ໃນຕອນເຊົ້າວັນທີ 19 ພະຈິກ 2024 ນີ້ ເມືອງໄຊຍະບູລີໄດ້ເປີດຊຸດຝືກອົບຮົມທິດສະດີການເມືອງ ແລະ ການປົກຄອງໄລຍະສັ້ນ 10 ວັນ ໃຫ້ເລຂາໜ່ວຍພັກບ້ານ, ນາຍບ້ານພາຍໃນເມືອງໄຊຍະບູລີ; ຢູ່ທີ່ຫ້ອງປະຊຸມບ້ານນາຫຼາ ໂດຍການເປັນປະທານຂອງ ທ່ານ ເສນ ພັນລັກ ເລຂາພັກເມືອງ ວ່າການເຈົ້າເມືອງໄຊຍະບູລີ, ມີຄະນະປະຈຳພັກເມືອງ, ກຳມະການພັກເມືອງ, ຫົວໜ້າ, ຮອງຫ້ອງການ, ຂະແໜງການທີ່ກ່ຽວຂ້ອງຂອງແຂວງ ພ້ອມດ້ວຍນັກສຳມະນາກອນເຂົ້າຮ່ວມ.
ໃນພິທີ ທ່ານ ຄໍາພຽນ ປັນຍາວົງ ຄະນະປະຈໍາພັກເມືອງ ຫົວໜ້າຫ້ອງການ ຄະນະຈັດຕັ້ງເມືອງໄຊຍະບູລີ ໄດ້ຂື້ນຜ່ານຂໍ້ຕົກລົງ ຂອງຫົວໜ້າໂຮງຮຽນການເມືອງ ແລະ ການປົກຄອງແຂວງໄຊຍະບູລີ ສະບັບເລກທີ 817/ຮມປຂ ລົງວັນທີ 15 ພະຈິກ 2024 ວ່າດ້ວຍການອານຸມັດເປີດຊຸດຝຶກອົບຮົມທິດສະດີການເມືອງ ແລະ ການປົກຄອງໃຫ້ຄະນະພັກບ້ານ, ນາຍບ້ານຊຸດທີ III ຢູ່ເມືອງໄຊຍະບູລີ ປະຈຳປີ 2024 ຫົວໜ້າໂຮງຮຽນການເມືອງ ແລະ ການປົກຄອງເຫັນດີອານຸມັດໃຫ້ຄະນະບໍລິຫານງານພັກເມືອງໄຊຍະບູລີເປິດຊຸດຝຶກອົບຮົມທິດສະດີການເມືອງ ແລະ ການປົກຄອງໃຫ້ຄະນະພັກບ້ານນາຍບ້ານຊຸດທີ III ຈໍານວນ 64 ສະຫາຍ, ຍິງ 4 ສະຫາຍ. ຈາກນັ້ນ ທ່ານ ນາງ ສຸກສະຫວັນ ປີ່ນຄຳ ກຳມະການພັກເມືອງ ຫົວໜ້າຫ້ອງການພາຍໃນເມືອງ ໄດ້ຂື້ນຜ່ານບົດສະເໜີໂຄງການບາງຕອນທ່ານກ່າວວ່າ: ຈຸດປະສົງຂອງການຝຶກອົບຮົມໃຫ້ເລຂາໜ່ວຍພັກ, ນາຍບ້ານຢູ່ພາຍໃນເມືອງໄຊຍະບູລີ ແມ່ນເຮັດໃຫ້ຄະນະພັກ ມີຄວາມຮູ້, ຄວາມເຂົ້າໃຈກ່ຽວກັບວຽກທິດສະດີການເມືອງ ແລະ ການປົກຄອງ, ແນວທາງນະໂຍບາຍຂອງພັກ, ກົດໝາຍຂອງລັດໃຫ້ເລຂາໜ່ວຍພັກບ້ານ, ນາຍບ້ານ ຢູ່ພາຍໃນເມືອງ ທີ່ບໍ່ທັນໄດ້ຜ່ານການຝຶກອົບຮົມມາກ່ອນ; ເຮັດໃຫ້ຜູ້ເຂົ້າຮຽນໄດ້ຮັບຮູ້ເຂົ້າໃຈ ແລະ ກຳແໜ້ນກ່ຽວກັບທິດສະດີການເມືອງ ແລະ ການປົກຄອງ, ໃຫ້ໜັກແໜ້ນຕື່ມບາດກ້າວໜຶ່ງ ເພື່ອແນໃສ່ຍົກລະດັບຄວາມຮັບຮູ້, ຄວາມສາມາດເພື່ອນຳໄປໝູນໃຊ້ເຂົ້າໃນການນໍາພາຈັດຕັ້ງປະຕິບັດໃນຂົງເຂດທີ່ຕົນຮັບຜິດຊອບໃຫ້ມີປະສິດທິຜົນ.
ຂ່າວ-ພາບ: ຄະນະໂຄສະນາອົບຮົມເມືອງໄຊຍະບູລີ