ໃນວັນທີ 16 ກຸມພາ 2024 ນີ້, ທ່ານ ທອງລຸນ ສີສຸລິດ ປະທານປະເທດ ແຫ່ງສາທາລະນະລັດ ປາຊາທິປະໄຕ ປະຊາຊົນລາວ ພ້ອມດ້ວຍຄະນະໄດ້ລົງຢ້ຽມຢາມກອງພັນນ້ອຍປືນໃຫຍ່ໜ້າດິນ 609 ທະຫານແຂວງໄຊຍະບູລີ, ໂດຍການຕ້ອນຮັບຂອງ ທ່ານ ພົງສະຫວັນ ສິດທະວົງ ກຳມະການສູນກາງພັກ ເລຂາພັກແຂວງ ເຈົ້າແຂວງໄຊຍະບູລີ, ທ່ານ ພົນຈັດຕະວາ ກູດ ພົມມາ ຫົວໜ້າການທະຫານກອງບັນຊາການທະຫານແຂວງໄຊຍະບູລີ, ມີຄະນະນຳກອງບັນຊາການທະຫານແຂວງ, ຄະ ນະພັກ-ຄະນະບັນຊາ ກອງພັນ 609 ເຂົ້າຮ່ວມ.
ໂອກາດນີ້, ສະຫາຍ ພັນໂທ ຈັນທອງ ຈັນຟອງ ຫົວໜ້າການເມືອງ ກອງພັນນ້ອຍປືນໃຫຍ່ໜ້າດິນ 609 ທະຫານແຂວງໄຊຍະບູລີ ໄດ້ລາຍງານຫຍໍ້ ທີ່ຕັ້ງ, ພາລະບົດບາດ, ສິດ, ໜ້າທີ່, ຄວາມຮັບຜິດຊອບ ແລະ ສະພາບລວມຂອງກົມກອງ, ຈາກນັ້ນທ່ານ ທອງລຸນ ສີສຸລິດ ປະທານປະ ເທດ ພ້ອມຄະນະກໍ່ໄດ້ລົງຢ້ຽມຢາມເບິ່ງພື້ນຖານການຜະລິດປູກຜັກໃນເຮືອນຮົ່ມຂອງກົມກອງ ແລະ ຢ້ຽມຢາມເບິ່ງດ້ານລະບຽບແບບແຜນໃນເຮືອນນອນຂອງກົມກອງນຳອີກ. ໂອກາດນີ້, ທ່ານປະ ທານປະເທດໄດ້ຍົກໃຫ້ເຫັນສະພາບເສດຖະກິດໄພເງິນເຟີ້, ສິ້ນຄ້າລາຄາແພງ ແລະ ພ້ອມທັງໃຫ້ຄວາມຢ້ຽມຢາມຖາມຂ່າວເຖິງຊີວິດການເປັນຢູ່ຂອງພະນັກງານ-ນັກຮົບ ແລະ ການຈັດຕັ້ງເຄື່ອນໄຫວຂອງກົມກອງດ້ວຍຄວາມເປັນຫວ່ງເປັນໄຍ, ຄວາມຮັກແພງອັນອົບອຸ່ນ, ທ່ານ ປະທານປະ ເທດ ຍັງໄດ້ຍ້ອງຍໍຊົມເຊີຍຕໍ່ຜົນງານທີ່ກົມກອງຍາດມາໄດ້ໃນໄລຍະຜ່ານມາ ແລະ ໃຫ້ທິດຊີ້ນຳຫຼາຍບັນຫາທີ່ສຳຄັນຕໍ່ຄະນະພັກ-ຄະນະບັນຊາ ກອງພັນ 609 ເປັນຕົ້ນໃຫ້ເອົາໃຈໃສ່ສືບຕໍ່ຂະຫຍາຍພື້ນຖານການຜະລິດປູກຟັງ-ລ້ຽງສັດຕາມທ່າແຮງຂອງກົມກອງເພື່ອສະໜອງພືດຜັກໃຫ້ທ້ອງຕະ ຫຼາດໃຫ້ຫຼາຍເພື່ອສ້າງລາຍຮັບເຂົ້າກົມກອງ. ໂອກາດນີ້, ທ່ານ ປະທານປະເທດ ຍັງໄດ້ຮຽກຮ້ອງມາຍັງ ຄະນະພັກ-ຄະນະບັນຊາ, ພະນັກງານ-ນັກຮົບໃຫ້ຮັກສາມູນເຊື້ອອັນດີງາມຂອງກອງທັບ ເປັນ ຕົ້ນແມ່ນມູນເຊື້ອພິລະອາດຫານບໍ່ຍອມຈຳນົນຕໍ່ສັດຕູ, ມູນເຊື້ອຄວາມສາມັກຄີປອງລະຫວ່າງກອງ ທັບ ກັບປະຊາຊົນປຽບ ເໝືອນປາກັບນ້ຳທີ່ຕັດແຍກອອກຈາກກັນບໍ່ໄດ້, ເສີມຂະຫຍາຍບົດບາດການນຳພາຂອງຕົນຕໍ່ໜ້າທີ່ປ້ອງກັນຊາດ-ປ້ອງກັນຄວາມສະຫງົບ ປັບປຸງກໍ່ສ້າງກຳລັງແຮງສັງລວມຂອງກົມກອງໃຫ້ເຂັ້ມ ແຂງ ສືບຕໍ່ຄວາມສາມັກຄີປອງດອງກັບອຳນາດການປົກຄອງທ້ອງຖິ່ນໃຫ້ແໜ້ນແຟ້ນ ແລະ ພ້ອມກັນປົກປັກຮັກສາອຳນາດອະທິປະໄຕ ຂອບເຂດຮັບຜິດຊອບຂອງຕົນໃວ້ໃຫ້ໝັ້ນຄົງຕະຫຼອດໄປ.
ຂ່າວ: ສົມຈີນ ສິນຕາວັນ
ພາບ: ໄຊຍະສັກ