາມະການສູນກາງພັກ ເລຂາພັກແຂວງເຈົ້າແຂວງໄຊຍະບູລີ, ມີກໍາມະການເສດຖະກິດແຜນການ ແລະ ການເງິນ, ສະພາປະຊາຊົນແຂວງ, ຫົວໜ້າ, ຮອງຫົວໜ້າພະແນກການຂອງແຂວງ, ເຈົ້າເມືອງ, ຮອງເຈົ້າເມືອງ, ຫົວໜ້າ, ຮອງຫົວໜ້າຫ້ອງການກະສິກໍາ ແລະ ປ່າໄມ້ເມືອງ 11 ເມືອງ ພ້ອມດ້ວຍຫົວໜ້າ, ຮອງຫົວໜ້າຂະແໜງການພາຍໃນພະແນກກະສິກໍາ ແລະ ປ່າໄມ້ແຂວງເຂົ້າຮ່ວມ.
ໃນວາລະກອງປະຊຸມພາຍຫຼັງທ່ານ ບຸດສະກອນ ອິນທະລັງສີ ກໍາມະການພັກແຂວງ ຫົວໜ້າພະແນກກະສິກໍາ ແລະ ປ່າໄມ້ແຂວງ ກ່າວເປີດກອງປະຊຸມຢ່າງເປັນທາງການ, ທ່ານ ຄໍາເກິງ ພັນລັກ ຮອງຫົວໜ້າພະແນກກະສິກໍາ ແລະ ປ່າໄມ້ແຂວງ ໄດ້ຕີລາຄາການຈັດຕັ້ງປະຕິບັດວຽກງານກະສິກໍາ, ປ່າໄມ້ ແລະ ພັດທະນາຊົນນະບົດປະຈໍາປີ 2023 ແລະ ແຜນການ 2024ໂດຍຫຍໍ້ ໃນໄລຍະໜຶ່ງປີຜ່ານມາພະແນກກະສິກໍາ ແລະ ປ່າໄມ້ພວກເຮົາໄດ້ເອົາໃຈໃສ່ຢ່າງຕັ້ງໜ້າເພື່ອສຶບຕໍ່ຜັນຂະຫຍາຍແຜນພັດທະນາເສດຖະກິດ-ສັງຄົມຂອງແຂວງ ແລະ ໃຫ້ແທດເໝາະກັບເງື່ອນໄຂທ່າແຮງບົ່ມຊ້ອນທາງດ້ານຊັບພະຍາກອນທໍາມະຊາດການຜະລິດກະສິກໍາໄດ້ມີບາດກ້າວຂະຫຍາຍຕົວເຊິ່ງເຫັນໄດ້ວ່າ ບັນດາທ່າແຮງ ແລະ ເງື່ອນໄຂການຜະລິດໄດ້ອໍານວຍຄວາມສະດວກໃນການປູກຝັງ ແລະ ລ້ຽງສັດຄຽງຄູ່ກັບການຜະລິດສະບຽງອາຫານ ແລະ ຜະລິດເປັນສິນຄ້າ ໂດຍການນໍາໃຊ້ເຕັກນິກເພື່ອຮັບປະກັນທາງດ້ານປະລິມານ ແລະ ຄຸນນະພາບເຊິ່ງສະແດງອອກການຜະລິດເຂົ້າມີເນື້ອທີ່ທັງໝົດ 48.623,04 ເຮັກຕາ ຜົນຜະລິດໄດ້ 203.365 ໂຕນ ໃນນີ້ ເຂົ້ານາປີມີ 36.228,86 ເຮັກຕາ ເທົ່າກັບ 98,23% ຂອງແຜນການ ໃນນີ້ ເນື້ອທີ່ເກັບກ່ຽວຕົວຈິງ 35.793,36 ເຮັກຕາ ເສຍຫາຍ 611,94 ເຮັກຕາ ຜົນຜະລິດໄດ້ 169.014 ໂຕນ ສະເລ່ຍສະມັດຕະພາບ 4,75 ໂຕນ ຕໍ່ເຮັກຕາ, ນາແຊງປະຕິບັດໄດ້ 1.932,9 ເຮັກຕາ ເທົ່າກັບ 96,64% ຂອງແຜນການ ຜົນຜະລິດໄດ້ 9.086 ໂຕນ ສະມັດຕະພາບຜົນຜະລິດ 4,67 ໂຕນຕໍ່ເຮັກຕາ, ເຂົ້າໄຮ່ປະຕິບັດໄດ້ 11.079,65 ເຮັກຕາ ເທົ່າກັບ 109,70% ຂອງແຜນການ ຜົນຜະລິດໄດ້ທັງໝົດ 25.265 ໂຕນ ສະມັດຕະພາບສະເລ່ຍ 2,28 ໂຕນ ຕໍ່ເຮັກຕາ, ການຜະລິດພຶດສະບຽງອາຫານປະຕິບັດໄດ້ທັງໝົດ 