ໃນຕອນເຊົ້າວັນທີ 24 ກໍລະກົດ 2026 ນີ້, ຢູ່ທີ່ສະໂມສອນຂອງເມືອງທົ່ງມີໄຊ ແຂວງໄຊຍະບູລີ ໄດ້ຈັດກອງປະຊຸມແນະນໍາການນໍາໃຊ້ລະບົບຂໍ້ມູນຂ່າວສານການເງິນພາກລັດ (LIFMIS) ຂຶ້ນ. ໂດຍການເປັນກຽດເຂົ້າຮ່ວມຂອງທ່ານ ສະເຫຼີມ ພົມມະຈັນ ຄະນະປະຈຳພັກເມືອງ ຮອງປະທານຄະນະກໍາມະການປົກຄອງເມືອງທົ່ງມີໄຊ, ມີຄະນະຮັບຜິດຊອບຈາກພະແນກການເງິນແຂວງ, ຫົວໜ້າ-ຮອງຫົວໜ້າຫ້ອງການ, ກົມກອງ, ອົງການຈັດຕັ້ງ, ປະທານຄະນະກຳມະການປົກຄອງຕາແສງ ພ້ອມດ້ວຍພະນັກງານຜູ້ຮັບຜິດຊອບວຽກງານການເງິນຂັ້ນເມືອງເຂົ້າຮ່ວມຢ່າງພ້ອມພຽງ.
ທ່ານ ສີປະເສີດ ລັດຖະຫວັນ ກຳມະການພັກເມືອງ ຫົວໜ້າຫ້ອງການການເງິນເມືອງ ໄດ້ລາຍງານການຈັດຕັ້ງປະຕິບັດແຜນງົບປະມານ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2026ວ່າ: ຫ້ອງການ-ການເງິນໄດ້ສຸມໃສ່ຈັດຕັ້ງປະຕິບັດຄຳແນະນຳຂອງລັດຖະມົນຕີກະຊວງການເງິນ,ຄຳແນະນຳຂອງລັດຖະມົນຕີກະຊວງການເງິນ,ຄຳແນະນຳຂອງທ່ານເຈົ້າແຂວງເພື່ອເປັນບ່ອນອີງໃນການຈັດຕັ້ງປະຕິບັດ; ໄດ້ຍົກສູງຄວາມເອົາໃຈໃສ່ໃນການນຳພາ-ຊີ້ນຳ ຊອກຄົ້ນຫາທ່າແຮງ ແລະ ຂຸດຄົ້ນທຸກແຫຼ່ງລາຍຮັບທີ່ບົ່ມຊ້ອນພາຍໃນເມືອງໃຫ້ບັນລຸຕາມແຜນທີ່ວາງໄວ້ ສະແດງອອກ ຈັດເກັບລາຍຮັບເຂົ້າງົບປະມານໄດ້ທັງໝົດ 621.77 ລ້ານກີບ, ເທົ່າກັບ33,80% ຂອງແຜນການປີ; ຄຸ້ມຄອງລາຍຈ່າຍໄດ້ທັງໝົດ 1.060,40 ລ້ານກີບ, ເທົ່າກັບ 40,76% ຂອງແຜນການປີ
ຈາກນັ້ນ, ຄະນະຮັບຜິດຊອບຂັ້ນແຂວງ ໄດ້ນໍາສະເໜີ ແລະ ແນະນໍາການນໍາໃຊ້ລະບົບຂໍ້ມູນຂ່າວສານການເງິນພາກລັດ (LIFMIS) ເຊິ່ງເປັນລະບົບທີ່ຊ່ວຍຫຼຸດຜ່ອນຂັ້ນຕອນການເຊັນເອກະສານທີ່ຍຸ້ງຍາກ ໂດຍຫຼຸດເຫຼືອພຽງ 3 ຂັ້ນຕອນ, ສາມາດຢັ້ງຢືນຜ່ານລະບົບ ແລະ ລົງລາຍເຊັນເອເລັກໂຕຣນິກ ໃນການຖອນເງິນງົບປະມານໄດ້ເລີຍ. ລະບົບດັ່ງກ່າວມີຂໍ້ຈໍາກັດຄື: ບໍ່ອະນຸຍາດໃຫ້ເບິກຈ່າຍເກີນແຜນງວດ ໂດຍຫົວໜ່ວຍງົບປະມານຕ້ອງຈ່າຍຕາມແຜນທີ່ແຂວງແຈ້ງໃນລະບົບເທົ່ານັ້ນ. ລະບົບ LIFMIS ປະກອບມີ 2 ລາຍການໃຫ້ນໍາໃຊ້ ຄື: ງົບປະມານ: ເຮັດໜ້າທີ່ແຈ້ງແຜນປີ, ແຜນງວດ, ຈັດສັນແຜນຕາມສາລະບານງົບປະມານ ແລະ ສັງລວມງົບປະມານເພື່ອອະນຸມັດ ແລະ ການເງິນ: ເຮັດໜ້າທີ່ໃນການຕີໃບຖອນເງິນ, ລົງລາຍເຊັນເອເລັກໂຕຣນິກ ແລະ ສ້າງສະໂນດສົ່ງຫາທະນາຄານ.
ໃນກອງປະຊຸມ ຍັງໄດ້ມີການອະທິບາຍເຖິງພາລະບົດບາດຄວາມຮັບຜິດຊອບຂອງ 3 ພາກສ່ວນ ຂັ້ນເມືອງ (ໜ່ວຍງານງົບປະມານ ແລະ ຫົວໜ່ວຍງົບປະມານ), ພ້ອມທັງແລກປ່ຽນຄໍາຄິດຄໍາເຫັນຢ່າງກົງໄປກົງມາເພື່ອຄວາມກະຈ່າງແຈ້ງ ແລະ ໃຫ້ມີຄວາມເປັນເອກະພາບກັນໃນການປະຕິບັດ. ໃນຕອນທ້າຍ, ທ່ານ ສະເຫຼີມ ພົມມະຈັນ ໄດ້ມີຄໍາເຫັນສັງລວມ ແລະ ຊີ້ນໍາຕື່ມ ເພື່ອໃຫ້ການຈັດຕັ້ງປະຕິບັດວຽກງານການເງິນຜ່ານລະບົບ LIFMIS ໃນຕໍ່ໜ້າ ມີຄວາມສະດວກ, ໂປ່ງໃສ ແລະ ມີປະສິດທິພາບ .