ຕອນບ່າຍວັນທີ 31 ສິີງຫາ 2026 ຢູ່ທີ່ຫ້ອງປະຊຸມ ຫ້ອງການຄະນະໂຄສະນາອົບຮົມເມືອງ ທົ່ງມີໄຊ ແຂວງໄຊຍະບູລີ ໄດ້ຈັດພິທີເປີດຮຽນສະໜັບສະໜູນ ໃຫ້ມະຫາຊົນ ຜູ້ກ້າວໜ້າຢູ່ພາຍໃນເມືອງ ຂຶ້ນຢ່າງເປັນທາງການ ໂດຍການເປັນກຽດເຂົ້າຮ່ວມ ເປັນປະທານຂອງສະຫາຍ ນາງ ພຸດ ຈໍາປາດາ ກຳມະການພັກເມືອງ ຫົວໜ້າຄະນະໂຄສະນາອົບຮົມເມືອງທົ່ງມີໄຊ ມີບັນດາຄະນະຮັບຜິດຊອບ ພ້ອມດ້ວຍມະຫາຊົນຜູ້ກ້າວໜ້າ ຈາກສໍານັກງານ, ອົງການ, ກົມກອງ ພາຍໃນເມືອງເຂົ້າຮ່ວມທັງໝົດ 14ສະຫາຍ.
ການເປີດຮຽນສະໜັບສະໜູນໃນຄັ້ງນີ ໃຫ້ມະຫາຊົນຜູ້ກ້າວໜ້າ ໄດ້ຮັບຟັງ, ເຊື່ອມຊືມເອກະສານ ອົບຮົມເປົ້າໝາຍ, ເງື່ອນໄຂ ແລະ ມາດຖານຂອງຜູ້ທີ່ຈະຂະຫຍາຍເຂົ້າເປັນສະມາຊິກພັກ. ທັງນີ້ ກໍ່ເພື່ອເຮັດຜູ້ທີ່ເຂົ້າຮ່ຳຮຽນ ມີຄວາມ ຮັບຮູ້ ແລະ ເຂົ້າໃຈປະຫວັດຄວາມເປັນມາ, ອຸດົມການ ແລະ ທາດແທ້ ຂອງພັກປະຊາຊົນປະຕິວັດລາວ, ເຂົ້າໃຈກ່ຽວກັບມາດຕະຖານ, ເງື່ອນໄຂຜູ້ທີ່ຈະຂະຫຍາຍເຂົ້າເປັນສະມາຊິກພັກ ແລະ ຜົນປະໂຫຍດທີ່ສະມາຊິກພັກໄດ້ຮັບ, ບົນພື້ນຖານຄວາມຮູ້, ຄວາມເຂົ້າໃຈດັ່ງກ່າວເຮັດໃຫ້ມະຫາຊົນຜູ້ທີ່ມີຄວາມກ້າວໜ້າ ໄດ້ຕັ້ງໜ້າເຝິກຝົນຫຼໍ່ຫຼອມຕົນເອງໃຫ້ມີມາດຕະຖານເງື່ອນໄຂຄົບຖ້ວນ ແລະ ມີຄວາມຕື່ນຕົວສະໝັກເຂົ້າເປັນສະມາຊິກພັກປະຊາຊົນປະຕິວັດລາວ ເພື່ອເພີ່ມກຳລັງແຮງສູ້ຮົບໃຫ້ແກ່ພັກໃຫ້ນັບມື້ຫຼາຍຂຶ້ນ ເພື່ອສືບຕໍ່ເຮັດຫຼ້ອນໜ້າທີ່ການເມືອງຂອງຕົນ, ທັງເປັນການປະຕິບັດຕາມແຜນການ ກໍ່ສ້າງພະນັກງານນຳພາ-ຄຸ້ມຄອງ ແຜນກຳນົດພະນັກງານ ຢ່າງເປັນລະບົບຕໍ່ເນືອງ ຍົກລະດັບທາງດ້ານທິດສະດີການເມືອງໃຫ້ບຸກຄະລະກອນທີ່ມີຄຸນນະພາບ ເພື່ອຕອບສະໜອງໄດ້ກັບຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່
ໃນຕອນທ້າຍ ພິທີ ສະຫາຍ ນາງ ພຸດ ຈໍາປາດາ ກຳມະການພັກເມືອງ ຫົວໜ້າຄະນະໂຄສະນາອົບຮົມເມືອງທົ່ງມີໄຊ ຍັງໄດ້ມອບໃບຢັ້ງຢືນການຮຽນສະໜັບສະໜູນໃຫ້ມະຫາຊົນຜູ້ທີ່ກ້າວໜ້າຕື່ມອີກ