ເມືອງຄອບ ແຂວງໄຊຍະບູລີ ໄດ້ຈັດພິທີ ສະເຫຼີມສະຫຼອງວັນປ່ອຍປາ ແລະ ສັດນໍ້າແຫ່ງຊາດ 13 ກໍລະກົດ ຂຶ້ນໃນຕອນເຊົ້າວັນທີ 13 ກໍລະກົດ 2026 ນີ້, ຢູ່ທີ່ປາກນໍ້າພ້າວ ບ້ານຜາບ່ອງ.
ໂດຍເປັນກຽດເຂົ້າຮ່ວມຂອງທ່ານ ສົມນຶກ ສິງຄໍາ ກໍາມະການພັກແຂວງ ເລຂາພັກເມືອງ, ມີຄະນະປະຈໍາພັກເມືອງ, ກໍາມະການພັກເມືອງ, ຫົວໜ້າ, ຮອງຫົວໜ້າຫ້ອງການ, ອົງການ, ກົມກອງ, ພະນັກງານ, ທະຫານ, ຕໍາຫຼວດ, ນັກທຸລະກິດຜູ້ປະກອບການ ເຂົ້າຮ່ວມ.
ໃນພິທີ ທ່ານ ນວນສີ ແກ້ວວົງລັດ ກໍາມະການພັກເມືອງ ຫົວໜ້າຫ້ອງການກະສິກໍາ ແລະ ສິ່ງແວດລ້ອມເມືອງ ໄດ້ລາຍງານໃຫ້ຮູ້ວ່າ: ປາທີ່ນໍາມາປ່ອຍໃນຄັ້ງນີ້ ລວມທັງໝົດ ມີ 80.000 ໂຕ ສ່ວນຫລາຍແມ່ນປາໄນ, ປາປາກ, ປາອິນເດຍ ແລະ ປາເພ້ຍ. ໂດຍໄດ້ແບ່ງອອກເປັນ 5 ຈຸດຄື: ຈຸດທີ 1 ຢູ່ປາກນໍ້າພ້າວ ບ້ານຜາບ່ອງ, ຈຸດທີ 2 ຝ່າຍບ້ານນໍ້າພ້າວ, ຈຸດທີ 3 ບ້ານຫ້ວຍນົກກົດ, ຈຸດທີ 4 ບ້ານໂພນສະຫວ່າງ ແລະ ຈຸດທີ 5 ບ້ານຫົວເມືອງ.
ຈຸດປະສົງກໍເພື່ອ ຍົກສູງນ້ຳໃຈຄວາມຮັບຜິດຊອບຂອງຕົນ ເຮັດໃຫ້ໜ້າທີ່ວຽກງານນີ້ກາຍເປັນຂອງຄອບຄົວ, ເຮັດໃຫ້ໃນນ້ຳມີປາ ໃນນາມີເຂົ້າ ຢູ່ຄູ່ຊາວເມືອງຄອບ ຕະຫຼອດໄປ. ພ້ອມດຽວກັນນີ້, ຕ້ອງເອົາໃຈໃສ່ໃນການຄຸ້ມຄອງບໍ່ໃຫ້ຖືກທຳລາຍ, ເປັນເຈົ້າການເຮັດໃຫ້ແຜນການປ່ອຍປາ, ອານຸລັກສັດນ້ຳ ໃນປີນີ້ ໄດ້ຮັບການຈັດຕັ້ງປະຕິບັດຢ່າງມີໝາກຜົນ ແລະ ບັນລຸໄດ້ຕາມແຜນການທີ່ວາງໄວ້, ເຮັດໃຫ້ແມ່ນ້ຳ, ລໍາເຊ ເຕັມໄປດ້ວຍສັດນໍ້າ ນາໆຊະນິດ. ພ້ອມນີ້ ກໍເພື່ອເປັນການ ປຸກຈິດສຳນຶກໃຫ້ປະຊາຊົນ, ນ້ອງນັກຮຽນ ຮູ້ປົກປັກຮັກສາສິ່ງແວດລ້ອມ ເປັນຕົ້ນແມ່ນ ບໍ່ໃຫ້ຖີ້ມສິ່ງເສດເຫຼືອແບບຊະຊາຍ, ການປ່ອຍນໍ້າເໜົ່າ-ເໝັນ ລົງສູ່ແມ່ນ້ຳ ລໍາເຊ ທີ່ເປັນບ່ອນອາໄສຂອງປາ ແລະ ສັດນໍ້າ, ຊ່ວຍກັນຟື້ນຟູຄືນຄວາມອຸດົມສົມບູນຂອງຊັບພະຍາກອນທຳມະຊາດ ໃຫ້ຢືນຍົງ ແລະ ສືບທອດໄປຮອດເຊັ່ນລູກ ເຊັ່ນຫລານຕໍ່ໆໄປ.