ໃນຕອນບ່າຍຂອງວັນທີ 27 ສິງຫາ 2026, ຢູ່ທີ່ໂຮງໝໍຊຸມຊົນເມືອງປາກລາຍ ແຂວງໄຊຍະບູລີ, ຄອບຄົວເມຍການນຳ ແລະ ທິມງານນັກທຸລະກິດເພດຍິງ ພາຍໃນເມືອງປາກລາຍ ນຳໂດຍ ທ່ານ ນາງ ບານເຢັນ ສຸນາເຄນ (ຄອບຄົວທ່ານເລຂາພັກເມືອງ) ແລະ ທ່ານ ນາງ ພອນໄພ ຈິນດາ (ຄອບຄົວທ່ານຮອງປະທານຄະນະກຳມະການປົກຄອງເມືອງ), ໄດ້ນຳເອົາອຸປະກອນການແພດ ແລະ ເຄື່ອງປັບອາກາດ (ແອ) ຈຳນວນ 3 ຊຸດ ລວມມູນຄ່າ 67,620,000 ກີບ ມາຮ່ວມມອບໃຫ້ໂຮງໝໍເມືອງປາກລາຍ.ໃຫ້ກຽດກ່າວຮັບໂດຍ ທ່ານ ຊ່ຽວຊານ ນາງ ແສງເພັດ ແກ້ວປະເສີດ, ກຳມະການພັກເມືອງ, ຫົວໜ້າຫ້ອງການສາທາລະນະສຸກເມືອງ, ໂດຍມີພະນັກງານ-ລັດຖະກອນ ພາຍໃນຫ້ອງການສາທາລະນະສຸກ ແລະ ໂຮງໝໍຊຸມຊົນເມືອງປາກລາຍ ເຂົ້າຮ່ວມຢ່າງພ້ອມພຽງ.
ອຸປະກອນທີ່ນຳມາມອບໃນຄັ້ງນີ້ ປະກອບມີ: ເຄື່ອງຕິດຕາມສຸຂະພາບຄົນເຈັບ (Patient Monitor), ເຄື່ອງຕິດຕາມເດັກໃນທ້ອງແມ່ຍິງຖືພາ (Fetal Monitor), ເຄື່ອງປັບອາກາດ ຈຳນວນ 3 ຊຸດ. ການຊ່ວຍເຫຼືອຄັ້ງນີ້ ສະແດງໃຫ້ເຫັນເຖິງຄວາມຫ່ວງໄຍ ແລະ ຄວາມເອົາໃຈໃສ່ຂອງຄອບຄົວເມຍການນຳ ແລະ ພາກທຸລະກິດ ເອກະຊົນ ຕໍ່ກັບຄວາມຈຳເປັນດ້ານອຸປະກອນການແພດ ເພື່ອແບ່ງເບົາພາລະ ແລະ ເພີ່ມຂີດຄວາມສາມາດຂອງໂຮງໝໍຊຸມຊົນເມືອງປາກລາຍ ໃນການບໍລິການປິ່ນປົວປະຊາຊົນໃຫ້ມີປະສິດທິພາບສູງຂຶ້ນ.
ໃນໂອກາດດັ່ງກ່າວ, ທ່ານ ຊ່ຽວຊານ ນາງ ແສງເພັດ ແກ້ວປະເສີດ ໄດ້ຕາງໜ້າໃຫ້ໂຮງໝໍຊຸມຊົນເມືອງ ກ່າວສະແດງຄວາມຂອບໃຈຢ່າງເລິກເຊິ່ງ ຕໍ່ນ້ຳໃຈອັນງົດງາມຂອງຄະນະທິມງານທຸກທ່ານ ແລະ ຢືນຢັນວ່າຈະນຳເອົາອຸປະກອນທັງໝົດໄປໝູນໃຊ້ເຂົ້າໃນວຽກງານປິ່ນປົວຕົວຈິງໃຫ້ເກີດປະໂຫຍດສູງສຸດ. ຫຼັງຈາກນັ້ນ, ຄະນະຜູ້ມອບ-ຜູ້ຮັບ ກໍໄດ້ຮ່ວມກັນໄປຢ້ຽມຢາມຄົນເຈັບ, ເບິ່ງຫ້ອງກວດພະຍາດ ແລະ ຫ້ອງຜ່າຕັດ ພາຍໃນໂຮງໝໍຊຸມຊົນຕື່ມອີກ.