ເມືອງ ໄຊຍະບູລີປິດຊຸດຝຶກອົບຮົມທິດສະດີການເມືອງ ແລະ ການປົກຄອງໄລຍະສັ້ນ 10 ວັນ ຊຸດທີ III ໃຫ້ເລຂາໜ່ວຍພັກບ້ານ, ນາຍບ້ານ ພາຍໃນເມືອງ.
ໃນຕອນເຊົ້າວັນທີ 28 ພະຈິກ 2024 ນີ້ ເມືອງ ໄຊຍະບູລີໄດ້ຈັດພິທີປິດຊຸດຝຶກອົບຮົມທິດສະດີການເມືອງ ແລະ ການປົກຄອງໄລຍະສັ້ນ 10 ວັນ ຊຸດທີ III ໃຫ້ເລຂາໜ່ວຍພັກບ້ານ, ນາຍບ້ານ ພາຍໃນເມືອງຂື້ນ, ທີ່ຫ້ອງປະຊຸມບ້ານນາຫຼາ ໂດຍການເປັນປະທານຂອງທ່ານ ເສນ ພັນລັກ ເລຂາພັກເມືອງ ວ່າການເຈົ້າເມືອງໄຊຍະບູລີ, ມີຄະນະປະຈຳພັກເມືອງ, ກຳມະການພັກເມືອງ, ຫົວໜ້າ, ຮອງຫົວໜ້າຫ້ອງການ, ຂະແໜງການທີ່ກ່ຽວຂ້ອງຂອງແຂວງພ້ອມດ້ວຍສຳມະນາກອນເຂົ້າຮ່ວມ.
ໃນພິທີທ່ານ ຄຳພຽນ ປັນຍາວົງ ຄະນະປະຈຳພັກເມືອງ ຫົວໜ້າຫ້ອງການຄະນະຈັດຕັ້ງເມືອງໄດ້ຂື້ນຜ່ານມະຕິຕົກລົງວ່າດ້ວຍການອະນຸມັດປິດຊຸດຝຶກອົບຮົບທິດສະດີການເມືອງ ແລະ ການປົກຄອງໃຫ້ເລຂາໜ່ວຍພັກບ້ານ, ນາຍບ້ານ ໄລຍະສັ້ນ 10 ວັນ ຊຸດທີ III ຂອງເມືອງໄຊຍະບູລີ; ຈາກນັ້ນທ່ານ ນາງ ສີນວນ ພົມສີ ກຳມະການພັກເມືອງ ຫົວໜ້າຫ້ອງການຄະນະໂຄສະນາອົບຮົມເມືອງໄດ້ຂື້ນຜ່ານບົດສະຫຼຸບການຝືກອົບຮົມບາງຕອນທ່ານກ່າວວ່າ: ການເປີດຝຶກອົບຮົມທິດສະດີການເມືອງ-ການປົກຄອງ ໃນຊຸດນີ້ ມີຄະນະຮັບຜິດຊອບທັງໝົດ 27 ທ່ານ, ຍິງ 9 ທ່ານ, ຄະນະປະຈໍາກໍາມະການຈາກຫ້ອງການອ້ອມຂ້າງເມືອງຂຶ້ນຫ້ອງມີ 19 ພາກສ່ວນ, ມີນັກສໍາມະນາກອນເຂົ້າຮ່ວມຝຶກອົບຮົມທັງໝົດ 52 ທ່ານ, ຍິງ 4 ທ່ານ; ຊຶ່ງມາຈາກ ເຂດນາຫຼາ, ເຂດນາມອນ, ເຂດນາຕາກ ແລະ ເຂດປາກເຮົ້າ; ເຊິ່ງເລີ່ມເປິດຝຶກອົບຮົມຄັ້ງນີ້ແຕ່ວັນທີ 19 ພະຈິກ 2024 ເປັນຕົ້ນມາ, ໄດ້ມີລະບົບການຈັດຕັ້ງຂອງຫ້ອງ, ມີອາຈານປະຈໍາຫ້ອງ 1 ທ່ານ, ມີຄະນະຫ້ອງ 5 ທ່ານ. ພ້ອມທັງໄດ້ແບ່ງເປັນ 5 ຈຸດຄົ້ນຄວ້າ; ຄະນະຮັບຜິດຊອບການຝຶກອົບຮົມ, ຄູອາຈານ, ທຸກທ່ານແມ່ນໄດ້ສຸມທຸກກໍາລັງທັງຄວາມຮູ້, ຄວາມສາມາດເຂົ້າໃນການແຕ່ງບົດສອນ ແລະ ຂຶ້ນຫ້ອງ-ການສອນ ຄົບຕາມຫຼັກສູດຂອງໂຮງຮຽນການເມືອງ-ການປົກຄອງ ວາງອອກ ຊຶ່ງປະກອບມີ 19 ວິຊາຄື: ບົດທີ 1: ພັດທະນາປະເທດຊາດຕາມທິດສັງຄົມນິຍົມ ຢູ່ປະເທດເຮົາ; ບົດທີ 