ກອງປະຊຸມທາບທາມຮ່າງຂໍຕົກລົງຂອງທ່ານເຈົ້າແຂວງ ວ່າດ້ວຍການຄຸ້ມຄອງ ນໍາໃຊ້ ແລະ ອານຸລັກຊ້າງບ້ານ ເຜີຍແຜ່ກົດໝາຍວ່າດ້ວຍສະຫະກອນ ແລະ ເຜີຍແຜ່ດຳລັດ ວ່າດ້ວຍກະສິກຳແບບມີສັນຍາ ກອງປະຊຸມໄດ້ຈັດຂື້ນໃນວັນທີ 25 ພະຈິກ 2025 ນີ້ ຢູ່ທີ່ສະໂມສອນຂອງເມືອງເງິນ ແຂວງໄຊຍະບູລີ ໂດຍການເປັນປະທານຂອງທ່ານ ອຸ່ນຄໍາ ອຸບົນສັກ ຮອງປະທານຄະນະກຳມະການປົກຄອງເມືອງ ມີທ່ານແສງຈັນ ພານຸເດດ ຫົວໜ້າຂະແໜງກວດກາ ພະແນກກະສິກຳ ແລະ ສິ່ງແວດລ້ອມແຂວງ ພ້ອມດ້ວຍທີມງານຂັ້ນແຂວງ, ມີຄະນະປະຈໍາພັກເມືອງ, ກໍາມະການພັກເມືອງ, ຫົວໜ້າ-ຮອງຫົວໜ້າຫ້ອງການ, ກົມກອງ, ລັດວິສາຫະກິດ ຜູ້ປະກອບການດ້ານກະສິກໍາ, ພະນັກງານວິຊາການທີ່ກ່ຽວຂ້ອງ ແລະ ທ່ານນາຍບ້ານເທດສະບານເມືອງເຂົ້າຮ່ວມ.
ໃນກອງປະຊຸມໄດ້ຜ່ານ ຮ່າງຂໍຕົກລົງຂອງທ່ານເຈົ້າແຂວງ ວ່າດ້ວຍການຄຸ້ມຄອງ ນໍາໃຊ້ ແລະ ອານຸລັກຊ້າງບ້ານ, ເຊິ່ງປະກອບດ້ວຍ 8 ໝວດ 36 ມາດຕາ ຈາກນັ້ນຜູ້ເຂົ້າຮ່ວມຍັງໄດ້ພ້ອມກັນປະກອບຄຳຄິດຄຳໃສ່ຮ່າງຂໍ້ຕົກລົງວ່າດ້ວຍຮ່າງຂໍ້ຕົກລົງຂອງທ່ານເຈົ້າແຂວງ ວ່າດ້ວຍການຄຸ້ມຄອງ ນຳໃຊ້ ແລະ ອານຸລັກຊ້າງບ້ານໃຫ້ມີຄວາມຖືກຕ້ອງສອດຄ່ອງກັບສະພາບຄວາມເປັນຈິງ ໃນການເຄື່ອນໄຫວຈັດຕັ້ງປະຕິບັດໃນຕໍ່ໜ້າ. ການຄຸ້ມຄອງ ນຳໃຊ້ ແລະ ອານຸລັກຊ້າງບ້ານນີ້ ໄດ້ສ້າງຂື້ນ ກໍ່ເພື່ອການຄຸ້ມຄອງການລ້ຽງ, ການປົກປັກຮັກສາ, ການປົກປ້ອງ, ການນຳໃຊ້, ການຮັກສາສຸຂະພາບ, ການສຶກສາຄົ້ນຄວ້າ, ການຂະຫຍາຍພັນຊ້າງ ໃນສະພາບການທີ່ຄົນເປັນຜູ້ເບິ່ງແຍງດູແລຮັກສາ ເຊິ່ງແຕກຕ່າງຈາກຊ້າງປ່າທີ່ດຳລົງຊີວິດໃນທຳມະຊາດຢ່າງອິດສະຫຼະ. ຈຸດປະສົງ: ການທາບທາມຮ່າງຂໍ້ໃນຄັ້ງນີ້: ກໍ່ເພື່ອກຳນົດຫຼັກການ ລະບຽບການ ແລະ ມາດຕະການກ່ຽວກັບການຄຸ້ມຄອງ ແລະ ອານຸລັກຊ້າງ, ນຳໃຊ້ຊ້າງ, ການສ້າງຕັ້ງສະມາຄົມ, ຄະນະກຳມະການກວດກາຄຸ້ມຄອງ ການສ້າງຕັ້ງກອງທຶນ ແລະ ຂໍ້ຫ້າມ ເພື່ອແນໃສ່ເຮັດໃຫ້ການປົກປັກຮັກສາຊ້າງໃຫ້ມີຄວາມຍືນຍົງ ແລະ ເຂົ້າຮ່ວມງານມະຫາກຳບຸນຊ້າງຕະຫຼອດໄປ. ຈາກນັ້ນກໍ່ໄດ້ເຜີຍແຜ່ເຜີຍແຜ່ກົດໝາຍວ່າດ້ວຍສະຫະກອນ ສະບັບເລກທີ 54/ສພຊ ລົງວັນທີ 28 ມິຖຸນາ 2024 ແລະ ເຜີຍແຜ່ດໍາລັດຂອງລັດຖະບານ ວ່າດ້ວຍກະສິກໍາແບບມີສັນຍາ ສະບັບເລກທີ 56/ລບ ລົງວັນທີ 27 ມັງກອນ 2025 ເຊິ່ງໄດ້ກໍານົດຫຼັກການ, ລະບຽບການ ແລະ ມາດຕະການ ກ່ຽວກັບການຄຸ້ມຄອງ ຕິດຕາມ ກວດກາ ການດຳເນີນວຽກງານສະຫະກອນ ແລະ ກະສິກຳແບບມີສັນຍາຢູ່ ສປປລາວ.
ໂດຍ: ຄ . ອ . ມ ເມືອງເງິນ