21.011,54 ເຮັກຕາ ເທົ່າກັບ 111,66% ຂອງແຜນການ ເນື້ອທີ່ເກັບກູ້ຕົວຈິງ 21.011,3 ເຮັກຕາ ເສຍຫາຍ 0,24 ເຮັກຕາ ຜົນຜະລິດໄດ້ທັງໝົດ 187.980 ໂຕນ ສະເລ່ຍສະມັດຕະພາບ 8,97 ໂຕນຕໍ່ເຮັກຕາ, ດ້ານການລ້ຽງສັດຂອງປະຊາຊົນໃນໄລຍະ 1 ປີ ຜ່ານມາເຫັນວ່າຝູງສັດ ລ້ຽງໄດ້ມີການຂະຫຍາຍຕົວຢູ່ໃນລະດັບ 6,59% ມາເຖິງປະຈຸບັນ ທົ່ວແຂວງມີສັດລ້ຽງທັງໝົດ 5.771,457 ໂຕ ໃນນັ້ນ ຄວາຍ 91.242 ໂຕ ທຽບໃສ່ປີຜ່ານມາເພິ່ມຂຶ້ນ 5.639 ໂຕ, ງົວ 349.867 ໂຕ ທຽບໃສ່ປີຜ່ານມາເພິ່ມຂຶ້ນ 26.265 ໂຕ, ໝູ 199.013 ໂຕ ທຽບໃສ່ປີຜ່ານມາເພິ່ມຂຶ້ນ 15.286 ໂຕ, ແບ້ 41.052 ໂຕ ທຽບໃສ່ຜີຜ່ານມາເພິ່ມຂຶ້ນ 15.286 ໂຕ, ສັດປິກ 4.993,412 ໂຕ ທຽບໃສ່ປີຜ່ານມາເພິ່ມຂຶ້ນ 149.560 ໂຕ, ດ້ານການລ້ຽງສັດໃຫຍ່ຕິດພັນກັບທົ່ງຫຍ້າທໍາມະຊາດໃນທົ່ວແຂວງມີທົ່ງຫຍ້າທໍາມະຊາດທັງໝົດ 846 ແຫ່ງ ມີເນື້ອທີ່ 30.771 ເຮັກຕາ ນອກນີ້ ຍັງມີຄອບຄົວປູກຫຍ້າອາຫານສັດທັງໝົດ 7.890 ຄອບຄົວ ມີເນື້ອທີ່ປູກຫຍ້າທັງໝົດ 23.000 ເຮັກຕາ ສາມາດຕອບສະໜອງ ໄດ້ທັງໝົດ 30.542,27 ໂຕນ ສະເລ່ຍໃສ່ຫົວຄົນໜຶ່ງໄດ້ 71,32 ກິໂລຕໍ່ຄົນຕໍ່ປີ ພ້ອມນີ້ ດ້ານການປູກພຶດເປັນສິນຄ້າແຜນປີ 2023 ມີທັງໝົດ 130.893 ເຮັກຕາ ສາມາດປະຕິບັດໄດ້ທັງໝົດ 148.571,59 ເຮັກຕາ ເທົ່າກັບ 113,5% ຂອງແຜນການເນື້ອທີ່ເກັບກູ້ຕົວຈິງ 148.509,66 ເຮັກຕາ ເສຍຫາຍ 61,93 ເຮັກຕາ ຜົນຜະລິດໄດ້ທັງໝົດ 2.663.686 ໂຕນ ເທົ່າກັບ 126,84% ຂອງແຜນການສະເລ່ຍສະມັດຕະພາບຜົນຜະລິດໄດ້ 17,79 ໂຕນ ຕໍ່ເຮັກຕາ ປູກຫຼາຍກວ່າໝູ່ແມ່ນມັນຕົ້ນ ມີເນື້ອທີ່ 81.601,11 ເຮັກຕາ ຜົນຜະລິດໄດ້ 2.272.282 ໂຕນ. ຈາກນັ້ນ ປະທານ ແລະ ຜູ້ເຂົ້າຮ່ວມໄດ້ພ້ອມກັນປະກອບຄໍາຄິດຄໍາເຫັນໃສ່ບົດສະຫຼຸບ ແລະ ແຜນພັດທະນາປີ 2024 ເພື່ອໃຫ້ເປັນເອກະພາບກັນແກ້ໄຂບັນຫາຍັງຄ້າງຄາ ແລະ ສົ່ງເສີມບັນຫາດ້ານທີ່ຕັ້ງໜ້າເພື່ອພ້ອມກັນສູ້ຊົນຈັດຕັ້ງປະຕິບັດວຽກງານກະສິກໍາ ແລະ ປ່າໄມ້ໃຫ້ມີບາດກ້າວຂະຫຍາຍຕົວຕາມແຜນການທີ່ຕັ້ງໄວ້ໃຫ້ປະກົດຜົນເປັນຈິງ.
……………………………
ຂ່າວ+ພາບ: ບຸນທີ