2: ພັດທະນາເສດຖະກິດຂັ້ນບ້ານ; ບົດທີ 3: ສ້າງສະຕິກົດໜາຍໃຫ້ປະຊາຊົນ ຢູ່ຂັ້ນບ້ານ; ບົດທີ 4: ສ້າງຄວາມສາມັກຄີໃຫ້ໜັກແໜ້ນ ຢູ່ພາຍໃນບ້ານ; ບົດທີ 5: ບົດບາດ ຂອງພັກປະຊາຊົນ ປະຕິວັດລາວ ໃນປັດຈຸບັນ; ບົດທີ 6: ສ້າງໜ່ວຍພັກຮາກຖານບ້ານໃຫ້ໜັກແໜ້ນໃນ 4 ດ້ານ; ບົດທີ 7: ຍົກສູງຄຸນນະພາບຂອງສະມາຊິກພັກ ແລະ ວຽກງານຂະຫຍາຍພັກ ຢູ່ຮາກຖານ; ບົດທີ 8: ຄວາມຮັບຜິດຊອບຂອງພະນັກງານນໍາພາ – ຄຸ້ມຄອງຕໍ່ການປະຕິບັດໜ້າທີ່ການເມືອງ ຢູ່ຮາກຖານບ້ານ; ບົດທີ 9: ການນໍາພາຂອງໜ່ວຍພັກບ້ານຕໍ່ການສ້າງເສດຖະກິດຄອບຄົວ; ບົດທີ 10: ການກະກຽມດໍາເນີນກອງປະຊຸມໃຫ່ຍ 3 ຂັ້ນຂອງພັກ; ບົດທີ 11: ວຽກງານຕິດຕາມກວດກາພັກ; ບົດທີ 12: ວຽກງານຄຸ້ມຄອງພົນລະເມືອງ ຢູ່ພາຍໃນບ້ານ; ບົດທີ 13: ຕ້ານ ແລະ ສະກັດກັ້ນປະກົດການຫຍໍ້ທໍ້ ຢູ່ຂັ້ນບ້ານ; ບົດທີ 14: ການພັດທະນາວຽກງານສຶກສາ ແລະ ສາທາລະນະສຸກ; ບົດທີ 15: ວຽກງານຍຸຕິທໍາຮາກຖານ ແລະ ການສ້າງບ້ານປອດຄະດີ; ບົດທີ 16: ການສ້າງຄອບຄົວ ແລະ ບ້ານວັດທະນະທໍາ; ບົດທີ 17: ຄວາມຮູ້ພື້ນຖານ ກ່ຽວກັບ ກົດໜາຍວ່າດ້ວຍກະສິກໍາ-ປ່າໄມ້; ບົດທີ 18: ການຄຸ້ມຄອງການນໍາໃຊ້ທີ່ດິນຂອງບ້ານ; ບົດທີ 19: ການສ້າງແຜນພັດທະນາບ້ານ; ຜ່ານການຝຶກອົບຮົມສ້າງໃຫ້ນັກສໍາມະນາກອນໄດ້ມີຄວາມຮູ້, ຄວາມສາມາດ ໃນການໝູນໃຊ້ບັນດາຫຼັກມູນທິດສະດີ ທີ່ໄດ້ຝຶກອົບຮົມເຂົ້າສູ່ວຽກງານຕົວຈິງຂອງຂົງເຂດວຽກງານທີ່ຕົນເອງຮັບຜິດຊອບຢ່າງມີຫົວຄິດປະດິດສ້າງ ແລະ ເຂົ້າໃຈການຈັດຕັ້ງຊີ້ນໍາໆ ພາ ຢູ່ຂັ້ນທ້ອງຖິ່ນຂອງຕົນຮັບຜິດຊອບ ໂດຍຫັນເອົາແຜນພັດທະນາຂອງເມືອງມາສ້າງເປັນໂຄງການປະຕິບັດອັນລະອຽດຂອງທ້ອງຖິ່ນຮາກຖານ ແລະ ເຮັດວຽກຮັບຜິດຊອບຢ່າງມີໝາກຜົນ, ມີການຂະຫຍາຍຕົວແຂງແຮງ, ເຮັດໃຫ້ການນໍາພາວຽກງານຮອບດ້ານຢູ່ຂັ້ນທ້ອງຖິ່ນດີຂຶ້ນ, ຈາກນັ້ນໃນພິທີກໍ່ໄດ້ມອບໃບຢັ້ງຢືນໃຫ້ນັກສຳມະນາກອນ, ມອບໃບຍ້ອງຍໍໃຫ້ບຸກຄົນທີ່ມີຜົນງານດີເດັ່ນໃນການປະກອບສ່ວນເຂົ້າໃນບັ້ນຝືກອົບຮົມໃຫ້ກຽດມອບໂດຍທ່ານ ເສນ ພັນລັກ ເລຂາພັກເມືອງ ວ່າການເຈົ້າເມືອງໄຊຍະບູລີ
ຂ່າວ-ພາບ: ສີນົນ ອ່ອນສາ
